Чудьӟа

Удмурт Дунне
By Удмурт Дунне 29 октября, 2013 13:46

Чудьӟа

45

Ижкар пумен ньылэ вашкалазэ

Тодосчиос шаерысьтымы 70 пала воршудъёсты шараязы. Соос пӧлын нимынызы но, кылдэм дырынызы но висъясько чудьӟа выжыос.

— У, чудьӟа! — тазьы куддыръя шуиськом, пӧлысь-тымы аспӧртэмгес луисез шоры ӟурыкумы. Оскоды оло уд, но та кыл чузъяське ни 900 ар пала, асьме вапумлэн 12-тӥ даурысеныз. Так кыл — воршуд ним.

Воршуд сярысь вакчияк нимаз верано. Малы ке шуоно сое тодӥсез туж ичи ни. Воршудэз, яке «шуд вордӥсь», вашкалаосмы адӟиллям инмар интыын. Кылдэм со матриархат вакытэ, асьме вапумлэн кутсконаз ай. Воршуд инмарлы бырйылӥллям инкуазь люкетъёсты: будосэз, пӧйшурез, тылобурдоез. Соин нимъёссы но соос бордысь потэмын. Кылсярысь, Пышъя (пыш кыллэсь), Салья (пужей), Эгра (кион), Пельга (пелё кучыран), Бӧдья (бӧдёно), Уча (уӵы) но мукет. Воршудлы инты но нимаз пуктылӥллям — куала. Солэн шундыӝужан пал сэрегаз, мудор ӝажы вылысь коробын, улэм воршуд. Со коробез бадьпу ньӧрлэсь куто вылэм, ворсэтэз но солэсь ик. Пушказ тырылӥллям кызьпу вай, ньылпу лыс, коньы ку но мукетсэ — кин мае аслыз инмарлы быръе. Куд-ог куалаосын коробен артэ сылэм пулэсь вӧлэм адями тусо маке (идол).

Ай дасо аръёс талэсь азьло но кылыны луэ вал, кызьы пересь кышноос ог-огзы шоры вазьылӥзы воршуд нимзыя: Эгра, Бигра… Аксакын но таӵезэ кылылод вал: Бӧдья ке — Бӧдья-Пуроысь, Пельга — Кечолысь. Воршудэз буре ваён улӥз на туж кема. Нош куд-ог интыосын солы вазисько туннэ но.

Чудьӟаос сярысь син азе пуксьымон гожтэмын М. Атаманов тодосчимылэн «По следам удмуртских воршудов» ужаз. Асьме вапумлэн кутсконаз ай фин-угор калык пӧлы пырись чудьёс улӥллям Балтика зарезь дурын. Чудь шуо вылэм эстонъёсты, вепсъёсты, меряосты. 10-тӥ-11-тӥ дауръёсы Киевской Русьысь славянъёс вуо чудьёслэн музъемъёсазы, кылдыто Новгородской Русез. Ӟучъёслэн осконзылы, христианстволы, пумит луыса, кудъёсыз чудьёс шундыӝужан пала, нюлэсъёсы кошко. Озьы вуо соос Ватка, Кам дуре. Даур ортчыса, нырысез гуртсы кылдэ, шуиллям сое Гозек — азьветлӥсьсылэн нимызъя. Сураськем вир кужмо пушъет сётэм. Ӝоген та гуртысь яна потыса, люкрак пуксиллям вить гуртъёс. Дыр ортчемъя та калыкъёсты ниманы кутскиллям чудья, шудья, чучча. 1710-тӥ арын нырысетӥ гуртсы но Гозек-Шудья гожтэмын вылэм ни.

Чудьӟа сярысь таӵе веран кылем калыке. Азьветлӥсьсы, пе, Шудья батыр, эшъёсыныз выль инты утчаны потэм Калмезэ усись шуръёс валлин. Сюрес вылаз ожгарчиосыныз ӵош султэм Калмез батыр, музъем вылаз уг лэзьы. Соку Шудья батыр кык кызьпуэз порем но пунэм, сэрпалтэм пумитаз султэмъёс шоры. Таӵе кужымлэсь курдаса, таосыз сюрес вылысь палэнскиллям. Озьы чудьӟаос вӧлмиллям Пычас, Лудӟи, Вала шуръёс кузя туала Можга, Алнаш ёросъёсы (1300-тӥ аръёсы). Пуксё Лудӟи-Шудӟи, Удмурт Пычас, Алнаш, Вуж Шудья, Удмурт Кизек но мукет гуртъёс.

