«Оскисько аслым ачим»

Удмурт Дунне
By Удмурт Дунне 14 октября, 2013 15:02

«Оскисько аслым ачим»

А. Красильников

А. Красильников

13-тӥ коньывуонэ Алексей Красильниковлы тырмысал 59 арес. Алексей Геннадьевич вал филология наукаосъя кандидат, философия наукаосъя доктор, Кун Кенешлэн куинь созываз депутатэ бырйылэмын, кивалтӥз Наукая, дышетонъя, культурая но егитъёсын ужан политикая ялан ужась комиссиен.

Алнашын
Алексеен секытэн дыръяз мамаез Зинаида Степановна нылпи вайыны вордскем гуртаз Кез районысь Сюрзие бертӥз.

Кенакме но Алёшаез Алнаше вайыны кошки. Кезысен Можгаозь поездын мынытозямы, вож нуны ялан бӧрдӥз, мамаезлэсь нонызэ но уг басьты, ӟигарыз ик быремын ини. Нош Можгаысен Алнашозь нокыӵе автобусъёс уг ветло, 30 иськем сюресэз пичи нуныен кызьы ке но мыноно. Куазь кезьыт, лымыя. Одӥг пиосмурт жаляз милемыз, пуктӥз «ГАЗике» но шуиз: пиналды кулоно луиз ке, мон со понна кыл уг куты. Нош ик быдэс сюресэз нунымы бӧрдӥз. Алнашын ини буйгазгес: валаз, лэся, вуиз песятайёсызлэн-песянайёсызлэн музъемзы вылэ.

Ох и бӧрдӥсь вал Алёша! Агае, удмурт писатель Геннадий Красильников, со пумысен дневниказ но гожтӥз: визьтэм ай, пе, но котьма ке но али мед бӧрдоз, будыса синвуаськытозь… Вакчи дыр ӵоже улытозяз, Алексейлэн вал пӧртэм вакытъёсыз. Бӧрдонэз но.

Алнашын Алёша улӥз, школае мынытозяз. Кык аресказ гужем ми сое ыштылӥм. Мамаез больницаысь нуназеяны бертылыкуз, пияш сьӧраз кошкем, нош таиз уг адӟы. Больницамы нюлэскы пуксемын, шур вамен потоно. Анаез ужаз кошке, нош пиез — нюлэскы. Кытысь но ми сое ӧм утчалэ: шур дурысь, куйы-ысь, вань урамъёсысь… Нокытын но ӧвӧл. Ӝыт акшан вакытэ шедиз.

Геннадий Дмитриевич но Николай Байтеряков нюлэскы губияны мынӥллям, ял карыса пукыкузы, тэшкылиез адӟиллям. Паймиллям: малы сыӵе пичи адями нюлэскытӥ, пе, ветлэ? Матэгес вуэмез бере агае пизэ тодмам. Озьы пичи пимы улэп кылиз.

Котьмаин тунсыкъяськиз со: ракатаосты — кисло-куслоосты — кутылэ вал шурысь, куалемъёс но бичалляз, возь вылысь курыт гумы но нуллӥз, льӧмпуосы но тубалляз, холодильнике но пытсаськылӥз.

Алнаш школаысь нырысетӥ классэ мон сое, китӥз кутыса, нуи — анай-атаез кошкемын вал шутэтскыны. Кыкетӥ классэ дышетскыны мынӥз ини Ижевске — Геннадий Красильниковез Удмуртиысь Писательёслэн огазеяськонзылы кивалтӥсе бырйизы. Ижевскын школаын дышетскемзэ мон ӧй адӟы ни, куспамы вис луиз.

