Тыл пушкын уг ӝуа, ву дурын уг котмы

Удмурт Дунне
By Удмурт Дунне 13 сентября, 2013 16:22

Тыл пушкын уг ӝуа, ву дурын уг котмы

Та толэзь кутсконын Ижысь Горький ульчаысь тылпу кысон часть кыкетӥзэ вордскиз кадь, юртэз быдэсак выльдӥзы. Со частьын кызё аръёс пала ужаз Василий Гаврилов, 14 арзэ караулэн кивалтӥз. Ӟеч тыршемез понна туспуктэмез частьлэн Данъян пул вылаз пыртэмын.

Василий Андреевичлэн тылпу кысон удысын ужамезлы вуоно арын 30 ар тырмоз. Службазэ умой нуэмез пусъемын «За спасение погибавших», «За отвагу», «За отвагу на пожаре», «За отличие в службе» но мукет медальёсын.

Вордскем палъёсаз (бурысез)

Вордскем палъёсаз (бурысез)

Кечка
— Эгра ёросысь Гыбдам Шорни гуртын вордски, — вера Василий Гаврилов. — Гуртмы пичи, нылпи сад яке школа сярысь веранэз ик ӧвӧл. Нырысь ик Мужберысь начальной школае ветлӥ. Нуналлы быдэ куинь иськем солань-талань вамышъяно луылӥз, отӥяз Чумойысь тямыс классъем школаын тодон-валан люкай. Таиз ини гуртмылэсь сизьым иськемын вал. Мугоры пичи, эшъёсылэсь бере кылёнтэм вылысь сьӧразы ялан бызьыса ветлӥ.

Нырысетӥ классэ лыктӥ, ӟуч кылэз тодытэк. Вань пиналъёслэн сямен ик мынам но пичи дыры ульчаын ортчиз, шуыны луоз. Нырысь шудыса ӧм ваньмылэ, бадӟымгес будыса, анай-атайёслы юрт-тӥськимы. Дышетски калык радъя, сокем трос «кыкъёс» ӧй басья. Физкультурая урокъёсын кузь куко эшъёсы сьӧры уйиськыны ноку ӧз удалтылы, со понна кечыръяськон интыосын мон чупресгес вал.

Покчи классъёсын дышетскыкумы, Выль арлы сӥзем сценка дасямы. Куинь кузя эшъёсынымы кечпиосты шу-дӥмы. Уд но оске, пӧйшур ним бордам лякиськиз. Монэ кечка шуыны кутскизы, мукет эшъёсмылы но кушем нимъёс тыримы. Одӥгмы но ӧм йыркуръяське.

Чумойысь школаез йылпумъяса, гуртысьтымы вить кузя Шаркан ёросысь Сурон школае вамыштӥмы — милям гуртмы Эгра но Шаркан ёросъёс куспы интыяськемын. 10-тӥ классэз йылпумъяме бӧрсьы Ижысь культурая училищее пыри, отысь «Зангари» ансамбле ветлӥ. Крезьгур дуннее вамыштӥ, кытчы мыныны паймемысьтым. Бен, атаелэсь адӟем карыса, арган кыскалляй ик, оло со артист луон мылкыдме бугыртӥз, оло гуртысь клуб. Отын ужасез ӧвӧлэн клубмы ӵемысь тунгонамын вал — ужаны отчы берто, кожай, лэся.

Семьямы бадӟым вал: вить пиос но ныл, мон куинетӥез. Бордамы ик улӥз анайлэн анаез, нош артысь юртын — атайлэн. Анае Глафира Семёновна ас вакытаз Мужбер гуртын ужась минимолокозаводын заведующийлэсь ужзэ быдэсъяз, сое пытсамзы бере скал кыскиз. Атае Андрей Николаевич пиналысен ик трактор руль сьӧры пуксиз, ас вакытаз гуртысь азьветлӥсь механизатор вал. Со милям ож мышкын тыршем муртъёс пӧлы пыре.

Атаймылэсь адӟем карыса, лэся, вань агай-вынъёсы техника борды кыстӥськизы, водитель луыса тыршо. Атай ми шоры одӥг пол но куаразэ ӧз будэтылы. Маке урод лэсьтэммес валаллямы лек учкемезъя, тросгес йӧтылӥз бабушъёсмылэсь. Соос анай-атай интыын вал. Чидатэк витьылӥмы шутэтскон нуналъёсты, быдэс семьямы люкаськыку, папамы арганзэ кысказ, ачиз ик кырӟаз, нош бабушмы балалайкаен шудӥз. Мон но соос выжые мынӥськем, лэся, кӧня ке нёжъяны вырисько, арган кыскасько, кызьпу туен шуласько.

