Шудыса — миллионозь

Удмурт Дунне
By Удмурт Дунне 24 сентября, 2013 15:11

Шудыса — миллионозь

w_e195e6b4Семён Семёновен вераськиськом «Перепечкин» кафеын. Но сиён-юон али йырын уг берга: тунсыко соиз, малы шаерысьтымы одӥгез тужгес но тодмо егит ужбергатӥсь шуак театр удысэ кыстӥськиз? Кылем толэзе со усьтӥз театралъёсты дасясь «Оливер» школа.

— Семон, театр уксё уг вай кадь но… Сцена вылын тэтчан мылкыддэ ӧръяд-а?

— Медаз валалэ вал: вань проектъёсме мон кутскисько коньдон понна. Нокин монэ удмурт батыр медаз малпа. Куддыр кичӧлтонъёсы социальной муген герӟасько, адямиослы со кельше. Тани кафеямы 40 мурт ужа — шат талэсь социальной палзэ лыдэ уд басьты? Умой ӧвӧл шат со, кӧня ке удмуртъёсты «сюдыны-вордыны»?

— Тон сиён-юон дуннеын бергась адями. Ку йырад кылдӥз студия сярысь малпан?

— Огшоры, ӝыт «ВКонтактеын» бугыръяськыса пукыкум. Малпай радъяны вакчи дыр куспын ужась курсъёс: дышетскид — кошкид. Кутскисьёслы группа но азинскемъёслы группа чакламын. Али 7 муртэ басьтӥм ни, пӧлазы ачим но дышетскисько. Урокъёсты нуэ Любовь Сергеевна Аюпова, Ижкарысь «Балаганчик» театрлэн кивалтӥсез. Мукетыз педагогмы — Удмурт театрысь егит артист но режиссёр Юрий Ерошкин. Дышетскисьёсмы пӧлын мотор бизнесменъёс но луыны быгатысалзы, но курдазы. Пӧламы ик дышетске Ижлэн валтӥсь суредасез Мария Бутченко.

— Зэм-а со, вуоно школаеныд кивалтӥсь муртлы тон 50 сюрс тырыны дась?

— Зэм, туж тунсыко кастинг пӧрме! Вотэсэ ялон гожтӥ: утчасько менеджер-кивалтӥсь, уждунэз 50 сюрс. Кин иворез вӧлмытыны юрттоз, солы нимысьтыз 5 сюрс тыро на (та муртэз ниманы кулэ ачиз уже кутэм адями, мед пусъёз, кытысь, кинлэн бамысьтыз со ялонэн тодматскиз). Калык туж трос чӧлскет (перепост) лэсьтӥз, ваньзылэн уксё капыртэмзы потӥз, лэся. Ивор вӧлмытӥсьёс уно, нош уже куриськисьёс ӧвӧлгес на. Асьсэос сярысь мадё пӧртэм сямен: кин ке Мускоын дышетскиз, кин ке А. Панинэн ужаз, кин ке Б. Алибасовлы клип лэсьтӥз. Огез вузаськон удысын тырше: компание лыктыкуз, вузчиос 30 сюрс барыш потто вал ке, со вуэм бере лыдпус 130 сюрсозь ӝутскиз, пе. Вузаны быгатӥсь мурт котькытын туж кулэ. Мон ачим но ӟеч радъясь но, творческой адями но. Вузаськисез утчасько.

— Ӧд-а шӧды, берло ар ӵоже шаерамы театр выльдӥськон, театр бум ортче шуыса? Филармоние интыяськиз «Туала драматургилэн центрез», Ӟуч драмтеатре егитъёслэн лабораторизы каръяськиз, Глазкарысь «Парафраз» аншлагъёс люка. Щепкин нимо училищеысь удмурт егитъёс бертӥзы…

— Мон та удысэз уггес валаськы вылэм. Театр сярысь малпанэ толэзь но ӝыны талэсь азьло гинэ кылдӥз. Мон соку уг ик тодӥськы вал, асьмелэн Les Partisans театрмы вань шуыса! «Птица», «Балаганчик» сярысь кылэм вал ини. Туж умой, мед луоз конкуренция. Та театръёс весь одӥг составен ужало, нош ми дышетӥськом но — лэзиськом, бурдъяськом. Студия академиозь, институтозь мед будысал. Сыӵеесь азьпала учконъёсы.

— Валамон. Озьыен, вордэм юртад нырысь ик дышетозы актёр луыны. Но одӥгез юан йырме тӥя на: малы студиез «Оливер» нимад? Воксё но удмурт шӧмыз ӧвӧл.

— Кулэ но ӧвӧл, та удмурт проект ӧвӧл ук. Нимзэ котькин мед валаны быгатоз. Чебер нимлы мон соглаш, «Удмурт дунне» газетэз лыдӟисьёс мае ке выльзэ малпазы ке, шумпото. «Оливер» нимез тодмо нылаше дэмлаз. Кельше кадь. Огласянь, Оливер Твист тодэ лыктэ.

