Тус

Удмурт Дунне
By Удмурт Дунне Октябрь 21, 2013 14:11
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Тус

172006Этюд

— Дун-чылкыт Матрона, тон зэмен ик вань ке, анае мед бурмоз. Солы пичи ке но капчи медло. Туннэ понна валесысьтыз но ӧз султа на. Тон вань ке, кыл монэ! Пересь нэнэ весь оскытэ вал: улонад шуг-секытэн пумиськид ке, Матронлы вазиськы — юрттоз. Тани вазиськисько тыныд: анаелы капчигес мед луоз!
Люба кылъёс но уг шедьты ни. Мудорысь сукыр пересь кышно шоры учке-учке но чупа, шораз тэльмырись синъёсын выльысь учке.

Со вие коркалэн мукет сэрегысьтыз мырдэм кылӥськиз мумизлэн ваземез:

— Любие, ӵаж-ӵаж кезьыт ву юысал — быдэс пушкы ӝуа.

Дыды ас пельёсызлы нырысь-валысь ӧз ик оскы кадь. Анаез быдэс нунал ӵоже нырысьсэ маке куриз! Сиён-юонэн котыраз матэктыны ӧз лэзьы вал ай — зынызлэсь ик, пе, ӧскем потэ. Нош табере ву куре! Ма кызьы уз сёты? Али ик!

Люба пукон интыысьтыз шуак ишкалскиз. Ӧжытак ӝегаз ке, анаезлэн мылкыдыз воштӥськоз но, вузэ но уз веръя ни, кожаз со. Кезьыт вуэн кранэз усьтыны кутскиз но — уг вормы. Отысь вуэз пичи шапыкъёсын ялан ӟызыра но мисьтӥськон борды йыгаське шуыса, атаез ӵукна зол-зол позыртэм, лэся. Анаез ӝытаз кеськиз вал: ворсалэ ни со кранэз — пельме вандэ. Люба виясь вулэсь йыгамзэ сокем ик ӧз но кылы кадь. Нош висись муртлэн котькуд куара пушказ чидантэм шуккиське, лэся.

Люба кияз ӵушкон кутӥз. Вентиль борды юн-юн кырмиськиз. Пичи киосысьтыз вирсэръёсыз ик пилиськымон пульдылӥзы. Бамъёсыз гордэктӥзы. Туж секыт ужез быдэстэм бере кадь. Ярано, кранэз мырдэм сётӥськиз. Но дыртыку дыр котьку каллен ортче кадь потэ ук. Любалэн но вулэсь виямзэ возьманы чиданэз быриське вал.

— Ӝоггес тырмы ни! — куаретӥз со.

Ачиз мыня. Кытын ке йырсазяз шудэ малпан: озьыен, Матрона апай вань ик, кылӥз монэ.
Анаез доры бызьыса вуыкуз, ӵашаысьтыз ӝыныез сямен вуэз палькаськыса бырем. Аслэсьтыз шок-пуль шокамзэ но буйгатэмез уг луы.

Анаез ӝутӥськыны турттэ вал, но йырзэ но миндэр бордысь рос-прос ишкалтыны ӧз вормы.

— Юртты ай, нылы, — вазиз со дыдылы.

Нош кытысь пичи муртлэн ӟигарыз ай! Анаез висеменыз лы но ку кылемын ке но, Люба йырзэ но солэсь ӝутыны мырдэм вормиз. Эшшо ке пал киын ымдураз возёно вуэн ӵашаез. Озьы но, тазьы но пырскиз Люба анаезлы ву сётыны, нокызьы ӧз вормы. Гадьзэ гинэ мумизлэсь коттӥз.

— Малы гинэ тонэ вордӥ — ву но сётыны уд быгатӥськы! — лулӟиз анаез но йырзэ борддор пала берыктӥз. Со адӟытэк ик кылиз нылызлэсь синвуоссэ. Дыдылэн ымдуръёсыз куалекъяло. Анайзэ маялтэмез потэ. Но дӥсьтонэз уг тырмы. Кыштыр потӥз комнатаысь.

Нылашлэн ассэ ачиз таӵе янгышен ноку шӧдылэмез ӧй вал на кадь. Ӟеч улыкузы на, тэркыез уськытыса пилемез бере но, сокем ӧз куректы вал. Нош али ассэ ачиз карга: огпол гинэ куриз, со куронзэ но ӧй быдэсты…
Собере син шораз шуак йӧтӥз Матроналэн мудорез. Сое Люба нош ик бордаз ӝиптӥз. Озьы ӟыгыръятозяз йыраз чилектӥз малпан: мон тынэсьтыд тустэ пужыятӥ ке, анае йӧналоз. Кытысь ке кылӥз уго: Матроналэсь туссэ пужыятоно но рамае пононо, вӧсятоно. Соку, пе, тонэ утьыны кутскоз.

Люба олокытысь пӧртэм буёло сӥньысъёс поттӥз, тӧдьы кышетсэ кесяз. Ӝоггес пужы пуктӥз ке, анаез чальгес йӧналоз кожаз, лэся. Веньзэ бышкалтэмез бере гинэ валаз: кызьы тус пуктыны уг тоды. Аслыз ачиз йырыз курен, зар-зар бќрдӥз. Бӧрдэменыз катьтэммиз но умме усиз.

Сайкакуз ӝомал усе ни вал. Кылӥз: сиён пӧзьтон палан кин ке тусьты-пуньыен колтыртэ. Нылаш валесысьтыз тэтчемзэ ик ӧз вала. Учке но — анаез плита котырын берга. Кышет но керттэм, айшет но ошем. Неужто ваньзэ тае Люби вӧтаз гинэ? Оло, али но изе на?..

Елена Сараматова
Туспуктэмез: skill.ru

Удмурт Дунне
By Удмурт Дунне Октябрь 21, 2013 14:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<