Паськыталоз, будоз, йылоз

Удмурт Дунне
By Удмурт Дунне Сентябрь 10, 2013 15:59
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Паськыталоз, будоз, йылоз

10-тӥ куарусёнэ Ижысь зоопарк 5 ар тырмонзэ пусйиз. Котькыӵе празднике сямен, та нуналэ зоопарке уно калык лыктӥз. Покчиос но бадӟымъёс пӧлын вал Удмуртилэн Президентэз Александр Волков, Кун Кенешлэн Тӧроез Владимир Невоструев но Правительствоысь кивалтӥсьёс.

Зоопарклэн вить аресэзлы сӥзем ужрад кутскиз 11 часын. Солэсь азьвыл татчы люкаськемъёсты шулдыртӥзы усточи нылпиос. Ижысь «Дельфин» студие ветлӥсьёс выжыкылысь геройёслы пӧрмизы. «Грация» клубысь тэшкылиос, лудкечъёс кариськыса, тэтчазы. Удмуртилэн Президентэз, соосты ушъяса, зол чабиз но вань калыкез ӟечкылаз праздникен.

— Туннэ та пиналъёслэн пальышась ымныръёсазы учкыса, мон шумпотӥсько, таӵе зоопракмы асьмелэн вань шуыса. Бен со дунтэм ӧз усьы. Верасьёс вал: дауръем писпуосты погыръяса (соос тӧласькыку, тӥяськыса усьыло ни вал), зоология парк лэсьтӥськом шуыса. Но учке ай, кыӵе усто шутэтскон инты пӧрмиз. Шаерамы 1,5 миллион улӥсез. Нош 5 ар куспын зоопарке 4 миллионлэсь уно калык ветлӥз ини. Ӝыныез соос пӧлысь нылпиос, ветеранъёс, инвалидъёс. Пӧртэм адямиос татчы ветлыны мед быгатозы шуыса, дунъёс но сокем бадӟымесь ӧвӧл, нош зоопаркмы Россиын устоосыз радын. Та инты усьтэмын покчиос но, пересьёс понна но. Аръёс ортчемъя со уката паськыталоз, будоз, йылоз. Мон малпасько, семьяен шутэтскон интыос Ижын кулэ, соин ик кӧня ке ар ортчыса, Удмуртиын дельфинарий но кылдоз, — мылкыдзэ усьтӥз Александр Волков.

Зоопарклэн вордӥськем нуналаз трос кузя вуизы нырысетӥ классэ ветлӥсь нылпиос. Ижысь 86-тӥ лицейысь Тимур Ходырев татчы кӧня ке пол ветлӥз ини.

— Анайме-атайме ӧтӥсько ке, соос соку ик соглаш луо зоопарке лыктыны, асьсэлы но татын кельше, лэся. Мыным туж ярало коньыос, соос сыӵе ерпечкаос. Тигръёс но татын лекесь уг адско, йӧноесь ке шат, — шуэ пияш.

Наталья Смирнова но зоопарке ветлэ нылпиосыныз.

— Пичизэ нылме коляскае пуктӥсько но татчы поръяны лыктӥськом. Бадӟымезлы кельше пӧйшуръёс шоры учкыны, пичиезлы — шудон площадкаын бызьылыны-лэчыраны. Нош мыным кельше, нылпиосылы татын кельше шуыса, — мылкыдзэ усьтэ егит анай.

Татчы трос ветло арлыдоос но. Кылсярысь, Тамара Кондратьева внучкаеныз ӵош татӥ поръя.

— Пыдъёсы висё ке но, дыдыеным ӵем гинэ вуиськом. Татын ява циркед но кулэ ӧвӧл. Обезянъёс серемез потто, моржъёс экто-бергало но чабыны куро, кионъёс бызьылыса шудо. Адямиос семьяен умой мед шутэтскозы шуыса лэсьтэм инты. Жадисько ке, ӟус вылэ пуксьыса, ял карисько. Огез гинэ уггес тырмы, писпуос татын ӧжыт. Сяськаосты сямен, мед мерттозы вылэм, соку эшшо чебер луысал, — дэмла Тамара Семёновна.

Галина Савина
Туспуктӥз Владимир Беломорских

2-1

2-202-112-342-21 2-152-172-18

2-32

2-27

Удмурт Дунне
By Удмурт Дунне Сентябрь 10, 2013 15:59
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<