— Мукет ласянь, Оливер Лооде… Эстон культуртрегер, Быги гуртэз фин-угор шоркар ялӥз. Эстонъёсты гажаса, тазьы нимад, луоз.

— Ха-ха, тунсыко. Мыным театрен укыр герӟаськем нимъёс уг кельшо: «Бенефис», «Аншлаг», «Гардероб»… Кемалась ик ӧвӧл Екатеринбурге ветлӥ. Отын котькуд азбарын — пичильтык кафе, шудон корка… Асьме пичи театръёсмы уг быгато вань ужпумъёсты сэрттыны-пертчыны.

— Кылэмед ӧвӧл, дыр, егит удмурт артистъёс камерной студия усьтон сярысь малпасько ини.

— «Щепкаосын» ми ужалом на. Котырам али нырысь ик менеджеръёсты люкасько — кивалтыны быгатӥсь муртъёс зарни чот. «Оливерез» вузаны кулэ. Адӟем карисько Cirque du Soleil театрлэсь. Сокем зол но пыд йылаз йыг-йыг сылӥсь цирк. Кылдытӥсез нырысь аккордеонэн шудэ вал, бӧрысь жонглёр луиз. Пияшка бырйиз тужгес но дунтэм жанръёсты — акробатикаез но клоунадаез (пӧйшуръёсты утялтоно, котыразы выроно ай), пумен паськытатӥз, узырмытӥз программазэ. Афишаоссы шоры учкыса гинэ, тон выжыкылэ вуиськод кадь. Макем отын ӟеч сервис, адями понна сюлмаськон! 22 труппа, 1800 акробатъёс, 5000 адями ужа. Цирк-миллиардер. Огшоры пиёк инъяз.

— «ВКонтакте» бамын паблик усьтӥд: «Ар ортчыса — 1 миллион». Кызьы гурезе тубод? Тазэ сяна, мукет вотэсбамъёсты нуиськод: сиёнлы, адямиослы сӥземъёссэ… Уг-а акыльты нуналысь нуналэ чуръян?

— Пӧраськон чуръянлэсь акыльтымонгес. Сиён пӧран технология трослы секытгес ук. Ачид чакла ай, одӥг перепечез вузан понна сомында кулэ: продукт, пӧрась, сюдон инты, сиись. Адямиосын ужаны капчигес. Кыксэ пабликъёсме ачим уг ни нуиськы: школаын дышетскись дыды 3 сюрс манет понна котькуд нунал ивор чуръя. Блог нуыны кельше, книга но гожтэме потэ.

— Ужбергатон «секретъёстэ» вераса кельтод, дыр, лыдӟисьёсмылы?

— Али кӧня ке шӧдонэ вань ини. Ужбергатонын мар бӧрсьы мар мынонлэсь радлыксэ валаны кутски. Нырысь ик, номыр понна но ас бизнесме бадӟым кредитэн ӧй усьтысал. Оглом учконо ке, уж борды лач-лач кутскыны быгатӥськод, коть огез ке но кужмо палыд вань ке: олома быдӟа опытэд, оломамында кусыпъёсыд яке оломамында коньдонэд. Уксётэк но пырпотод, тодон-валан тӥрлыкед но эшъёсыд юрттӥзы ке.

Уг яратӥськы статистикаез: со ОКШ-лэсь но уродгес (ОКШ — Одӥг Кышно Шуиз). Статистика чаклаз: сю тэтэ карись бизнесмен пӧлысь, ар ортчыса, дас мурт кылёз, куинь ар ортчыса — одӥг адями. Малы бизнесысь кошконо луо? Тодон-валанзы уг тырмы. Огпол тани ачим но «кырыж мертай»: вить ар талэсь азьло логотипенымы бумага пакетъёс заказтӥ, со пакетъёсме али ке но быдтыны уг быгатӥськы… Жаг тырон пала жалятэк куясько ни: мед адӟозы, коть реклама луоз.

Али егит ужбергатӥсьёслы трос луонлыкъёс усьтӥсько. Туэ Ижкарын Удмурт урамын Ужбергатӥсьёслы юрттӥсь центр усьтӥськиз. Элькунмы субсидия сётэ, трос пӧртэм грантъёс вань. Эшъёс, утчалэ коньдон! Ачим но туж уг яратӥськы кагазъёсын вырыны, эшшо но зол уг чидаськы кинлэн ке косэмезъя ужаны.

Вань проектъёсылэн пайдазы вань. Куд-огез соос пӧлысь куддыр бабо. Али «Зарни перепеч» промоез кӧня ке палэнтӥм, но сӥзьыл «Пичи Зарни перепеч» но «Элькуновидение» одно ик учкисьсэс витёзы. Театрен герӟаськеме выль адямиосын тодматӥз, чик но уг жаляськы. Школаямы дышетскыны мылкыд карисьёслэн анкетаоссы гинэ 200 пала вуизы. Нош со быдэс база ук! Табере мынам син азям 200 кужмо, етӥз егитъёс кылдӥзы.

Дарали Лели

Удмурт Дунне
By Удмурт Дунне 24 сентября, 2013 15:11
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<