Асьмеос кулэ ог-огмылы

Удмурт Дунне
By Удмурт Дунне 18 октября, 2013 17:25
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Асьмеос кулэ ог-огмылы

Кузьмин кузпалъёс

Кузьмин кузпалъёс

Кузпалъёс Лидия но Виталий Кузьминъёс уло Шаркан ёросысь Быгы гуртын. Туэ соос кыксы но вылӥ наградаосын пусъемын. Вить нылпиослэн анайзылэн Лидия Степановналэн гадь вылаз бырттӥзы элькунмылэсь вылӥ дунъетсэ — «Анаез данъян» гадьпус. Нош семьялэсь кузёзэ Виталий Мисаиловичез пусйизы Россилэн наградаеныз — Эшъяськон орденэн.

Кен утчан
Кузьминъёслэн кузпалъяськемзы дырысен туэ ӵапак 35 ар тырмиз. Та лыдпусэз ӵошато кораллэн: семья кусыпъёс лы выллем юнэсь, пе, луо. Озьы ик герӟало басмаен. Таиз семья кусыпъёслэсь пуныса-куыса выллем юнмамзэ, паськытамзэ возьматэ. Мон сямен, Кузьминъёслы кыкез но ӵошатонъёс тупало. Виталиен вераськыса, син азе пуксиз визьмо, йыг-йыг воргорон: зулён, кыл шерыса пукон со понна ӧвӧл. Нош Лидиялэн сюлэмыз усьтэмын: со котькинэн кыл шедьтыны быгатоз, шунтоз. Со сямъёс ик юртто, дыр, кузпалъёслы улонэтӥ ӵошен вамышъяны.

Нош ог-огзэс шедьтыны нодъязы Виталийлэн мумиз-бубиз. Кин меда пизылы кышнолы тупалоз шуыса, одӥг пол гуртысьтызы котькуд коркатӥ сямен синмынызы ортчиллям. Соиз нылмурт ӵыжы-выжымы, соиз дышетске на, соиз озьы-тазьы. Нош Бехтерева Лидаен вераськыны луоз, пе.

Сарапулысь совхоз-техникумез йылпумъяса, нылаш кыкетӥ арзэ ужа ни вал «Восход» колхозын бухгалтерын. Кык пол доразы юаськыны-вераськыны ветлӥзы Кузьминъёс. Нырысь пизытэк лыктӥзы: яралоз оло уз кен шуонзылы?

Витя Лидалэсь кык арлы бадӟым. Клубе потакуз, нылаш синйылтылӥз: чалмыт сямо пияш я шахматэн шудоз, я, газет-журналъёс лыдӟыса, пукоз. Нылъёс шоры уг ик учкылы кадь. Нош со ачиз етӥз сямо, котькытчы пыриськыны турттылӥз. Йыраз малпан ик ӧй вал соку огазе луон сярысь.

Калыкын шуо: юам-верамезлы ӧд ке, пе, бызьы, шуддэ келялод. Виталийлэсь лякыт сямзэ но визьмо луэмзэ тодыса, Лида пумит ӧз луы куранзылы. 1978-тӥ арын 8-тӥ июле егитъёс сюан ортчытӥзы. Соку та нунал мукетъёсызлэсь номырин пӧртэм ӧй вал, нош али Россиын пусъё Семьялэсь, яратонлэсь но осконлэсь нуналзэс. Быгы сельсоветын та нуналэ ньыль семья гожтӥськиз. Кузьминъёслэнэз быдэс гурт тыр жингыртӥз. Сюанчиос выль кен доры кӧня ке пар валъёсын лыктӥзы. Кылдэм сям-йылолъёсъя кенэз ошмес вулы ветлытӥзы, пыжиськемзэ эскеризы, ас киосыныз пужыятэм, чильпам пирданзэ учкизы.

Узырлыкмы — нылпиос
Быземезлэсь азьло ик Лида малпалляз: куиньлэсь ӧжыт но, витьлэсь ятырзэ но нылпи уг вайы. Олегзы но Олязы вордӥськем бере туж возьмаз нылъёсты, пиос лякыттэмесьгес луо шуыса. Нош бӧрсьысь бӧрсе вордӥськизы экеос. Виталийлэн мумиз-бубиз талы шумпотылӥзы, асьсэлэн куать нылпизы пӧлысь кыкез гинэ пи уго. Мисаил Харитонович кенэзлы шуылӥз: шӧдтэк шорысь куштыны я мар эн шедьты, ваньзэ ваёно. Ма, Лида ачиз но бадӟым семьяысь, куать кузя будӥзы — куинь ныл но куинь пи.

