Бодылэн дуныз

Удмурт Дунне
By Удмурт Дунне Ноябрь 12, 2013 12:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бодылэн дуныз

87Вордӥськем гуртэлы, Алнаш ёросысь Кизекгуртлы, 2010-тӥ арын тырмиз 300 ар. Кузьымъёс пӧлын тужгес тунсыкоез но вашкалаез луиз гуртмылэн пусъёсыныз ваем боды. Песяй-песятайёсмылэн ӧй вал дышетскемзы, соин ик улоназы пус бадӟым инты басьтэ вылэм. Со вал тодмет, печать интыын. Пусэн бодыез шедьтэм Михаил Григорьевич Горячёв. Со 1965-тӥ аръёсы кивалтӥз гуртысьтымы клубен. Коркась корка пыраса, арлыдоосын вераськыса, бичаз вашкала тӥрлыкъёсты. Озьы клубамы вашкала тӥрлыкъёсын пичи гинэ музей усьтӥськиз. Но клубмес кесямзы бере музее люкам арбериосты нуизы Кучыран школае. Аръёс ортчыса, школа но ворсаськиз дышетскисьёс ӧвӧлэн. Отысь музейысьтыз куд-ог экспонатъёс вуизы Алнашысь нылпи творчествоя юртлэн музей сэрегаз. Кема аръёс ӵоже отын ужа гуртысьтымы Нина Алексеевна Новгородцева. Пумиськонэ со ик вайиз пусэн бодыез. Пичиез но, бадӟымез но, киысь кие вошъяса, учкизы бодыысь гожъёсты. Тросэз ӧз но валалэ, мар гожъёс со, мае возьмато. Мукетъёсызлэн тодэмзы потӥз, малы кулэ вылэм та боды гуртоослы. Нина Алексеевна гурт калыклы вазиськиз: «Кин ке тодмаз-а, ӧз-а та бодыысь песятай пуссэ?» Вань люкаськем калык пӧлысь нокин ӧз тодма. Анае гинэ пӧртэм гожъёс пӧлысь тодмаз песятаелэсь пуссэ. Угось со туннэ ке но адӟиське на пичи капкамылэн кутӥськоназ. Капка кутонзэ песятае ас киыныз кебитын лэсьтэм. Нина Алексеевна вань люкаськем калыклы вераз, малы кулэ вылэм та пусэн боды. Боды вылын — 46 пус. Озьыен, гуртамы 46 хозяйство вылэм. Бодылэн кузьдалаез 260 сантиметр. Одӥг палаз — корка радъя лэсьтэм пусъёс, урдэсаз — векчи гожъёс. Та гожъёс возьмато, кӧня пиосмуртъёс вылэм семьяын. Мукет палаз — векчиесь гожъёс, соос выт тырон сярысь верало. Уго 19-тӥ даурлэн пумаз но 20-тӥ даурлэн кутсконаз котькуд гуртысь хозяйство одно ик выт тыре вылэм. Быгатӥськод-а, уд-а — юась ӧй вал. Нюлэскын кор коракуз, котькуд воргорон люкам пуаз но коръёсы пуктылэм аслэсьтыз пуссэ. Колхозъёс кылдэмлэсь азьло вань бусыос, возьёс котыртэмын вылэм кенеръёсын. Соос вылэ но пуктылӥзы асьсэлэсь пусъёссэс. Кенерзы куашка ке, тодмаллязы пусъя, кутыны (тупатъяны) косӥзы. Медаз отчы пудо пыр. Гуртоос пудозэс та возь вылэ асьсэос улляса нуылӥллям. Пудо возьмасьёс вылӥллямтэ, дыр вуэмъя ыжъёс, скалъёс асьсэос ик берто вылэм. Туала арын пудоез озьы уд лэзьы, кышкыт, чаль лушкалозы. Возь вылэ поттон азьын кунянъёсты, ыжпиосты котьку ик пусйылӥллям сурантэм понна. Татын но котькуд семьялэн аслаз пусэз. Соин ик бертымтэ пудоез, гидъёсы пыраса, утчазы. Тодмаллязы пуссыя. Одно ик пусйылӥзы пельзэс. Песятаелэн пудо пусэз «кумель ӵыпет» нимаське вылэм, сое пукто вылэм пудолэн паллян пеляз. Пусъемзы бере пельлэсь пичи вандэм люкетсэ ӧз куштылэ, одно ик басьтылӥзы но гид сэргы понылӥзы, пудо арам медаз луы, мед йылоз но гужем ӵоже возь вылын ӟеч мед ветлоз шуыса. Шонер вераллям вашкала пересьёс: нылкышно секытэн дыръя пудоез солы вӧсь карыны, пусйыны уг яра. Вордӥськоно нылпиедлы йӧтоз. Оскоды-а, уд-а, анае, выныным секытэн ветлыкуз, песятаеным ыжпиосты пусйиллям. Оло анае вунэтэм пересьёслэсь верамзэс, оло, атайзэ жаляса, юрттӥськоно кариськем. Нош выны вордӥськем бере гинэ валам но тодаз ваем ыжпи пусъемзэ. Пиезлэн паллян пеляз сыӵе ик пус, кызьы пусйизы ыжпиосты. Туала вакытэ ыжпиосты уг ни пусъё. Тодӥсь но ӧвӧл ини вашкала песятай пусъёсты. Ыжъёслэн но ыжпиослэн чыртыязы яке тыбыр вылазы думо яркыт басма. Соя ик тодмало асьсэлэсь пудозэс. Вашкалаосмы озьы ик трос вордӥзы ӟазегъёс но ӵӧжъёс. Татын но котькуд семьялэн аслаз пусэз вылэм. Возь вылэ поттон азязы соосты ваньзэс пусйылӥзы, медаз сураське шуыса. Песятае тютюпиослэсь кык пыдзылэсь ик кыр палзэс дуртӥз пусйылэм. Милемыз тютюпиосты возьманы анайёсмы косылӥзы. Медаз ыше, медаз сураське, сьӧсь тылобурдо медаз кут. Возьмамы Колтымак шур дурысь, возь вылын. Ма, милям, огазе люкаськыса, шудэммы но потэ вал. Ужмес кытӥяз вунэтылӥмы но. Лулпу арамаетӥ пегаса шудӥмы. Тютюпиосмы сураськылӥзы но. Пичи дыръязы соос уго ваньзы одӥг кадесь ӵуж комокъёс. Ярам али, пусъя ми соосты, бертон азямы ӝогак огазе люкаллямы. Ӟазегъёс но визьмоесь, тодмаллязы асьсэлэсь пиоссэс. Гурт калык котькуд праздниклы трос куно ӧтьылӥз, сюан шудылӥз. Соин ик огзылэсь огзы ӝӧк вылэ сиён-юон пуктылыны нуллӥзы тэркыоссэс, пуньыоссэс, чаркаоссэс. Медаз сураське шуыса, песятае тусьты-пуньыоссэ аслаз пусэныз тодмо карылӥз. Куд-ог пусъем вашкала тэркыосмы туннэ ке но вань на. Анае соосты туж утьыса возе. Вашкала дыръя котькуд гуртлэн вылэм, дыр, выт тырон бодыез. Нош соос тросэз ышемын, быремын. Милям гуртмылэн утемын. Соиз понна мон туж шумпотӥсько но данъяськисько.

Раиса Корепанова

Удмурт Дунне
By Удмурт Дунне Ноябрь 12, 2013 12:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<