Ма огазея журналистэз но следователез?

Удмурт Дунне
By Удмурт Дунне Ноябрь 8, 2013 17:38

Ма огазея журналистэз но следователез?

IMG_3324Шаерысьтымы Югдурез утёнъя министерство кыкетӥ ползэ ортчытӥз «Журналист воштэ удыссэ» ужрад. Одӥг нуналлы полицейской луыны соглаш кариськиз 27 журналист.

Кошкисько полицае!
Полицейской луыны мылкыд карисьёс пӧлын тросгес егитъёс — Удмурт кун университетысь журналистикая факультетын дышетскись нылъёс но одӥг пияш. Студентъёс ке, студентъёс ик вань. МВД-лэн залаз Александр Первухин министрен но наставникъёсынымы тодматскеммы бере ӝегатскытэк ширтћськом полициын ужасьёсты дышетонъя выль кылдытэм центре (азьло татын вал Россиысь МВД-лэн Нижний Новгородысь академиезлэн ёзэз). МВД-лэн юртысьтыз потыса, милям лыдмы куинь поллы шераз. Бадӟым автобусэ куать кузя пуксимы. Ӝыны час ортчыса, йыромем эшъёсмы пӧлысь витез бордамы итӥськизы ини.

Полициын ужасьлэн тазалыкез котькинлы адӟем карымон луыны кулэ. Милесьтым но быгатонлыкмес котыр ласянь эскеризы, визьмес сыназы.

Музейысь вамыш-тӥськом онлайн-конференциос ортчытон классэ — МВД сярысь лекция кылзыны. Лекция лыдӟись ваньзэ тупен-тупен мадьыны выре, мӧзмыт, вушйылыны кутским ни, уроклэсь быремзэ чидатэк витиськом. Ӝыны час ортчыса, лекция йылпумъяськиз.

Табере азбаре поттӥзы, плац вылэз, пе, ӵошкытатоды. Одӥг чурен султэммы бере валай, эшъёсы пӧлысь тужгес лапег мугороез — мон. Со понна вань эшъёсылэсь вамышъямзэс адӟи. Нылъёс ӝужыт беро пыдкукъёссэс но ӧз жалялэ, строен вамышъяны дышетскизы.

Палэнысен учкыса гинэ, строен ветлон капчи адске вылэм. «Равняйсь!» командаез кыкетӥ полысеныз быдэстӥмы ке, чурен чебер вамышъяны кемагес ик курадӟимы. Азьлань вамыштыны ӧдъяськом гинэ, радмы шальтра. Дас минутъёс пӧсяммы бере отрядмылэн ӵош вамыштэм куараез кылӥськиз ик. «Вольно!» команда сётэм бере йыръёсмес вылэгес ӝутӥмы но асьмелы сцена вылын эктӥсь артистъёс кадь потӥмы — плац вылын вамышъяны дышетскеммес полициын ужасьёс укноетӥ учко вылэм.

Куинетӥ урокмы спортзалын вал. Час но ӝыны ӵоже мугормес посӥмы, йыртэмасьёслэсь утиськон амалъёсты дышетӥмы. Боевой искусствоя ӵошатсконъёсы пыриськись пиос ас вылазы возьматӥзы шонер уськытскон, йыртэмасьёслэсь утиськон амалъёсты. Валаса усиськод ке, йыр-пыд быгылес кыльыны быгато вылэм. Пеймыт ульчаысен яке огнады дыръя йыртэмасьёс урдскизы ке, суй-пыддэс эн юске. Улэп гинэ мед кельтозы шуыса, куд-ог адямиос сумкаысьтызы вань коньдонзэс, зарни пель угыоссэс асьсэос кузьманы дась. Улон возьматэ, сыӵе дыръя сьӧсьёслэн мылкыдзы эшшо но пуроме, кузё луэмзэс шӧдыса, одно ик жугыса кельтозы. Соин ик эн жалялэ куарадэс, кесяське, йыртэмасьлэн кук висказ ӵыже, йыраз мыжге, куртчылӥське, коть ӵабъяське. Шуге-леке шедем муртъёслы ӝегатскытэк вазиськоно югдурез утисьёслы. «Пӧсь пытьыосъя» йыртэмасез шараяны капчигес.
Берпуметӥ урок — тирын. Зэмос патрон ќз оске. Куинь пол лазерен ыбыны луонлык сётӥзы. Электрон мишень соку ик компьютер пыр возьматӥз очкомес. Таяз учыре сьӧд мишеньёсты 10 метр кемысь гинэ ыбылӥмы, соин, лэся, куинь полаз ик «8-сэ» йӧттӥ. Отӥяз мылкыд карисьёс Макаров пистолетэз сэрттӥзы-бичазы.

Озьы ми одӥг ӝыт куспын полицейской луыны дышетскимы. Нош улонын югдур мукетгес. Ӝыны ар ӵоже тодон-валан люкам, экзаменъёсты ӟеч сётэм муртлы гинэ пистолет оско.

