Ортчеменыз пумиськон

Удмурт Дунне
By Удмурт Дунне 17 сентября, 2013 11:24
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ортчеменыз пумиськон

В. Романовлэн печатлан машинкаез вуиз музее

В. Романовлэн печатлан машинкаез вуиз музее

Владимир Романовлы 70 ар тырмонэн валче туэ 2-тӥ августэ газетамы поттӥмы Зинаида Романовалэсь тодэ ваёнъёссэ. Зинаида Владимировна возьматӥз кылбурчилэсь архивзэ.

Тӥни соку вераськон поттӥмы: оло, вань та архивез Геннадий Красильниковлэн музей юртаз сётоно. Зинаида Романова ачиз но малпаськем со сярысь. Кӧня ке ар талэсь азьло отын ужасьёс солы вазиськиллям ни вылэм. Критик Александр Шкляев но та пумысен кылпум поттылэм. Но вераськонъёс вераськонэн ик кылиллям.

Улонысь кошкемез бере Владимир Романов сярысь Михаил Федотов книга поттыны дасяське вылэм. Кылбурчилэн архиваз бугыръяськыса, кӧня ке папказэ ас дораз басьтэм. Вить аръёс ортчыса, таиз но улонысь кошкем. Озьы Романовлэн архивысьтыз оглюкетэз кыле Федотовъёс доры.

Владимир Романовлэн юбилееныз валче Зинаида Владимировна мылкыд кариз кузпалызлэсь архивзэ Геннадий Красильниковлэн музеяз сётыны. Нылкышнолэн дораз утисько на вылэм писательлэн но журналистлэн печатлан машинкаез, тулыс-сӥзьыл нуллоно пальтоез. 12-тӥ сентябре ваньзэ сое Зинаида Романова сётӥз музей юртэ. Соос пӧлын вал Федотов кие кылемъёсыз но. Таоссэ музее вуттӥз ни Писательёслэн союззылэн ёзчиез, радиожурналист Владимир Михайлов. Романовлэн но Федотовлэн люкам ужъёссы со доры вуиллям ог толэзь талэсь азьло — Анна Федотова вазиськем, соосты интыяны курыса.

Музей юртэн кивалтӥсь Оксана Москова, архивез кутыса, вераз:

— Туж бадӟым уж лэсьтћды, таӵе узырлыкез Кузебай Герд нимо национальной музейлэн ёзаз вайыса. Удмуртиысь писательёслы сӥзем кун музей шаерамы одӥг гинэ. Владимир Романов вань мылкыд карисьёслы выль сямен усьтӥськоз. Но архивысь материалъёсты калыке поттон понна трос ужано луоз ай. Кагазъёсты радъяно, опись лэсьтоно. Собере гинэ со вуоз национальной музейлэн огъя фондаз.

Оксана Геннадьевна озьы ик пусйиз: Владимир Романовлэсь но мукет писательёслэсь творчествозэс туала пиналъёслэн, егитъёслэн сюлэмъёсазы вуттон понна адӟытонъёс но экспозициос гинэ тырмыт ӧвӧл. Музей уже туала шӧм пыӵатоно, выль амалъёсты, техникаез кутыса, со ужрадъёсын пиналъёслэн но куараоссы мед чузъяськозы.

Владимир Романовлэн архивез тунсыко луоз студентъёслы, тодосчиослы, дышетӥсьёслы, журналистъёслы но мукетъёсызлы. Троссэ со ортчеменыз пумиськытоз. Егит гожъясьёс кылбурчилы вазиськылӥзы, визь-кенеш курыса, нырысетӥ чуръёсынызы тодматылӥзы. Папкаосын трос рукописьёс, гожтэтъёс кыллё.

Владимир Романов улонысь кошкем бере эшез — кылбурчи Михаил Федотов — малпа вал со сярысь книга гожтыны.

Кузпалыз Зинаида Романова дорын утиськись архивысь фотографиосты, эшъёсызлэсь гожтэтъёссэс, рукописьёссэ, аслэсьтыз кылбурчилэсь поттымтэ ужъёссэ огинэ люказ. Но малпанзэ быдэстыса ӧз вутты, ӝоген ачиз но улонысь кошкиз.

Михаил Федотовлэн дораз кема аръёс ӵоже утиськем папкаосын люкамын вал Владимир Романовез буре ваён гожтэтъёс но, со пӧлын — Алла Кузнецовалэн, Юрий Шарычевлэн, озьы ик аслаз Михаил Федотовлэн. Владимир Васильевичлэн вордскемез дырысен туэ 70 ар тырмиз, нош Михаил Ивановичлы 55 тырмысал. Арлыдо эшезлы но дышетӥсезлы сћзёнъёссэ лыдӟисьёс дорозь ӧз вутты, но та кык дано кылбурчиослэн гожтыса кельтэм чуръёссы туннэ выльысь улӟозы.

Лия Малых
Туспуктӥз Владимир Беломорских

Удмурт Дунне
By Удмурт Дунне 17 сентября, 2013 11:24