Кузпалъёсты выльдӥськон вакытысь шуг-секытъёс но ӧз кышкатэ, калыклэн нылпи ваемзы пумысь учконзы но номыр кадь ӧз потылы. Табере пиналъёссы асьсэос мумы-бубызылы юрттӥсько ни. Лидия Степановна данъяськыса шуэ: милям узырлыкмы — нылпиос, нош али семьямылэн пушъён вакытэз.

Кузьминъёслэн бадӟымъ-ёсыз пиоссы семьяен уло ни. Анай-атайзылы пичиоссэ будэтыны секыт луоз шуыса, школа бере ужаны кариськизы. Олег улэ но ужа Ижын лэсьтӥськон удысын. Кузпалъяськемын, кыкетӥ нылпи возьмало. Антон кышноеныз но пиеныз улэ Воткинскын. Таиз ужа «Белкамнефть» огазеяськонын слесарь луыса.

Нылзы но быземын. Воткинскысь педколледжез йылпумъяса, сизьым арзэ «Италмас» ансамбльысь хорын кырӟаз. Очно амалэн йылпумъяз Удмурт кун университетысь Искусствоосъя но дизайнъя институтэз. Али пичи нылыныз пуке. Но анай сюлэм Олизы пумысен висе. Одӥг гинэ нылзы бызиз Турцие. Зарезь дуре шутэтскыны ветлыкузы, эшезлэн эшез тодматэм сое отысь воргоронэн — Аднанэн. Гужем та кунын бугыръяськонъёс кутскем бере анай телевизор азьысь ӧз кошкылы. Но нылыз буйгатӥз: ми, пе, Стамбул городлэн пумаз улӥськом, дорозямы нокыӵе бугыръяськонъёс ӧвӧл.

Нырысь Лидия Степановна сюлмаське вал нылыз бызьыны дыртымтэысь, дэмлалляз созэ, тазэ пияшез. Олиез шуылӥз: соос мон кадям ик дӥсьтӥсьтэмесь. Анай валэктылӥз: папаед но сыӵе ик вал, мед гинэ ужась, быгатӥсь луоз. Ныл сюлэм ачизъя кариськиз. Табере тани Кузьминъёслэн кунгож сьӧрысь Мелиса внучказылы дас толэзь тырмиз ни.

Эмеспиенызы но солэн бадӟым семьяеныз тодматскыны Кузьмин кузпалъёс туэ апрель толэзе Турцие ветлӥзы. Лидия Степановна сентябре но сузэреныз ӵош вуылӥз нылыз доры. Нош вуоно гужем нылзылэн семьяез дасяське Быгые бертылыны Виталий Мисаиловичлэн 60 арес тырмоназ. Али Оляен кусып возё телефон пыр. Скайпен но куддыр адӟиськыло. Ӝоген ульчаямы Интернет ужаны кутскоз, пе, соку ӵыжы-выжыосмы доры ветлоно уз луы.

Пичиосыз но пиоссы быдэ вуэмынэсь. Степан, Ижысь гурт удысъя академиез йылпумъяса, агроэколог луиз. Кылем арын сӥзьыл армие басьтӥзы, туэ ноябрь пумын бертыны кулэ. Со воштӥз Гаврилэз, яке кызьы асьсэос нимало — Гаврошез: огез бертӥз, мукетыз кошкиз. Пичиез но пизы гурт удысъя академие пыриз вал, дышетсконзэ вис карыса, армие мыныны мылкыд кариз. Службазэ йылпумъяса, уже интыяськиз: ӧжытак ке но коньдон поттоно, пе. Оло, выльысь азьланьтоз дышетсконзэ, оске анай.

Корка но ӝутӥм…
Кузьминъёслэн ньыль пиоссы пӧлысь одӥгез гинэ армие ӧз ветлы. Антонзы пичи дыръяз туж висьыса будӥз — астмаен курадӟиз. Армие басьтымтэзы пумысен мылкыдыз туж усиз, кызьы ке мумизлы верамез но вань: военкоматэ ветлыса, тон, пе, ӧд лэзьы басьтыны.