Ижын
Алексей йылпумъяз Удмурт кун университетысь романо-германской филологияя факультетэз. Ленинградысь аспирантураез быдтэмез бере 1981-тӥ арын нош ик кусыпмы герӟаськиз. Удмурт кун университетысь филологияя факультетын кунсьӧр литературая лекциос лыдӟиз студентъёслы — диссертацизэ утиз англи литературая. Мон солэсь оломар сярысь но юалляськылӥ, валэктонъёссэ гожъяса кельтылӥ. Кылсярысь, таџе вакчи интервью пќрмиз Алексейлы 27 арес дыръя.
— Кызьы ке удмурт студентъёслы юрттэмед луэ-а?
— Удмуртъёсыз мон поддержать карыны турттӥсько — экзаменэ лыкто ке, удмурт сямен юасько. Удмурт кылэз тодэ ке, ляб дышетскисьлы но «2» уг пуктӥськы ни.
— Со валалоз-а тынэсьтыд ӟечтэ?
— Али уз. Куке но валалоз: удмурт кылэз тодӥськод ке, ӝуто на шуыса.
— Озьы гинэ уд быгаты ни удмуртъёсыз ӝутыны.
— Америкаысь писатель Джон О’Хара гожтӥз книга «Дело Локвудов». Огзылы огзы ужзэс кельто вал быдэс династиос. Но одӥгезлэн пиез ӧз вала атайзэ, кошкиз мукет штатэ. Нош отын, ачиз но валатэк, выльысь атаезлэсь ужзэ азьланьтӥз. Озьыен, вираз пыӵамын ини со уж, кудзэ лэсьтӥзы песятайёс, атайёс.
— Алёша, мынам атае, тынад песятаед Дмитрий Иванович, туж кибашлы вал. Оломар но лэсьтыны быгатылӥз: ведра, карнан, куасъёс, дӧдьыос… Мар шуод со сярысь?
— Мынам но мар но со пӧрме, тётя Маня, сад-бакчаям ачим веранда лэсьтӥсько, ачим ик радио пыртӥсько. Мама пайме, кызьы-озьы тынад пӧрме шуыса. Кытӥяз ачим но паймисько. Озьыен, песятайёслэн-песянайёслэн быгатонлыксы асьме борды кыле.
Сяськалэсь чеберзэ валалоз сяська будэтӥсь гинэ. Нош мукетыз сое лёгаса но кошкоз. Сяська будэтӥсьёс трос-а? Ӧвӧл. Озьы ик адямилэсь мылкыдзэ, сюлэмзэ, малпанзэ валалоз кӧня ке мурт гинэ, нош мукетъёсыз, асьсэды гинэ тодыса, улозы тросгес арбери, сиён-юон шедьтон понна… Котырам но сыӵеос вань.