Воршудэн улон юн герӟаз та выжыысь потэм калыкез, солы оскон, сям-йылолъёсты чаклан кужмо кариз, пушйытӥз. Но воршудъёсын улӥсьёс кужмо ке но вал асьсэ батыръёсынызы но, лулэнызы-осконэнызы но — шундыпуксён палан ӝужась Муско кунлы (Московское государство) пумит лябгес адӟиськизы. Ӟуч инмарлы пумит луисьёс вырӟоно луизы Ватка, Кам дурысь но Калмез котырысь. Нош ӟуч эксэй Иван Грозный 1552-тӥ арын Кузонэз (Казанез) пазьгем бере удмурт гуртъёс эшшо но ӝоггес бушаны кутскизы. Озьы чудьӟаос вуизы туала Дэри ёросэ. Пуксизы Оӵ но отчы усись шуръёс кузя. Туннэ со интыосын Ижкармы сылэ. 1710-тӥ арын калык лыдэз гожъяку, чудьӟаослэн 17 гуртсы пусъемын: Чудья, Башур, Люлли, Вожой, Выль Казмаска, Ягул, Удмурт Карлуд, Якшур, Люкшудья, Шудӟа но мукетъёсыз.

Заводэз лэсьтыку, тымет улэ кылизы чудьӟаослэн гуртъёссы. Заводын ужасьёслы посёлок пуксиз удмурт гуртъёсын артэ но. Кылсярысь, Ягул (Подборенка) шур дурын вал Егад-Чудья. Отын туннэ «Металлург» микрорайон. Та гуртысь выль интые кошкемъёс кылдытӥзы Ягул. Туала Карлутка шур нюк сьӧрын сылӥллям Вуж Карлуд но Кечтака гуртъёс. Нюлэсо вырйылын вӧсяськиллям Кереметын, Быдӟым куалаын. Завод пуксьыку, кечтакаос кошкиллям Пермь улосысь Куеда ёросэ. Татысь гуртсэс озьы ик нималлям — Кечтака. Туала Медведевоысь но оглюкетэз улӥсьёс отчы ик кошкиллям, гуртсылы азьло нимзэ ик сётӥллям — Гондыр.
Нош интыязы кылем чудьӟаос ӟучъёсын эшъяськыса улӥзы ни. Посёлок будэмъя кык калыкъёс сураськизы — суро семьяос кылдылӥзы. Урамлэн одӥг палаз, пе, улӥзы удмуртъёс, ваче — ӟучъёс. Пиналъёс пичиысен дышылӥзы мукет кыллы. Озьы татысь чудьӟаос ӟучомизы. Музъем ужзэс воштӥзы заводын тыршонэн.

Мар паймонэз: озьы луэ котькуд кар вӧзысь улӥсьёсын. Со — глобализацилэн емышез, воштӥсько улон, сямъёс, нимъёс. Вашкалаосын сётэм удмурт инты нимъёс но ӟуч шӧмъем каремын. Тани ук Ижкарлы матын луись Шудья гурт вӧзысь Чекерйыл гурезь табере Чекерил.

Котькуд калыклэн луэ вордскон, ӝужан, юнман но пересьмон вакытэз. Кудаз асьмеос туннэ? Кин кызьы учке, дыр. Но одӥгзэ умой тодӥсько: вашкалазэ валатэк-дунъятэк, азьланез пурысь, дунъянтэм адӟиське. Соин ик «У, чудьӟа!» шуэм но мед кылӥськоз котьку но котькытын.

Валерий Баймурзин
Туспуктӥз Александр Горбунов

Удмурт Дунне
By Удмурт Дунне 29 октября, 2013 13:46
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<