Курыса гинэ луоз меда армилэсь утьыны, пайме Лидия Степановна. Нош Виталий Мисаилович лыдъя, тазалыксы вань ке, пиос одно армие ветлыны кулэ. Со ачиз служить каремын Рязаньын, авиамеханик вал.
Кузпалъёс серекъяса тодазы ваё али армиын служить карись Степанзэс. Бадӟымез Олег пизы армие кошкыку, Стёпа шуэм: малы, пе, монэ нырысь ик ӧд вордэ? Соку со школае уг ветлы на вал. Табере аслыз но черод вуиз служить карыны. Семьяоссэ тунсыко гожтэтъёсыныз паймытъя.

Агай-вынъёс Кузьминъёс ужаны быгатэменызы но шумпотто анай-атайзэс. Гаврошсы армиысь бертӥз но, ӵуказеяз ик пиос ньыльназы кык этажъем бадӟым корказылэсь липетсэ выльдыны басьтӥськизы. Корка пуктыны но соос ик юрттӥзы ни.

Кузпалъяськемзы бере куать арзэ егит семья улӥз Виталийлэн мумиз-бубиз вӧзын, собере колхоз квартирае выжизы. Но кинлэн уз пот аслаз юртаз улэмез? Басьтӥзы пичигес корка, нош 2000-тӥ арын вӧл-вӧл юрт ӝутыны басьтӥськизы. Вить аръёс ортчыса, со дась вал ни бадӟым семьяез липет улаз пыртыны.

Юртсэс ӝутыны юрттӥз колхоз. Проектэн мар ӧз выре, пиоссы асьсэос ваньзэ радъязы-инъязы. Корка пушкысь ужъёсты но ас вылазы басьтӥзы. Нимаз-нимаз висъетъёс лэсьтӥзы, гужемзэ чуланэ интыяськыны луоз. Бадӟым сюан ортчытыса, вань куноослы кӧлон инты шедёз. Коркаязы газ пыртэмын, пӧраськыны-шунтӥськыны бадӟым гурзы но вань. Сьӧросэ ульчае потанэз ӧвӧл, татын ик кильтро душ но сылэ. Азбарын озьы ик вӧл-вӧл — гидкуазьлы но, емышо садлы но, бакча сиёнлы но инты тырмыт. Котырак сяськаос будо.

Корка пуктыны Кузьминъёс кредит басьтӥзы. Бакча сиён, пудо вордэмзы но пунэмъёссэс тырыны юрттӥзы. Турынэн, ю тысен колхоз но юрттэ, асьсэлэн но турнан возьзы вань. Кытӥяз пудо сиён басьтоно луылэ ик. Со понна скалзы туж йӧло. Ӝытаз одӥг бадњым ведра но одӥг пичи ведра тыр йӧлыз потэ, нош џукна одћг бадњым ведра люкаське, пе. Лидия Степановна ачиз ик йќллэсь сиёнъёс лэсьтэ — снежок, кефир, сыр. Асьсэлы но сиыны тырме, вузаны но кыле. Озьы ик трос курег, кролик вордо, вузаны шуыса, кунян будэто.

Нылпиоссэс ужаны дышетонэз ӧй вал, огзыя огзы будӥзы, анай-атайзылэсь адӟем каризы. Виталий Мисаилович шуэ, пиналъёс ужез шӧмъяны кулэ. Со ачиз но пичи дыръяз тӧлэз џыжаса ӧз ветлы. Гурт котырын но юрттӥськиз, колхозэ но ужаны ветлӥз. Пайме туала вакытэ нылпиосты ужлэсь палэнтыны турттонлы: шудтэм учыръёслэсь утиськон понна, пе. Собере колхозын нокинлы ужаны, егитъёс капчи уж утчало. Пенсие потыса, интыям нокинэ пуктыны луоз, шуэ.

Визьнодо гырись
Виталий Кузьмин дышетскиз механизаторе Вотка ёросысь Кварса СПТУ-лэн Шарканысь филиалаз. Со вакытэ егитъёс гуртэ лачак кыльылӥзы, городэ кошкон сярысь малпаназ ик ӧй вал. Кузпалъяськемзы бере Лидаез косэ вал сое вылӥ образование басьтыны: сыӵе визьмын тыныд дышетскыны кулэ, пе. Воргоронлэн ӵош дышетскем эшъёсыз али но тодазы вайыло химиен, физикаен, математикаен юрттылэмъёссэ.

