Пыраклы — сюлэмъёсамы

Удмурт Дунне
By Удмурт Дунне 24 сентября, 2013 10:40

Пыраклы — сюлэмъёсамы

В. Завалин

В. Завалин

Удмурт шаер бадӟым ыштон адӟиз — 20-тӥ сентябре улонысь кошкиз нациосын ужан политикая министр Владимир Николаевич Завалин.

В. Н. Завалин вордскиз 1957-тӥ арын 20-тӥ январе Яр ёросысь Лэзя гуртын трос нылпиё семьяын. Ужан удыссэ мытӥз 1979-тӥ арын Ижысь гурт удысъя институтэз йылпумъямез бере. Егит специалистлы оскизы Яр ёросысь «Россия» колхозысь валтӥсь агрономлэсь удыссэ. Кӧня ке ужаны вуттӥз, сое армие басьтӥзы. 1980-тӥ-1985-тӥ аръёсы секретарь луыса тыршиз ВЛКСМ-лэн Яр ёросысь райкомаз.

1985-тӥ-1987-тӥ аръёсы тодон-валанзэ будэтӥз Свердловскысь (туала Екатеринбург) вылӥ партийной школаын. 1987-тӥ-1988-тӥ аръёсы Владимир Николаевич парткомлэн секретарез луыса тыршиз Яр ёросысь «Новая жизнь» колхозын. Нош бӧрысь юнматэмын вал та колхозэ ик председателе.

1998-тӥ-2001-тӥ аръёсы солы оскизы Яр ёрослэн администрациеныз кивалтыны. Нош 2001-тӥ арын Владимир Николаевичез юнматӥзы Удмурт Республикаысь нациосын ужанъя министре.

Кыӵе гинэ ужез ӧз быдэсъя, со котьку висъяськылӥз кыл вылаз юн сылыны быгатэменыз, ужез яратэменыз, азьлане учкыны но шуг-секытысь потон сюрес шедьтыны быгатэменыз.

Котькинэн огкыл шедьтӥсь, калыкен лякыт вераськись, котькыӵе учырын йӧно возиськись — таӵеен тодамы кылёз Владимир Николаевич. Быгатонлыкъёссэ, сямъёссэ со возьматӥз уж вылын. Тужгес но пайдаё ортчизы Удмурт Республикаысь нациосын ужанъя министрын тыршон аръёсыз.

Нациосын ужан политика, шаерамы улӥсь калыкъёслэсь сям-йылолъёссэс утён но азинтон, фин-угор дуннеен юн кусып возён — вань та удысъёсты валтон борды Владимир Завалин басьтӥськиз, мукет удысъёсын кыдаса-юнмаса. Солэн кивалтэмез улсын министерство пӧртэм проектъёсты быдэсъяз. Владимир Николаевич бадӟым саклык висъяз национально-культурной огазеяськонъёсты азинтонлы, шаерамы улӥсь калыкъёслэсь кусыпъёссэс юнматонлы, сямъёссэс утёнлы но ӝутонлы.

Владимир Николаевич котьку но вылӥе пуктылӥз адямиез, солы юрттонэз. Со туж гажаз калыкез, шаерамы улӥсьёс но солы капчи мылкыдын вазиськылӥзы.

Владимир Николаевич Завалин пусъемын Удмурт Республикаысь Правительстволэн, Россиысь Улосъёсты азинтонъя министерстволэн Данъян грамотаосынызы, Удмурт Республикалэн Данъян грамотаеныз, Татарстан Республикалэн «За достижения в культуре» гадьпусэныз.
Чылкыт сюлэмо, лякыт сямо Владимир Николаевич пыраклы кылёз тодэ ваёнъёсамы.

Владимир Завалин улонысь кошкем пумысен ӵыжы-выжыосызлы, матысь адямиосызлы мур куректэммес вераськом.

Удмурт Республикалэн Президентэз А. А. Волков,
Правительство,
Кун Кенеш.

Удмурт Дунне
By Удмурт Дунне 24 сентября, 2013 10:40
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<