Синмаськись арганэ

Культурая училищеын ар дышетскеме бере армие басьтӥзы. Эшъёсы но гурт калык кузь сюрес вылэ вашкала удмурт сямъя келязы — кырӟаса-вераса. Армие келян гуръёссы туннэ ке но пель сьӧрам чузъясько на. Службаме ортчытӥ Красноярск крайын, ракетной войскоосын. Монэ туж гажазы, одӥгез кужмоез спортсмен вал, турникын котькинлэсь трос пол ӝутъяськи, канат кузя 9 секунд куспын тубай. Со сяна, эшъёсылы капчи мылкыд кузьмай, крезьгуро инструментъёсын шудыса. Туспуктэмме частьлэн Данъян пул вылаз возизы, нош фамилиме частьлэн Данъян книгаяз пыртӥзы, анай-атаелы но тау каронъёс трос пол ысъязы. Озьы мон армиын вылӥ сержант звание басьтӥ.

Гуртэ бертоно луиз но, частьысь кивалтӥсьёс кужмысь ыстыны кутскизы военной училищее. Нош мон, нокинлэсь кылзӥськытэк, крезьгуръя училищеям ик берытски. Кык ар сурон сапег нуллэме токма ӧз луы, улон котьмалы дышетӥз, дунне шоры мукет синмын учкыны кутски. Совето аръёсты тодам вайисько ке, Атыкай музъеммес вылӥ дунъямы, данъямы но. Соин ик армие но шумпотыса ветлӥ. Туала пиослы куд-ог дыръя паймисько ик, асьсэос бугай быдӟаесь, нош армилэсь кышкало, учконо ке, туала армие нылпи садэ выллем гинэ ветло на.

Культурая училищеез йылпумъяме бере Эграла уж утчаны мынӥ. Шудэ вылэм, монэ вордскем гуртэлы матэ — Мужбере — келязы. Гуртэ музыкант вуиз шуыса, соку ик нылпи садэ но школае ӧтизы крезьгуръя урокъёсты нуыны. Пичи но ӧй пумитъяськы, авторитетэ йылӥз. Эшшо ке гуртысь арганчилы ваньмыз синмаськылӥзы, мон но тэк ӧй улы, арган шудон сяменым нылъёс шоры учкылӥ. Кинлэн ке вордскем нуналыз яке юбилеез луэ ке, одно ик монэ ӧтьылӥзы. Гурт сокем бадӟым ӧвӧл бере, хочешь не хочешь, родня не родня, котькуд сюанын, юбилейын калыкез шулдыртоно луылӥз. Самой блатной уж вал сӧ кужмысь ӝӧк сьӧры пуктылӥзы, вина сектасьёс шедьылӥзы.

Клубын ужан вакытам сельсоветамы пырись гуртъёсысь семьяос Мужбер клубын гожтӥськылӥзы. Огаз сюанысен вуоно кузпалме пумитай. Кин тодэ, оло, солы ӧй синмаськысал ке, туннэ но гурт клубын ужасал, арган кыскасал.

Галина нимо нылаш Чумой гуртысь вылэм. Ар ӵоже пумиськылӥм, чидатэк витьылӥ шутэтскон нуналъёсы но каникулэ бертон вакытъёссэ. Бертэмзэ тодӥсько ке, 13 иськемез лобӟыса кадь пыдын ортчылӥ, сяська кузьмалляй. Соослэн семьязы бадӟым, тямыс нылпи вал, Галие ньылетӥез. Бадӟым пиналзылы 18 арес, пичиезлы 2-3 толэзь дыръя атайзы улонысь кошкем. Соин но, лэся, Перевощиковъёслэн семьяысьтызы нылпиос, пичиысен ужез гажаны дышыса, юн сямо будэмын. Семья кылдытэммылэсь азьло ик анайзы Лидия Яковлевна аслэсьтыз пизэ кадь яратӥз. Мон но туж кылзӥськись пияш вал, Галиелы пумит вазьылыны ӧй дӥсьтылы. Кузпалъяськеммылэсь азьло ик мынэсьтым кылме юаӟ городэ улыны мынӥд ке — бызё, ӧд ке — вунэты. Ма карод, йыры берыктӥськемын вал, ужме куштыса, сьӧраз городэ кошки. Кузпал луонэ соку, Пермьысь суредаськонъя училищеез йылпумъяса, Ижысь бадӟым магазинъёсысь витринаосты чеберъяз.

Кузпалъёс - туристъёс

Кузпалъёс — туристъёс

Отӥяз кузпалъяськимы, трос аръёс ӵоже тылпу кысон частьёслэн общежитиосазы улӥмы. Туж шумпотӥмы вал нырысетӥ вордсконо пиналмылы. Укмыс толэзь витеммы луиз юнме — вордскемез бере нылмы куаразэ ӧз потты. Бӧрысь шараяськиз ни, буёл зынъёс кӧто кышноелы изъян вайиллям. Отӥяз ужзэ воштӥз, троллейбус паркын суредась луыса 22 ар тыршиз.

