Рядовой Кузьмин

Удмурт Дунне
By Удмурт Дунне 29 октября, 2013 15:14

Рядовой Кузьмин

С. Кузьмин

С. Кузьмин

Степан Кузьмин — агроэколог, йылпумъяз Ижысь гурт удысъя академиез. Дышетскемез бере кӧня ке толэзь ужаз Шаркан ёросысь «Восход» хозяйствоын агрономын, собере армие кошкиз.

Туэ ноябрь пумын Степан бертоз ни. Службазэ ортче Мурманск улосысь Мончегорск городын. Армие кошкемез бере нырысетӥ толэзьёсаз анай-атаезлы, братъёсызлы удмурт кылын туж шунытэсь но тунсыко гожтэтъёс лэзьяз. Али кусып возе телефон пыр. Дэмласьком тодматскыны гожтэтъёсысьтыз чуръёсын (сётћськом вакчиятыса).

«Нештатной» парикмахер

15.12.2012
Мончегорск карын уй но, нунал но пеймыт улэ. 11-ысен 16 часозь — ӝомо-югдо, отӥяз пеймыт луэ. Омырез татын пӧртэмгес, кислородэз уггес окмы, но солы дыши ини.

Ӵукнаысен ӝытозь дышето военной ужлы, конспектъёс гожъяса улӥськом, присягалы дасяськиськом. 23-тӥ толсуре присягамы луоз, собере подразделениосы ысъялозы. Татын куинь подразделение: связь, автотехникая батальон но охраная батальон. Монэ охранае кутыны малпало вал, связе куриськи, кезьыт уйёсы караулын улэме ӧз поты. БАТО-ысь солдатъёс ӵем санчастьын кыллё, шуизы.

17.12.2012
Сюдыны умой сюдо, нуналлы куинь пол. Урод соиз гинэ: ум бызьылӥське, кышкало, усьылом, пыд-суйёсмес чигтылом шуыса, сюресъёс вылын йӧвалег, маршировать карыны но уг луы, ваньзы усьыло.

Шутэтскон нуналъёсы строен ветлӥськом магазинэ, собере люкаськыса вань басьтэммес сииськом. Субботае луэ ПХД (парково-хозяйственный день) — куинь час казармаез миськиськом. Пятницае мунчое ветлӥськом, дӥськутмес воштӥськом. Арняе телевизор азьын кино учкиськом, телефон сётэмзы бере жингыртылӥськом.

Мон али «нештатной» парикмахер — гвардии рядовой Кузьмин. Солдатъёсты но офицеръёсты ӵышкылӥсько. Ваньзылы яра, соин бордазыгес воземзы потэ. Старослужащийёс монэным умой верасько, помелоен (лимонлэн но грейпрфрутлэн гибридзы) сюдо, апельсин, шоколад сёто, аслам призывысьтым пиос конфетъёс, печенняос вайыло. Ческытсэ сиеме уг поты, сётэмзэс но ваньзэ уг сииськы — люкисько. Эшъёсы уй но, нунал но дась конфетъёсты йырйыны.

18.12.2012
Куремзыя ваньзэ умой лэсьтӥсько, ваньзэ вуисько. «Подъём!» кеськемзы бере 45 секунд куспын быдэс дӥсяськоно но берцы (пыдкутчан — ред.) кутчано. Ӝыныез вуэ, ӝыныез уг. Мон вуисько, милемды асьмелэсь ужъёсмес лэсьтыны косо, кин уг вуы, соосты пумозяз ӝутъяло.

19-тӥ толсуре полигонэ ветлом автоматэн ыбылӥськыны. Присягамы 22-тӥ толсуре луоз. Офицеръёслэн монэ охранае пуктэмзы потэ, присяга бере ваньмыз тодмо луоз.

Казармаямы куинь арня милесьтым азьло нырысетӥ взвод вуэмын. Соос лыктӥллям Муромысь (Мурманскысь — ред.) но Вӧсьбуро Петыркарысь (Санкт-Петербургысь — ред.). Соосын мон ӝог эшъяськи. Асьмелэн взводысьтымы но ваньмыныз кусыпъёсмы умоесь, нош сямзы уг яра: стройын вераськыса сыло, столовойын, озьы ик отбой бере но зулё, ог-огдэ гажанзы ӧвӧл. Огез вераське ке, быдэс взводэз курадӟыто, озьы но уг валало. Конспект гожъяку, карамель сюпсё, бумагаен ӵаштырто. Соосын сэрен ваньмес приседание лэсьтыто, тумошо. Йыртэмась сылэ но лыдъя, кӧня пол пуксёмы шуыса. Ми солы ваньмы ӵош тау шуиськом: «Спасибо, Строкин». Со шуэ: «Я думал, так и надо».

