Кытын кунолы шумпото?

Удмурт Дунне
By Удмурт Дунне 18 октября, 2013 17:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Баба-Яга пумита куноосты Грак ёросын

Баба-Яга пумита куноосты Грак ёросын

Лыдпусъёс возьмато: кылем ар ӵоже Удмуртие вуылэмын кунгож сьӧрысь 3 сюрслэсь ятыр но Россиысь 200 сюрс пала куноос. Туризмлэн азинскемез сярысь вераз Мугорез кыдатон культурая, спортъя но туризмъя министерствоысь валтӥсь специалист-эксперт Гузель Касимова.

Туризмез шаерысьтымы спорткомитетлэн бурд улаз пыртӥзы 2009-тӥ арын. Со вакытлы Россия Федерациын туризмез азинтонъя нимысьтыз программа кутэмын вал. Табере сыӵе программа Удмуртиын но кылдытэмын.
Ачиз инкуазь но шаеренымы тодматыны луонлык сётэ. Удмуртиын 49 пумо пӧйшуръёс, 190 пумо тылобурдоос, 42 пумо чорыгъёс уло. Тужгес трос койыкъёс, кырпарсьёс но лудкечъёс. Пӧйшураны яратӥсьёс арлы быдэ 70-80 пала гондыръёсты погырто. Россиысь одӥг интыын гинэ — Удмуртиысь Сьӧлта ёросын — западносибирской выжыысь пуныосты вордо.

— Тужгес тунсыко экскурсиос Удмуртиысь нимо-дано адямиосын герӟаськемын: «Ижевск — оружейникъёслэн городзы», «Г. Кулакова — спортысь легенда», — шуиз Гузель Касимова. — Со сяна, куноос тодматско П. Чайковский композиторлэн музей юртэныз, Лудорвайысь музей-заповедникен но мукет интыосын. Эграос но дэбесъёс данъясько Лӧпшо Педунен но Сибирь трактэн, Балезино ёросын ужало «Одӥг нунал Кестым гуртын» но «Бесерманъёслэн ватоссы», Глаз ёросын «Государьлэн сюресэз», «Куное — уйпал удмуртъёс доры» но трос мукет экскурсиос. Али котькуд ёросын тунсыко маршрутъёс кылдытэмын. Берло аръёс куспын тужгес но трос калык вуэ Шаркан ёросысь Тол бабай доры. Грак ёросысь Яга песянай но куноослы тунсыко луэ.
Туннэ нуналлы шаерамы лыктэм куноосты вань маин тодматыны но кытын куноятыны. Туристъёс понна 2 сюрс 500 пала нимысьтыз объектъёс кылдытэмын: 150 пала гостиницаос но шутэтскон базаос, 32 музейёс, 2 сюрс пала синпелетъёс, 15-лэсь ятыр мугор кыдатон комплексъёс но мукетъёсыз. Маршрутъёслэн лыдзы но арысь аре йылэ. Кемалась ик ӧвӧл нимысьтыз пусъёс-стелаос пуктылэмын шаермылэн тужгес уйпал, лымшор, шундыӝужан но шундыпуксён палъёсаз. Табере мылкыд карисьёс со интыосын тодматскыны ветло. Будӥсь пиналъёс вордскем палъёссэс ӟечгес мед тодозы, мед гажалозы шуыса, Мугорез кыдатон культурая, спортъя но туризмъя министерствоын «Аты-баты, шли солдаты» проект но мукетъёсыз кылдытэмын.

— Шумпотоно, берло дыре гуртъёсын улӥсьёс но туризмлэсь кулэлыксэ валаны кутскизы, — шуиз министерствоысь специалист. — Угось ВТО-е пырон гуртоос понна секытэн сётске, куд-ог хозяйствоос куашкан калэ вуэмын, ужтэк кылисьёслэн лыдзы йылэ. Россиысь но Удмуртиысь гурт хозяйствоя министерствоосын нимысьтыз саклык висъяло гурт туризмез азинтыны мылкыд карисьёслы. Куд-ог ужбергатӥсьёс та удыс борды басьтӥськизы ни. Кылсярысь, Кез каргуртын ужа «Живица» куно пумитан юрт. Кияса ёросысь Вуж Салья гуртысь Петровъёс Удмурт корка кылдытӥзы. Туннэ-ӵуказе сюрес усьтӥськыны кулэ Вавож ёросысь гурт хозяйствоосы.

Туризмен ик герӟаськемын октябрь толэзе радъяськись «Кругосветка». Туэ со асьме шаерын дасэтӥзэ ортчиз, котькулэсь трос калык пыриськиз, Ижын улӥсьёс гинэ 10 сюрс пала вал. Мугорзэс кыдатыны, инкуазе потыса, семьяенызы, классэнызы вамышъяны мылкыд каризы на эшшо 11 ёросын улӥсьёс.

— «Кругосветкалэн» выжыосыз герӟаськемын «Май сюрес» ужрадэн, — шуиз Гузель Касимова. — Тулыс нуналъёс шулдыр луо ке но, дэмен вамышъяны мылкыд карисьёс соку ӧжытгес вал. Сое воштӥз «Одӥг нунал машинатэк» ужрад, таяз но адямиос мылкыдтэкгес пыриськизы. «Кругосветка» ваньмызлы кельшиз. Ижын улӥсьёс, пыдын сяна, ӵектэм сюресъёсты великен я теплоходэн ортчизы. Ижъёслэсь адӟем карыса, мукет ёросъёс но «кругосветкаез» ас доразы ортчытыны басьтӥськизы ни.

 Валентина Емельянова

Удмурт Дунне
By Удмурт Дунне 18 октября, 2013 17:15
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<