Та вакытэ Максим но Влас пиосмы будо. Кыкназы ик спортэн эшъясько, бадӟымез пие скалолазаниен выре, спортъя мастере кандидат луэ, пичиез кык полэс мастер: скалолазаниея (дуннелэн чемпионатаз кык пол пыриськемын) но пожарно-прикладной спортъя. Спортсменъёслэн тазалыксы юн луыны кулэ кадь, но армие мыныны ӧз яралэ. Пичиез пие мынам пытьыея ужаны вамыштӥз вал, кема ужаны катьыз ӧз тырмы. Табере кыкназы но вылӥ напряжениен юбое тубась монтажникъёс луыса тыршо.

Туштэк но ярай
Иже мон огнам ӧй лыкты, сьӧрам чортӥ Иван вынме. Уж утчанъямы Горький ульчаысь «Пирожковой» кафе доры вуимы. Ческыт пӧраськем зын нырез чатыртӥз, но сием потонмес чидано луиӟ коньдонмы гуртэ бертымон гинэ кылемын на вал. Юрт котыртӥ берганъямы сюреслэн музон палысьтыз военной дӥсен адямиосты адӟимы. Тылпу кысӥсьёс вылӥллям, азбар котырзэс утялто. Вынылы шуисько, ма отӥ-татӥ ветлом, ойдо дӥнязы пыралом.

Нош отын зэмзэ но милемыз витё вылэм, коть али ик уж борды, пе, басьтӥське. Со нуналэ ик ваньмыз радъяськиз. Жаляса верано, частьын выны кема ӧз ӝега, куинь толэзь водительын ужамез бере гуртамы ик бертӥз. Нош мон пыраклы кугӟай. 14 ар ӵоже караулэн кивалтӥ, майорозь будӥ. Пенсие потэме бере 8 номеро частьысь отделениен кивалтӥсько.

Пичи дыръям кинлэсь ке верамзэ кылэме вал, тушо адямиосты гинэ тылпу кысӥсе басьто шуыса. Токма озьы верасько вылэм. Тушо адямиосты гинэ ӧвӧл, крезьгурчиосты но уже куто вылэм. Тау карисько ӵош ужам арлыдо воргоронлы Алексей Петрович Елховлы. Со монэ ӵын пушкын шонер шоканы но тодмотэм интыын астэ возьыны дышетӥз. Парта сьӧрын гинэ люкам тодон-валанъёсын горд атасэз уд вормы вылэм, бордын одно ик луыны кулэ визь-кенеш сётӥсь. Вань верамъёссэ сак кылзӥ, куд-ог дыръя куаретылӥз ке но, чидай.

Вунонтэм кылёз нырысьсэ тылпу кысыны потам нуналэ. Сӥзьыл вал, стажировка ортчись муртлы военной дӥсь но сётыса ӧз вуттэ ай. Октябрьский переулокысь пулэсь лэсьтэм бадӟым вуз карон юртын атас кузёяськыны кутскем. Калык окмымтэысь, монэ но сьӧразы кутӥзы. Гражданской дӥсен пӧрмытскем муртэ тылэ пырыны соку ӧз лэзе, юрт котыртӥ гинэ бергай.

Тылын ӝокаса кулэм муртэз но кематэк ӧй вунэты. Пыжем адями шоры учкыса, быдэс пушкы бугырскиз кадь, вукекъяны кутски. Чидатски, ульчаын сылӥсь колонка дуре мыныса, ньылонме вуэн гылъяй. Отӥяз котьмалы дыши.

Пӧсь дунне
Адямиос тыллэсь пегӟо, нош ми отчы мерскиськомы. Тодам лыктэ на Удмурт кун университетлэн ӝуась корпусэз. Милям частьмы пӧсь интые котькинлэсь вазь вуиз, югдурен тодматскон вылысь юртлэн сигаз туби. Э-э-э, малпасько, тылпу зол лопырскыны вуымтэ на, ӝоггес пачкатоно. Кӧня ке азьлань вамыштӥ гинэ — гуштӥ, ярам, киосме вӧлъяса вуттӥ. Пыдъёсы мукет этаже ошиськизы, нош кӧт урдэстӥм тыл ӝутскыны кутскиз. Пӧсь мунчое шедем мурт кадь, ури-бери отысь ӝутски, эшъёсылы рация пыр ивортӥ, бадӟым тылпу вӧлскемын шуыса.