Виталий пыриз ик вал Ижысь гурт хозяйствоя институтэ тодон-валанзэ заочно амалэн будэтыны. Кыказ сессие ветлӥз но дышетсконзэ аналтӥз. Книгаос, пе, ӧвӧл. Собере Лидаез но со вакытэ Удмурт кун университетын заочно амалэн экономистэ дышетскиз. Вылаз ик, соку гинэ пизы вордӥськиз. Мумиз-бубиз пумит ӧй вал ке но дышетсконзылы, Виталийлы умой ӧз пот, лэся, гурт котырысь ужъёсты, пичи нылпизэс мумиз-бубиз вылэ погыльтыны. Кышноез сессиын дыръя скал но ачиз ик кыскылӥз. Нош али киосыз скал вераез золъяны уз ворме ни.

Вань даурзэ тракторен, комбайнэн ужамез воргоронлэн тазалыкез вылын шӧдскытэк ӧз кыльы. Кус висёнэз пыдъёсаз васькиз, пельыз но ляб кылэ. Вирзӥбетэз — давлениез — озьы ик курадӟытэ — таблеткаостэк тракторе уд пуксьы, шуэ. Ма, сое гинэ сыӵе висёнъёс уг курадӟыто.

«Восход» хозяйствоысь экономикая но коньдон ужпумъёсъя валтӥсь специалист Ангелина Протопопова жаляса шуэ: механизаторъёсмы вылӥ наградаос, ветеран ним басьтытозь уг чидало ужаны. Нырысь, пе, отысь но татысь грамота сётэмзэс возьмано, нош аръёс ортчо. Виталий Мисаилович понна Ангелина Венедиктовна туж шумпотэ, хозяйствоысьтызы нырысетӥез механизатор, пенсие потон вакытозяз ужаны чидаз но вылӥ награда басьтыны быгатӥз шуыса. Туж ушъяз Кузьминэз, гуртмыя со кадь визьмо, котьмае тодӥсь-валась муртэ ик уг тодӥськы, пе.

Лидия Степановна но данъяське визьмо но ужась кузпалыныз. Пиналъёссылы гуртэ ужъёссэс но со лэсьтыны юрттылэм, нылкышнолэн уго корка котырын но уж-пӧрез тырмыт. Егит дыръёссэс тодаз вайыса, нылкышно али ачиз но пайме: кызьы, пе, котькытчы вуттӥськылӥм? Кыксы но пыриськизы колхозысь комсомол огазеяськонэ, огвакытэ соин кивалтыса но вуттӥзы. Агитбригадаен концертъёс возьматъязы — кузпалъёс кырӟаны ярато, сыӵе быгатонлык мамаоссылэсь паласькиз, луоз. Коммунистъёслэн радазы но ӵошен вамыштӥзы. Шокчыны маза ӧй вал ке но, со вакытъёс Кузьминъёслэн улоназы тужгес яркыт буёлъёс кельтӥзы.

Кырӟась мылкыд
Лидия Кузьмина укмыс арзэ колхозын бухгалтерын ужаз, ньыль арзэ Быгы сельсоветэн кивалтӥз, пенсие потӥз ни муниципал кылдытэтлэн йырызлэн юрттӥсез луыса. Вань улонзэ калык пӧлын ортчытыса, али но тэк улыны уг чида. Удмуртстатлэн куремезъя гуртысьтызы 16 хозяйствоын кылем арысен юан-веран ортчытэ: маин уло, мар ужало, вань-а пудозы но мукет юанъёсъя толэзьлы быдэ валэктонъёс келя.

Пенсиын улон туж яра нылкышнолы, гань-гань шутэтскисько, шуэ: мар учкемед потэ — учкы, мар каремед потэ — лэсьты. Пенсие потыса гинэ, дыр шедиз тазалыко улонэн эшъяськыны. Котыраз ачиз кадь ик задор мылкыдо нылкышноосты люкаса, толалтэзэ гурт котыртӥ куасэн ветло. Тросгес лымы усе ке, сюрессэс волятыны кузпалыз но пота. Егит песянайёслэсь спорт удысэ кыстӥськемзэс ёросын но синйылтӥзы ни. Арлыдоослэн ӵошатсконъёсазы ӧтчало — куасэн но, пыдын но бызьыло Быгы кенакъёс.

— Егит дыръя спортэн вырон сярысь малпан ик ӧй вал, — шуэ Л. Кузьмина. — Таза улон сярысь но туж ик ӧз вераськылэ. Арлыд вуыса тодон-валан лыктэ вылэм. Сиён но табере чакласькыса пӧрасько, семьяосме но дышетӥсько валаса сиськыны. Али монэ табаын вӧй пӧлын пыжиськыны уд косы ни. Ӵукнаосы телевизор пыр одно ик учкисько тазалыклы сӥзем передачаосты, нимысьтыз журнал-газетъёс басьтӥсько.