Служитьтыны яра, дыр ӝог ортче, толэзь луэ ини. Матысь эшъёсы — грузин но китаец. Грузинлэн мамаез Дэбесысь — удмурт, папаез — грузин. Китаец — Завьял ёросысь. Песятаез Китайысь, песянаез ӟуч, атаез ӟуч, анаез удмурт, ачиз ӟуч луэ. Фамилиез Лю.

20.12.2012
Охранае ик кутыны малпазы. Котькуд ӵукна повышенной тренировкаос луозы, быдэс нунал автоматъёсын ветлом. Связьын сыӵе зол уг тренироватьто. Дас тямыс адями пӧлысь отчы витьсэ куто.

Ижысь Муроме куамын кузя вуим, дас кыксэ ыстӥзы Североморске, дас тямыссэ — Мончегорске.

23.12.2012
Ваньмыз умой, армилы дыши. Уг висиськы, нунал понна ӝыны йыр сугон сиисько, туж яра — пинь улын кроч-кроч вазе.

Охранаын нарядъёсы сутка ортчыса ветлоно луоз. Солы но дышо, малы ке шуоно, уйин кӧлэме уг поты.

24.12.2012
Туннэ распределение вал. Охраная ротае шеди. Уставез дышетыны косӥзы: 19 статья но дежурнойёслэсь обязанностьёссэс.

12-тӥ толшоре «День солнца» луоз, полярной уй бере нырысьсэ шунды потэ.

Ӵошатсконъёслы дась
Жингыртылыны ӵем уг быгаты, роталэн кивалтӥсез телефонме басьтӥз. Шутэтскон нуналъёсы гинэ со сётъяськыны кулэ, шуиз.

Мон понна эн сюлмаське, ваньмыз пӧрме. Пӧртэм ӵошатсконъёсы пыриськыны тыршисько, 24-тӥ тулыспалэ гира љутъянын нырысетӥ инты басьтӥ, дасяськытэк но быгатӥ вормыны. Частьмылэн кивалтӥсез киме кутылӥз, «молодец» шуиз. Мукет нуналаз туж зол виси, киосме ӝутъяны уг быгатӥськы ни вал. Вуоно арняе «физо» луоз, шуизы: 100 метре, 1000 метре бызьылон, ӝутъяськон но граната зӥръян. Соослы ваньмызлы дась.

Званиос милемлы уз сётъялэ. Кызьы рядовоен вуим, озьы ик кошкомы. Контрактъя служитьтӥсьёс вань интыосы быръемын ни. Срочной службаын 33 адями, контрактникъёс 16 кузя.

Шунды нуналысь нуналэ вылэ но вылэ ӝутске, 8 час котырын югыт луэ ини, нош ӝыт 7 час котырын — пеймыт.
Уг висиськы. Быдэс йыр сугон но горчица нуназе сиылӥсько, синвуосы потытозям. Ӝыт котьку чорыг сёто, дыр ортчыса, адӟеме но уз поты ни сое.

Бронежилет секыт вылэм
5-тӥ оштолэзе караулэ допуск басьтӥ но 13-тӥ оштолэзе нырысетӥ караулэ ветлӥ. Кык час сылӥ постын, собере караульной помещениын кык час шутэтски на. Отын мон 15 минут гинэ кӧлыны быгатӥ. Собере нош постэ мынӥ. Мыным секыт бронежилет сётӥзы. Туж жади соин кык час ветлыны, пельпумъёсме пачкатэ. Бронежилетъёсмы вужесь, соос пельпумын гинэ возисько. Ротаын тревога дыръя дӥсялляськом выльёссэ, соос секытэсь ке но, туж умой возисько, пельпумтӥ кутӥсько но кустӥ золтӥсько.

Монэ машинаен но ветлыны лэзизы. Гожтэт гожтӥсько 15-тӥ оштолэзе, укно сьӧрын лымыя, ЗИЛ-лэсь укнозэ ик соге — сюресэз но адӟыны уг луы. Караулэ сюрес дэриесь но лёго-гопо луиз. Машинаез туж шуг отӥ нуыны, моторез быректыны малпа. Куазь 2-3 градус шуныт улэ. Лымы шунамъя пӧртэм будосъёс пото, туж трос кудымульыез, ягмульыез. Гужем шутэтскон нуналъёсы соосты окто-сиё, гуртэ но, оло, ысто. Изъёс татын пӧртэмесь адско, музъем луоё, ӝуйы гинэ будэ.