Совето Союз вакытэ газэн эстӥськись котельнойёс ӧй вал, тросэз юртъёс пуэн эстӥськылӥзы. Со юртъёсын ик ӵемысь тылпу поталляз. Одӥг полаз улонэн люкиськи кожай ни вал, коркаез эскерыны пыри но гулбечазы уси, ярано коть, эшъёсы кудпала вамыштэмме синйылтӥллям. Шуг-секытысь потыны юрттӥзы. Кемалась ик ӧвӧл йыр йылтӥм газ баллон лобӟиз. Йырме мыкыртыса ӧй вуттысал ке…

Арлэн котькыӵе вакытэз ас сяменыз ӟырдыт луэ. Тулыс тополь мамык но кӧс турын шуге-леке вутто, сад-бакчаосазы утялтӥськисьёс асьсэ ваньбурзэс утён сярысь вунэто. Тодам вайисько ке, смена ӵоже тужгес троссэ 17 пол тылпу кысыны потаме вань. Со нуналэ ӝӧк сьӧры нуназеяны куинь пол пуксьылӥ, таки шыдме пумозяз ӟузьылыны ӧз кылды. Ӵем дыръя тылпу потэ адямилэн аслаз янгышеныз, кышкытлык шоры чиньы пыр учкеменыӟ электроезъёссэс уг вошъяло, юыса тамак кыско, умме усё.

Горький ульчаысь тылпу кысон часть тужгес бадӟымез вал, городысь вань бадӟым объектъёсты чакласа возимы. Нимысьтыз ГДЗС (газодымозащитная) службамы вал, ньыль мурт котькуд тылпуэ потаз. Соос пӧлын мон но. Бадӟым тылпу потаз Степан Разин ульчаысь 9 этажъем юртын. Трос калыкез поттоно луиз. Дыраз юрттэт сётыны быгатэммес ик «За отвагу» медален пусйизы.

Мукетыз учыр вал Советской ульчаысь 2-тӥ юртын. Быдэс корка тылын гома ни, нош витетӥ этаже адямиос кылиллям. Бызьыса дӥнязы туби, учкисько но — пиналэн кышномурт. Сумкаысьтым шокан аппаратме пиналлы сётӥ, кышномуртлы — аслэсьтымзэ. Пумитъяськыны выриз ик, шокаме уз луы, сюресэз уг адӟы шуыса. Ӝот-ӝот верай: яке ваньмы быромы, яке ваньмы утиськомы, мынэсьтым гинэ эн кыле, усиды ке, юрттӥсь уз луы. Пиналэз киям кутӥ, пагӟаос кузя бызьыса васьки, со кышномурт но сьӧрам мынӥз, эсьма, одӥг пол но ӧз ӵемты.

Асьсэлы адямиослы сакгес кариськоно, тыл нокинэ уг жаля. Ужан техникамы арысь аре выльдӥське ке но, тылпу кысон удысын ужасьёстэк интыысьтыз со уз вырӟы. Соин ик тылпуэз кысӥсьёслы синпелет пуктысал. Ужаны кутскон аръёсам ульчаысь калык милемлы юрттӥськыны дась вал, туала вакытэ ваньмыз воштӥськиӟ телефонъёссэс поттыса, туспуктылозы, нош милемлы уз но жингыртэ. Учкисез гинэ ӧвӧл, мурт ваньбурез кайпалтыны вырисьёс но лачак.

Кырӟась сюлэм
Общежитиостӥ трос аръёс кыстаськеммы бере улон интылы сертификат сётӥзы. Со вӧзы банкысь коньдон пунэмаса, нимаз юрт басьтӥмы. Вань лэсьтӥськон ужъёсты ачим быдэстӥ: кулэ интыяз кирпич понӥ, гур пуктӥ, ву кошкись гумыосты тупатъяй. Ужамме эшъёсы но синйылтӥзы, ваньмон дыръям сантехниклэсь ужзэ быдэсъясько.

Ужлэсь мозмытскисько ке, чылкыт омыре дыртӥськӧ чорыганы, пӧйшураны, губияны, емыш бичаны. Бен, гондырез погыртыны ӧз кылды на, нош 12 килограммъем карп кутыны удалтӥз.

Пичи дырысеным синмаськыса учкылӥ духовой инструментъёсын шудӥсьёс шоры. Одӥг аре тылпу кысонъя управлениын духовой оркестр кылдытон сярысь вераськизы, мон но дӥнязы гожтӥськи вал. Тырмыт калык люкаськымтэен, лэся, бадӟым трубаез пелляны ӧз кылды, со понна ветеранъёслэн хоразы кутӥзы. Табере одӥг праздник но митэк уг ортчы.

Валентина Емельянова

Удмурт Дунне
By Удмурт Дунне 13 сентября, 2013 16:22