Пайдаё дэмланъёсты гожъяны нимаз тетрадь но возе. Йырсазь ӟеч мед возиськоз шуыса, кроссвордъёс, сканвордъёс бордын, пе, пуконо. Озьы шуыса, йыртӥянъёсын зӧк-зӧк книга басьтэм. Но корка котырысь ужъёслэсь ваньмылод, пе, шат? Со куспын кузпалыз ӝыны книгазэ пусйылэм ни.

Виталий Мисаилович книга-газеттэк улыны уг быгаты — весь лыдњиське. Егит дыръяз чорыганы, нюлэскы ветлыны яратэ вал. Тазалыкез лябњемен, кышноез санаторие мыныны косэмысь, шуэ: мынам санаторие Быгыйыл вырйылын. Отын губиез но вань, омырез но чылкыт.

Палэнын улӥсь внучкаеныз огкыл шедьтон понна егит песянай дасяське кунгож кылэз дышетыны. Нуналаз витьсэ йырад кельтӥд ке, йырвизь но ӟечомоз, пе. Яке кырӟанъёс дышетыса пуконо. Берло аръёссэ фольклор ансамбле ветлыны дыр ӧз шедьылы. Нош пенсие потыса, Лидия Степановналэн мылкыдыз нош ик кырӟаны ӧдъяз. Витяез но сьӧрам клубе кыско, шуэ. Чидатэк возьма ни кузпалызлэсь пенсие потонзэ. Соку, пе, котькытчы ӵошен мыныны быгатомы.

Огазьын — шулдыр
Кузьминъёс али но ог-огзы борды бурмемынэсь кадь. Кузпалыз бусыысь ваньмыку, гурт котырысь ужъёсты ӵошен лэсьто. Виталий туж яратэ губияны, ачиз ик ваньзэ сузялоз, ачиз ик тусьын коралоз. Ярато ӝуась гур азьын губиен пересьмон (перепеч) пыжыны. Кышноез бугорске, нош со куарнянь куаса. Туж чебер пӧрмытэ, шуэ Лидия Степановна, пельнянез но мынамлэсь чебергес пӧрме. Пиналъёссы но быгато пӧраськыны, уг учко пиос шуыса.

Гужем но шутэтскон нуналъёсы кузпалъёслэсь мылкыдзэс шумпотто внукъёссы: одӥгезлы тямыс арес, мукетызлы — ньыль. Дедозэс весь шудыны ёрто. Кытчы пырод, шуэ воргорон, жадемез но вунэтоно луэ соосын. Аслаз пиосыныз но пичи дыръязы шудыны, нюръяськыны дыр шедьтылӥз. Пиос — со пиос ни, лякыттэмъяськытэк уз улэ. Нош куаретэмъёссэ, еэн шонаськемъёссэ тодаз ик уг вайы. Аслаз но ӟазег возьман сямен шудыны пегамъёсыз вань уго.

Анайзы ик пиосызлы чурыт кылзэ кытӥ-кытӥ вералляз курон-косонъёссэ быдэстымтэысьтызы. Котькыӵе дыръёссы вал улытозязы, но пиналъёссы тросгес шумпоттылӥзы дышетскеменызы но, пӧртэм ужрадъёсы пыриськылэменызы но. Таукаронъёссы, грамотаоссы трос гинэ люкаськемын, ваньзы ик мар ке ласянь пусъемын. Ӟеч дышетскемез понна Олязы «Артекын» шутэтскиз, Воткинскысь педколледжын дышетскыкуз, «Чеберина» элькун ӵошатсконэ но пыриськиз. Нош Степан спорт удысын вормонъёсыныз шумпоттылӥз, тани али армиын но азьпал радъёсын.

Ваньзылэн нылпиоссылэн но кенъёссылэн машинаен ветлыны правооссы вань. Нош атайзылэн машина руль сьӧры пуксемез ӧз поты, синъёсы но лябгес адњо, пе. Бадњымъёсызлэн пиосмылэн асьсэлэн машинаоссы вань, соос ик нуллозы ни милемды, шуо кузпалъёс. Но нылпиоссы џемгес асьсэос анай-атай юртазы берто — татын соосты котьку но возьмало.

Лия Малых

Удмурт Дунне
By Удмурт Дунне 18 октября, 2013 17:25
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<