Вамыштӥськом гуртэ, семьяе

Удмурт Дунне
By Удмурт Дунне 10 сентября, 2013 13:38

Вамыштӥськом гуртэ, семьяе

Г. Шушакова

Г. Шушакова

Ку быдэсмыны ӧдъялоз «Удмурт Кенешлэн» «Гурт семья кусыпъёс удысын ужан» проектэз, кытын со ортчоз, марлы сӥземын луоз — со сярысь вераськиськом проектлэн кивалтӥсеныз, филология наукаосъя кандидатэн Галина Шушаковаен.

— Галина Николаевна, семьяосын ужанэз ӟеч радъя «Удмурт нылкышно кенеш» но. Тӥляд проектты но та темалы ик сӥземын. Ужды огвыллем уз луы-а?

— Шонер, «Удмурт нылкышно кенешлэн» та нырысь ик быдэстоно ужез. Озьы ке но «Удмурт Кенешлэн» вице-президентэз Нина Малых дыръя ик та уж радъямын вал ни огазеяськонын. Соку тросгес дыр висъяськылӥз калыкен кенешонъёслы, лекторъёслэн нимысьтыз группазы но вал. Ёросъёсы поталлямы психологъёсын ӵош. Но та ужез радъяны капчи ӧй вал — транспорт утчано, специалистъёслы гонорар тыроно. Шуг-секытэз тырмылӥз.

Туала улон но нуналмысь возьматэ: семья кусыпъёсты радъян туж бадӟым инты басьтэ асьме обществоын. Кузпалъёс бордысь потэ нылпиосты будэтон, кыӵеесь соос будозы, кыӵе кылэз тодозы. Туннэ одӥг сынэн вань семьяосты сынаны уг луы. Шуом, куд-ог атайёс юыны чӧлскемын, кышнооссы вылэ куштэмын пиналъёс, гурт котыр, удмурт сям-йылолъёсты чаклан. Вань мукет югдур но — кыӵе ке кузпалъёс туж тупаса уло, нылпиос но отын умой будо, вормонъёсынызы шумпотто. Малпасько, нылкышно бордысь потэ семьялэн юн луэмез. Макем кышномурт ӝутоз аслэсьтыз воргоронзэ, сокем аслыз но ӟеч луоз, семьяезлы но умоен берытскоз. Соку воргорон ассэ йыг-йыг шӧдоз, солэн ӟигарыз тырмоз коньдон но поттыны, мылкыдыз луоз пиналъёссэ но визьманы, кышнозэ но яратыны.

Вань-а гурт семьяосъя кыӵе ке эскерон? Ми ӵапак сыӵе мониторинг ортчытыны чакласьком. Пичи лыдъян-чотан выллем радъяськоз со. Тодоно, ёрмыса-а, узыр-а уло гуртысь семьяос, кыӵе шугъяськонъёссы нылпи будэтонын, кыӵе кылын верасько семьяосазы но трос мукет. Юанъёс пыр-поч малпамын.

— Быгатоз-а та проект быдэс республикаез басьтыны?

— Уз, милям ужъёсмы чакламын куинь ёросын. Уйпалан — Глаз ёрос, лымшорын — Грак ёрос, шор районъёс пӧлын — Вавож. Нырысь кутскомы огаз ёросын. Учкомы, кызьыгес ужмы мыноз, кӧня коньдон кошкоз. Милям малпамын тазьы: ужаськомы быдэс ёросын. Мониторинг шараялоз котькуд ёрослэсь ужпумъёссэ, тодомы, кыӵегес уж татын нуоно луоз. Ёросъёсын котырес ӝӧкъёс радъяломы. Кулэ луиз ке, специалистъёсын потомы.

Тани милям планамы вань психотерапевтъёслэсь консультациоссэс радъяны нимаз нылкышноос но пиосъёс понна. Туннэ нуналэ воргорон мед тодоз кышномуртлэсь инкуазен сётэм кулэяськонъёссэ, нылкышно — пиосмуртлэсь пӧртэмлыксэ. Кылдӥсь шугъяськонъёсты, юанъёсты валаса пертчиськод ке, кусыпъёсты радъяськод ке, семья юнма.

Дэбесысь Ефремовъёслэн трос нылпиё семьязы

Дэбесысь Ефремовъёслэн трос нылпиё семьязы

— Нош ёросысь вань гурт поселениосын удмуртъёс ӧвӧл ке? Тани Грак ёросын ӟучъёс но, бигеръёс но, чувашъёс но, поръёс но уло.

— Ми басьтомы вань гуртъёсты. Уго проектмы гурт семьяослы сӥземын. Малпасько, ӵошатыса ик адӟиськоз удмурт семьялэн аспӧртэмлыкез. Проектлэн огез валтӥсь малпанэз — семьяен ужанэз бугыртыны. Тани котькуд ёрос администрациын вань семья ужпумъёсъя отделъёс, школаын — воспитательной уж нуонъя завуч, тырмыт клубын но библиотекаын ужасьёс. Ӵапак соос сайканы кулэ семьяосын ужан вылысь. Котькуд гурт поселение семьяен ужанъя проектъёс дасяно луоз — но нырысь ик проектэн ужанъя семинар ортчытоно на. Ӵектэм малпанъёсъя ужрадъёс мытомы. Ӟечъёссэ огазеяса, ёросъёс куспын фестиваль луоз. Бӧрысь чакламын ӟеч проектъёсты огъя методической пособие люканы — та ужез нуналмысь кутыны но пыӵатыны мед быгатозы мукет ёросъёсын но.

— Ку кутскозы чаклам ужъёсты?

— Со 15-тӥ октябре мытӥськоз ни, йылпумъяськоз, 18 толэзь ортчыса, 2015-тӥ арын 15-тӥ апреле.

— Кин юрттӥсь луиз та проектэз кылдытонын?

— Бен, оген та ужез быдэстыны секыт луысал. Тыршимы ӵош — «Удмурт Кенешлэн» кыл кутӥсь секретарез Елена Александрова, валтӥсь бухгалтер Алевтина Чиркова, Кузебай Герд нимо гимназиысь дышетӥсь Галина Чушьялова. Малпаськом, кутскем ужмы ӟеч емышъёссэ сётоз.

Елена Скворцова
Туспуктӥз Владимир Беломорских

Удмурт Дунне
By Удмурт Дунне 10 сентября, 2013 13:38