1995-тӥ-1996-тӥ аръёсы
— Коммунист ӧй луысалыд ке, депутатэ сюрысалыд-а?
— Ӧй, дыр.
— Атаедлэн данэз, фамилиез, маиз ке но юрттэ-а улонад?
— Туж ик уг. Кытӥяз мон солэн пиез шуисько ке, «а-а, ну, валамон», шуо.
— Адямилы визь кин яке мар сётэ? Анай-атай-а, Инмар-а, трос лыдӟиськем-а?
— Ваньмыз ӵош.
— Удмурт калыклэн мар уродэз син шорад йӧтэ?
— Удмуртъёс огзэс огзы йыръё, сиё, быдто.
— Дышетсконлэн, тодон-валанлэн дунъетэз воксё быре кадь ини. Коньдонтэм адямиос быгатозы-а азьланяз дышетскыны, йӧнатскыны?
— Улыса адӟом ини.
— Гурт калык туж трос юыны кутскиз. Юонэз ӧжытгес карыны, кулэстыны быгатомы на меда?
— Уг тодӥськы.
— Вӧсяськисьёслы тынад кыӵе мылкыдыд?
— Котькуд калыклэн аслаз Инмарез.
— Кыӵе мылкыдын пыриськод Кун Кенешлэн сессияз, юртъер азьын калык пӧртэм куронъёсын, лозунгъёсын сылэ ке?
— Секыт мылкыдын. Быректэм вуэн пылатэм кадь.
— Та вакытэ депутат луыны кышкыт ӧвӧл-а? Тон али туж адӟымон адями, сыӵеоссэ ведь синйылтыса возё тушмонъёс но.
— Тушмонъёсы мынам трос.
— Визьмоесь-а, золэсь-а калыкен быръем депутатъёс?
— Котькыӵеез вань.
— Кун Кенешен кутэм котькуд ужпумен соглаш уд луиськы, дыр? Трос-а сыӵе учыръёс?
— Ӧжыт ӧвӧл.
— Законъёс гожтон, сое кутон удысын адями чурыт луыны кулэ: аслад малпанэд вылын пумозяз сылоно. Тынад вань-а сыӵе быгатонлыкед?
— Вань кадь.
— Семьяед, кышноед морально юртто-а улонад?
— Секыт юан сётӥськод…Адӟем карымонэз трос, но…
— Оскиськод-а котырад ужасьёслы? Соос тонэ уз вузалэ-а?
— Мон соосыз ачимъя бырйисько.
— Вань-а кивалтӥсе дышетскон школады, кытын дышето кунэн кивалтыны?
— Мон солы Москваын дышетскисько.
— Журналистъёсыз кыӵе интые пуктӥськод? Соос золэсь-а Удмуртиын?
— Вань соос, но ӧжыт.
— Тодосчиос юртто-а ужады? Кыӵе удысын самой зол тодосчиосмы?
— Сыӵеос туж ӧжыт.
— Марлы тон оскиськод та дунне вылын: Инмарлы, эксэйлы, Президентлы?
— Аслым ачим.
— Калыкез азьвыл «винтик», «болтик» шуо вал, кызьы учкиськод калык шоры?
— Калыктэк улон но ӧвӧл.
— Мар карысалыд удмуртъёс понна, сыӵе луонлык сётысалзы ке?
— Удмуртъёсыз визьлы дышетысал.
— Удмурт кылын шонер гожъяськонъя но нимкылъёсъя комиссия кылдытӥзы. Тросэз выль кылъёс калыклы уг кельшо (элькун, кат, куншет). Пыӵалозы-а вераськонэ сыӵе выль кылъёс?
— Пыӵалозы.
— Уд жаляськы-а, удмурт вордӥськид шуыса?
— Уг. Анай-атаез уг быръё.
— Удмурт луэмысьтыд, куке но ултӥямзы вань-а?
— Вань. Но мон уг сётскиськы.
— Компартиез пож вуэн кисьтало. Куке но коммунистъёс вормозы-а?
— Шуг вераны.

2001-тӥ арын
6-тӥ ноябрь
— Кылъёс сярысь закон кутэмын луоз-а?
— Луоз.
— Кыӵе тазалыкед?
— Грипплы пумит российской эмъюмен укол пуктӥ но куинетӥ арнязэ туж зол кызӥсько, зырым вия. Нош азьло кык арзэ импортной уколъёс пуктылӥ — номыр но ӧй вал.
— Озьыен, тон копак импортной луэмед ини?
Серекъя.

Берпуметӥ аръёс
Кун Кенешысь кошкемез бере Алексей Красильников 9 толэзь ужтэк улӥз. Туж куректӥз, со нокинлы кулэ ӧвӧл шуыса. Кылъя, историяя но литературая Удмурт институтэн валтэмез потэ вал. Ӧз пуктэ. Дышетӥсьёслэсь тодон-валанзэс будэтонъя институтэн кивалтыны дэмламзы бере жингыртӥз.

— Тётя Маня, та институт мон понна хоспис. Мылкыд секыт, но мар карод, мыно. Ужтэк улэменым, поджелудочное висьыны кутскиз ини.

Та институтын мон аслым ачим Суриковлэн суредысьтыз Меншиков кадь потӥсько: со Пётр Первыйлэн самой матысь юрттӥсез вал, озьы ке но эксэй сое келяз Сибире. Пуке со, кызьпуос шоры учкыса, котыраз — нылъёсыз. Меншиковлэн учкемез сыӵе мӧзмыт…

Мария Ишматова

Удмурт Дунне
By Удмурт Дунне 14 октября, 2013 15:02