Эше — машина
4-тӥ куартолэзе дӥсям гужем нуллон дӥсь, сапегъёс интые, берцыосмес берыктӥзы. Но куазь гужем кадь ӧвӧлы. Нуназе 5-9 градус шуныт возиське, ӝытлы 0-лэсь улэ лэзиське. Ӵем зоре но лымыя, куддыр ӵош кисьтэ…
Ньылетӥ арнязэ ворт-тылӥсько машинаен. Зол уг жадиськы, окмымон кӧлӥсько, куддыр вазьгес но султӥсько. Нуназе кӧлэме уг поты, яке машинаме лэсьтӥсько, яке книга лыдӟисько, яке гожтэт гожтӥсько, ужтэк уг пукиськы. Сиськонниын, караулэ сиён нуыны дасякум, пӧрасьёс ческытгес сюдыны выро, сӥль ятыргес сётозы яке котлет понозы, напчытэм йӧл но кык пуньы поно. Куддыр ачим ваньзэ тырисько, кӧня сиыны быгато. Со понна соослы юрттоно луэ: мискаоссэс ӝутъяно-нуллоно яке пӧсь ву ворттоно. Озьы сиськыса но, секталае 76 килограмм возиське.

7-тӥ куартолэзе ветлӥмы Быдӟым Вормонлы сӥзем концертэ. Шулдыр эктӥзы, кырӟазы, нош милям Быгиын эктӥсьёсмы дорозь соослы кыдёкын ай.

Азьло ворттылӥсез тыро-пыдо уг вала вылэм машинаез, мыным солэсь бервылзэ тупатъяно луэ. Офицеръёс бордам пуксё ке, паймо, кыӵе воштӥськиз машина. Куараез, пе, чалмыт луиз, сюрес вылтӥ лякыт мынэ, ӝог кыске, тӧлпери кадь лоба, небыт луиз пукыны. Трос дыр куре машинае, уно тупатоно ай. Куазь умой ке, котыраз бергасько, уродме ке, лыдӟиськисько, кызьы но мазэ лэсьтоно. Ожгар машина огшорыезлэсь туж пӧртэм.

Уйёсмы татын ӧвӧл ни, югыт улэ, шунды пуксьылэмысь но дугдэ ини.

Толйись пушмульы
Служить кареме дырысен куатетӥез толэзь мынэ ни. Куартолэзьлэн пумаз адӟылонтэм пӧсь улӥз, 28 градусозь ӝутъяськылӥз. Гольык писпуос куинь нунал куспын куаръяськизы. Лудкечъёс тол дӥсьсэс но воштыны ӧз вуэ, вож куакъёс пӧлын тӧдьы гонзы чильпыраз. Дас нунал ортчыса, быдэсак куренесь вал ини, пыдъёссы гинэ югыт пишто на.

Пӧсь куазьлэсь нымыос сайказы. Туж трос лобало, югытэн ёрмоно — татын пеймыт но уг луылы, котьку шунды пиштэ. Караульной азбаре потыны гинэ вуиськод — котырак лякисько. Лобыкузы ик мугоре мертчо. Туж ярато йырбере пуксьылыны, куэз-а, мар-а небытгес?

Бигерстанысь 14 егитъёсты вайизы, дышето соосты армиын улон-вылонлы. 20-тӥ инвожое 40 адями вуоз Башкортостанысь. Витиськом, ку соосты ми доры ыстозы. Пересьёсыз али кошкыло ини. Ми, мӧйыосыз, 17 кузя кылёмы.

19-тӥ инвожое 100 нунал кылёз, приказ потытозь. Со дыр туж ӝог ортчыны кулэ. Эшъёсын мӧзмыт ӧвӧл, шедьтӥськомы ма сярысь вераськыны, ужантэм дырмы но ӵем уг луылы.

Гожтэтэ борды ымныр суредме понӥ, медад вунэтэ шуыса, оло, мукет ымнырме адӟоды.

Посылкадэс басьтӥ. Куасьтэм пушмульыосты туж ческытэн сиим. Эшъёсме пӧяй, гуртамы пушмульымы вуиз шуыса: таӵе озимой сортсэ мерттӥм, пӧй. Оскизы, уг тодо угось, кытын удмурт калык улэ.

Удмурт Дунне
By Удмурт Дунне 29 октября, 2013 15:14
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<