Малпаськемзэс дунъязы

Удмурт Дунне
By Удмурт Дунне Октябрь 24, 2013 14:31
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Малпаськемзэс дунъязы

"Малпа выль кыл!" вожвылъяськонлы йылпумъянъёс лэсьтэмын

«Малпа выль кыл!» вожвылъяськонлы йылпумъянъёс лэсьтэмын

Туэ тулыс МУШ ужан огин, «Удмуртлык» дэменлык но егитъёслэн «Шунды» огазеяськонзы «Малпа выль кыл!» конкурс ялӥзы, нош 21-тӥ коньывуонэ «Перепечкин» кафеын солы йылпумъянъёс лэсьтӥзы.

Тодады вайытом: ӵошатскон быдэсак ортчиз вотэсын. Нырысетӥ люкетаз пыриськыны быгатӥз котькуд мылкыд карись, со понна солы 44 ӟуч но кунгожсьӧр (тросгес англи) кылъёслы удмурт аналог шедьтоно вал. Вожвылъяськонлэн кыкетӥ люкетаз вань мылкыд карисьёс дунъязы выль малпам кылъёсты, соосын ӵош кылъёсыз дунъяз нимысьтыз жюри но. Виктор Шибанов, Александр Шкляев, Сергей Максимов но Ярослава Шараева эскеризы кылъёсыз вераськонын, гожъяськонын кутон, кылдэмзы ласянь. Дунъясьёслэн но куара сётӥсьёслэн балъёссы бӧрысь огазе вуттэмын вал.

Вожвылъяськонэ пыриськисьёс утчазы удмурт аналогъёс «инновационный», «ассортимент», «потребитель», «общественное мнение», публичный», «приватный», «собеседование» но мукет кылъёслы (ваньзэ шедьтыны луоз Вконтакте сайтысь vk.com/malpavylkyl группаысь). Тунсыко: огшоры калыклэн но жюрилэн дунъетъёссы воксё пӧртэмесь. Кылсярысь, «инновационной» кыллы тупасен жюри лыдъяз «выльдӥнё» кылэз, нош куара сётонэ пыриськемъёс — «выльлыко». «Общественность» кыллы сётэм аналогъёс пӧлысь дунъясьёс бырйизы «меркалыкез», нош вотэсын куара сётӥсьёс — «мерлыкез». «Собеседование» кыллы, жюри малпамъя, тупа «юанвераськон», калык малпамъя — «вачевераськон».

— Берыктон понна быръемын вал кунгож сьӧрысь пырем, удмурт кылэ пыӵамтэ кылъёс. Тросэз соос ӟуч кыл понна но вылесь на. Куд-огезлы соос пӧлысь туж капчи удмурт аналог шедьтыны. «Собеседование» яке «вакансия» кыл удмуртэ выжыяськизы ни ке но, соослы удмурт вариант малпаны секыт ӧвӧл. Кин тодэ, оло, ӵапак али малпам кылъёс вераськонамы пырозы? Оглом соос умой малпамын, та сярысь тодосчиос но веразы, — шуэ Артём Малых, «Малпа выль кыл!» конкурсэз радъясь.

Чошатсконэ пыриськиз 21 мурт. Котькудӥзлы соос пӧлысь радъясьёс нимысьтыз кузьымъёс дасязы: уксё, удмурт шӧмо футболкаос, пӧртэм книгаос, «Перепечкин» кафелэсь сертификатъёссэ но дисконтной карточкаоссэ, «Малпа выль кыл!» ӵошатсконлэн логотипеныз магнитъёс но конкурсэ пыриськем понна сӥлы карон кагазъёс. Нимысьтыз кузьым дасям на дунъясь Сергей Максимов но егитъёслэн «Шунды» огазеяськонзы. Нош вормисьёсын лыдъямын Эстониын дышетскись Анатолий Мурзин (674,5 балл), Татарстанысь Кукмор ёросын улӥсь Наталья Михайлова (639,5 балл) но Удмурт кун университетын дышетскись Лукерья Шихова (485,5 балл).

Выль кылъёс пумысен пӧртэм малпанъёс вань. Кин ке шуоз: кыл уг выльдӥськы ке, озьыен, солэн азьланез ӧвӧл. Мукетыз пумитаз вазёз, татчыозь кызьы ке возиськиз бере, азьланяз но улоз шуыса. Котькинлэн аслаз малпанэз луыны быгатэ, нош удмурт егитъёс со малпанзэс ӵошатсокон пыр шара веразы.

— Асьмеос малпам кылъёсмес вераськонын кутӥмы ке, агитацимы умой луиз ке, оскисько, ог 15-20 кыл удмуртэ пыӵалоз шуыса. Осконтэм кадь? Нош тодэ ваёно ке «огин» кылэз, со 2 ар пала талэсь азьло малпамын вал, нош али егитъёслэн кылазы ӵем пумиське ни, — вера Артём Малых. — Пусйытэк уг луы тазэ но: ми али кылдӥсь кылъёсты берыктыны тыршиськом но валаськом, «чайниклы» выль удмурт нимкыл кылдытон — удмурт кыллы пумит мынон шуыса.

Оскем потэ, нимо-дано тодосчиос та вожвылъяськонэз шудонэн яке дыр быдтонэн уз лыдъялэ шуыса. Тодмо ӧвӧл ай, «дугдылонни» яке «вачевераськон» кыламы пыӵалоз.

***
Тунсыко луысал на, дыр, радъяны ӵошатскон кыллэн шонер гожтӥськемезъя, малы ке шуоно али гинэ дышид кадь кыӵе ке кыллэн гожтӥськемезлы, нош мукет кыллюкаме сое мукет сямен гожтыса пыртӥллям ни. Трос юанъёс кылдо 2008-тӥ арын потэм «Удмурт-ӟуч кыллюкамысь» куд-ог кылъёс пумысен но. Кылсярысь, кызьы гожтысалды «Отечество, Отчизна» кылэз? Мон «Атыкай музъем» шуысал (дыши ни со вариантлы), нош кыллюкаме со «Атыкаймузъем» гожтэмын. Школаын дышетскыкум, «мухомор» «кут кулон губи» вал, нош али — «куткулонгуби». Соин валче шуг-секытъёс кылдо кыллюкамъёсыз Интернетэ интыяку но.

— Шонер гожъяськонэз эскерись программаос лэсьтыку, дышем сямъя 2 файл кылдыто, куддыр — тросгес. Одӥгаз файлэ интыяло кылъёслэсь начальной формаоссэс, шуом, существительнойёсыз, глаголъёсыз. Мукетаз — котькуд кыллэсь парадигмаоссэ (коркам-коркад-корказ но мукет), — вера Сыктывкарысь программист, Инновационной кыл технологиосъя центрын ужась Андрей Чемышев. — Удмурт электрон спеллер (гожъяськонэз эскерись программа) куд-ог кылъёсыз уг вала, соосын йырин шугъяськонъёс кылдо: яке со кылъёс кыллюкамын янгышен гожтэмын, яке спеллерамы (со пыкиське газет-журналъёсысь текстъёссы вылэ) пыртэмын ӧвӧл.

Ӟуч кылъёслэн гожъяськемзы уг вошъяськы, милям ке — вошъяське. Маин со герӟаськемын? Арбериос дыр ортчемъя уг воштӥсько ук…

Елена Рябина
Туспуктӥз Алексей Шкляев

Удмурт Дунне
By Удмурт Дунне Октябрь 24, 2013 14:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<