Тодам лыктӥзы школаын дышетскем аръёсы, НВП урокъёс ас вакытаз милемды строен вамышъяны гинэ ӧвӧл, пыӵал тӥрлыкез но кынем синмын сэрттыны-бичаны дышетӥзы вал.

Юрттӥськи адӟись луыса
МВД-лэн пӧртэм ёзъёсыз пӧлысь таяз учыре тодматсконо кариськи следовательлэн уженыз. Юнматӥзы МВД-лэн Ижысь Следствиея управлениысь Октябрь ёросъя ёзысьтыз старший следователь Татьяна Колногорова борды.
Театр вешалка бордысен кутске, шуо ке, МВД — дежурной часть бордысен. Следовательёс доры дежурной часть пыр потоно луиз, котькуд пырись-потӥсез отын сак эскеро, ваньзэ нимын-тулын юало, кытчы мынэмез гожто. Документъёсын вырытозям, нырме чатыртӥз кӧш зын. Законэз тӥясьёсты ёросъёсысь дежурной часте вутто. Озьы нуналлы быдэ «обезьянник» шуоназы ӧжытсэ 40-50 мурт куноя.

Дежурной частьын ужасьёс телефон дорын пуко. Октябрь ёросысь отделэ гинэ 150 мурт пала, юрттэт курыса, жингыртэ. МВД-лэн ёросысь ёзаз нуналлы быдэ ужало следователь, оперативник, участковой, эксперт, лушкаськонъёс дыръя соос сьӧразы куто уголовной розыскын ужасьёсты но кинологъёсты.

— Жингыртэмъёс пӧлысь куиньмос люкетэз лушкаськон яке йыруж лэсьтонэн герӟаськемын, — шуэ следователь Татьяна Колногорова. — Куд-ог дыръя, липетысьтызы ву вияку но, милемлы жингырто. Ваньзэ соосты тетраде радызъя пусйиськомы. Жингыртӥсьёс сяна, дорамы лыктыса но ӝожтӥськисьёс луо.

Созэ ачим но адӟи: полицие пырон ӧс дорын черодын сыло арлыдо нылкышноос. Ваньзы соос следователь доры курисько. Татьяна Валерьевналэн ужан кабинетэз пичи гинэ: ӝӧк, компьютер, принтер но кӧня ке пуконъёс. Куинь адямилэсь трос отчы уз тэры. Следователь нылкышноосты рос-прос кылзӥз, ӝожтӥськонзэс тетраде пыр-поч гожтӥз. Вӧзазы пукисько, кылӥсько: куатьтон арес котыр кышноос пӧяськисьёслэн ки улазы шедиллям, уно аръёс ӵоже люкам коньдонзэс вакчи дыр куспын уноятыны малпаллям вылэм, нош асьсэос «штанитэк» кылиллям: 60 сюрс-200 сюрс манетсэс кисыысьтызы поттӥллям, пирамида шуонэ шедиллям. Коньдонтэк кылемзэс валаса, полициын ужасьёс доры вазиськиллям.

Мукетыз уж лушкаськонэн герӟаськемын. Пушкинской ульчаын «Сигма» бадӟым вуз карон юрт пуктӥське. 18-тӥ-21-тӥ октябре куамынлэсь ятыр тӥрлыксы ышем. Уголовной уж ӝегаса ӝутэмын вал ке но, следовательёслэн ӟеч тыршемзы шӧдӥськиз уж вылын. 30-тӥ октябре кык мурт ӝегатэмын, ужан тӥрлыкъёс кузёлы берыктэмын.
Следовательлэн вал-тӥсь ужез журналистлэн кадь ик — юалляськон но гожъяськон. Нунал ӵоже лушкаськон учыръёс но жугиськонъёс ӧй вал ке но, югдурез утён удысын ужасьёслы пичи ке но юрттӥськыны быгатӥ, та нуналэ мон адӟисьлэсь (понятойлэсь) ужзэ быдэстӥ.

Следовательёслэн «шул-дыр» улонзы ӝытазе 19 час бере, пе, кутске. Озьы ик вылэм. 19 час котырын Металлургын улӥсь воргорон вылэ йыртэмасьёс омырскиллям. Коньдонзэ, сотовой телефонзэ талам сяна, жугыса кельтӥллям. Тая уголовной уж ӝутэмын, йыртэмасьёс ӝегатымтэ на.

Та нуналэ ик 20 час 50 минут котырын йырез шузимытӥсь суретэн вуз карись ӝегатэмын. Югдурез утён удысын ужасьёс Октябрь ёросысь суд улэ азьвыл кыскам муртлэсь 4,62 грамм метамфитаминзэ кисыысьтыз шедьтӥллям, дорысьтыз эшшо 13,39 грамм шараяллям. Егит мурт ӝегатэмын.

Следовательлэн удысэз сокем уг адскы ке но, быдэстоно ужез лачак вылэм.

Валентина Емельянова
Туспуктӥз Татьяна Лапинер

Удмурт Дунне
By Удмурт Дунне Ноябрь 8, 2013 17:38
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<