Шундылэсь яркытгес, тӧллэсь шаплыгес!

Удмурт Дунне
By Удмурт Дунне 5 сентября, 2013 15:17
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Шундылэсь яркытгес, тӧллэсь шаплыгес!

ILA49gZAINQШколаын дышетскыкум, мынам ктькуд гужем ужаме потэ вал. Усто ук — тыршемед понна уксё тыро ке. Но гурт пиналъёслы сыӵе шуд туж шер усьылэ. Тодӥсько на, куд-ог дыръя нылпиослы шудон инты лэсьтылӥм, тымет ӵыпон инты сузяллям, бадӟымъёслы скал гид ӝутыны юрттӥм…

Нош университетэ пырыса, мон сюри Студентъёслэн отрядазы. Татын ини ваньзылы барыш поттыны луонлык сёто. Вылаз ик, тон выль эшъёс шедьтӥськод на, улон сярысь тодон-валанъёстэ будэтӥськод, пӧртэм ужрадъёсы пыриськиськод.

Кызьы мон сюри «Sun» отрядэ
Удмурт кун университетын отрядъёс куинь пӧртэм ӧръя ужало: проводникъёс, вожатойёс но лэсьтӥськисьёс. Огъя 20 пала отрядъёс.

Студентъёслэн столовоязы эшъёсыным сиськыса пукиськом вал. Ми доры пеймыт вож курткаосын задор мылкыдо егитъёс вуизы но кутскизы ук отрядъёс сярысь ӟабыльтыны. Со проводникъёс вылӥллям, отрядазы выль адямиос бичало. Котькудмылы кампет но визитка сётӥзы. Берло ини со визиткая мон сюри «Sun» отрядэ.

Мар со целина
Быдэс дышетскон арзэ отряд «целиналы» дасяське. «Целина» — со ужан вакыт, инвожоысен куарусёнозь кыстӥське. Соку ваньзы тыршо но одӥг лагерьын уло. Отрядын вань «боецъёс» — одӥг гужемзэ ужам егитъёс. Соос пыӵато «кандидатъёслы» — отрядэ али гинэ вуэмъёслы огъя улон-ужан мылкыд. Куронъёс трос гинэ: уставез тодоно но соя улоно, отрядлэсь йылолъёссэ гажано, аслэсьтыд быгатонлыкъёстэ возьматоно, пӧртэм ужрадъёсы пыриськоно, профессилы дышетсконо но экзамен сётоно. Отряд туж гажа кандидатъёсты: отрядлэн азьланез соос киын уга.

Котькуд отряд аспӧртэмлыко
Котькуд отрядын вань «Командир», «Комиссар», «Сандвойка», «Мастер». Соос радъяло отрядлэсь ужзэ. «Командир» кивалтэ но документъёсын выре. «Комиссар» отрядэз ужрадъёслы дася. Отрядъёс вискын эктонъя, видеороликъёсъя, удыссэс тодэмзыя, спорт шудонъёсъя но мукет быгатонлыкъёсты эскеронъя вожвылъяськонъёс радъясько. «Мастер» пиналъёсты профессилы дышетэ, нош «Сандвойка» чылкытлыкез учке, висисъёсты эмъя. Пӧртэм фестивалъёсы пыриськем сяна, отрядъёс котькуд тулыс Ижкарез утялтыны потало, нылпи юртъёсы шудон бичаны юртто, шуге-леке сюрем пиналъёсын ужрадъёс ортчытъяло. Котькуд отрядлэн аслаз гербез, флагез, гимнэз, пӧртэм йылолъёсыз вань. Мынам отрядэлэн девизэз: «Шундылэсь яркытгес, тӧллэсь шаплыгес»!

Кызьы ортче целина
Быдэс ар ужрадъёсы пыриськыса, проводниклэсь ужзэ тодонъя экзамен сётыса, егитъёс «целинае» кошко. Таяз арын Ижысь егит проводникъёс ужало Нижний Новгородын, Мурманскын, Котласын, Костромаын, Мускоын, нош мынэсьтым отрядме Ивановое лэзизы. Улӥськом проводникъёслэн резервазы. Та юртын, ми сяна, резервлэн кивалтӥсез, нарядчикъёс, инструкторъёс пуко. Кылем арын мынам отрядэ пичигес вал, соин ик ваньмы ӵош кунмылэн лымшор палаз ворттылӥм. Нош туэ 26 кузя. Поездмы, Ивановоысь потыса, кошке Муское, собере Кинешмае, Кинешмаысь нош ик берытске Муское, собере выльысь Ивановое вуэ. Оглом сюрес ньыль нунал кыстӥське. Жаляса верано, 26 адями одӥг составлы трос луэ, соин ик отрядмес куинь бригадалы люкизы.

Комиссарлэн ужез
Али дырлы мон бригадамылэн комиссарез луисько, отрядэлэсь ваньмон дырзэ тунсыко карыны тыршисько. Котькуд нунал маин ке но висъяське. Кылсярысь, ӝыны «целина» ортчиз ни бере, пиналъёс понна «экватор» радъямын вал. Культуралэн нуналаз Кинешмае экскурсие потам но та пичи курорт карлэн чеберезлы паймим. Кылбуранлы сӥзем нуналэ егитъёс асьсэлэсь кылбуръёссэс лыдӟизы. Со сяна, ми газет поттӥськом на. Кельтоно ук кагаз вылэ писатель Виноградский Женя нимо эшмылы таукарон гожтэ, мукетызлэн вагоназ Мария Порошина актриса Кинешмаысь Муское бертэ.

Целиналэн пумаз
Валаса ик вуттоно ӧвӧл дырлэсь ортчемзэ. Вакчи дыр куспын отряд семья кадь луиз. Куарусён толэзьысен нош ик кутскозы огшоры дышетскон нуналъёс, выль собраниос, отрядъёсы вуозы выль «кандидатъёс», кошкозы «боецъёс», выльысь кутскоз «целиналы» дасяськон. Мон тодӥсько: та кык толэзь весяклы кылёз милям сюлэмъёсамы, отряд выльысь но вылысь бичалоз егитъёсты. «Целина» ортчем бере «боецъёс» шуо: та уже уг ни берытскы. Но малы ке ар куспын тросэз чугун сюреслэсь мӧзмо. Куд-ог дыръя васькиськод вокзалэ но, выж вылын сылыса, вожъяськись синъёсын келяськод кошкись поездъёсты. Собере выльысь лыктӥськод отрядлэн собранияз. Пумита монэ, выль целина!

Мария Векшина

Удмурт Дунне
By Удмурт Дунне 5 сентября, 2013 15:17