Кужмо инъет

Удмурт Дунне
By Удмурт Дунне 28 сентября, 2013 13:30
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кужмо инъет

Удмуртиысь парламентлы 75 ар тырмонэз кыӵе мылкыдын пумитало Кун Кенешысь, Кун Думаысь депутатъёс, та удысысь ветеранъёс?

0af53099Валентин Тубылов, Удмурт Республикаысь Вылӥ Кенешлэн 1990-тӥ-1995-тӥ аръёсы Тӧроез, «Удмурт Кенеш» огазеяськонлэн дано президентэз:
— Шуныт мылкыдын тодам вайисько Вылӥ Кенешын ужам аръёсме. Кыӵе гинэ ужпумъёс-юанъёс эскеремын но юнматэмын ӧй вал со вакытэ. Туала депутатъёс шоры учкисько но валасько: быдэстэм ужмы юнме вылымтэ. Улон тупатске, валтӥсь интые потӥз адями, калык.

75 ар ӵоже улон олокыӵе но вал. Калыкен быръем депутатъёслы Быдӟым ож пыр но ортчизы, куашкам странаез но ӝутћзы. Кылем даурысь 90-тӥ аръёсы басьтӥськоно луиз куашкатэм удысъёсты ӝутон-радъян борды. Али адӟиськомы ини: та уж рос-прос быдэстэмын. Шумпотӥсько, закон кылдытъян удысэ егитъёс кыстӥсько шуыса. Озьыен, 75 ар талэсь азьло мытэм ужмы азинске, ӟеч емышъёс сётэ.

SHUDEGOV_14505aВиктор Шудегов, Россиысь куатетӥзэ ӧтчам Кун Думаысь депутат, Дышетонъя комитетлэн кивалтӥсезлэн воштӥсез:
— Республикаямы парламентэз кылдытэм дырысен 75 ар тырмон — со зэмос праздник! Мон асме но та дано ужрадэн герӟасько, угось кема аръёс ӵоже тыршисько ни законъёс кылдытъян удысын: Кун Думаын, кылсярысь, кык ӧтчамъёслэн ужазы пыриськисько ни.

Кун Кенешысьтымы депутатъёсмес та праздникен ӟечкылаз Кун Думалэн спикерез Сергей Нарышкин но: солэсь шуныт кылъёсын гожтэтсэ лыдӟимы Кун Кенешлэн сессияз. Кыӵеен тодэ вайыны но дунъяны луоз парламентлэсь юнман сюрессэ? Мон вакчияк верасал: та дыр ӵоже лыдъяса быдтонтэм трос ужъёс лэсьтэмын. Азьвыл аръёсы кылдытэм кужмо инъет луонлык сётэ улонмес туала вакытэ азинтыны, нуналмысь кылдӥсь шуг-секытъёсты палэнтыны.

Котькулы тодам кылёз 1999-тӥ ар — Кун Кенешлэн одӥгаз сессияз депутатъёс монэ юнматӥзы республикаысьтымы Правительстволэн Тӧроезлы воштӥсе. Кыӵе ӟырдыт мылкыдын ортчиз со! Котькуд ужпумез депутатъёс, котыр ласянь бергатыса, рос-прос малпаськыса, юнматылӥзы. Нокин шып ӧз пукылы, соиз я таиз закон пумысен котькудӥз малпанзэ вераны тыршылӥз, ма, споръяськонъёс но потылӥзы.

Туннэ нуналлы вераны луоз ни: Кун Кенешлэн ужаз рос-прос система кылдытэмын. Котькудӥз ужпум кушаса кадь эскериське, одӥг юан но палэнэ уг кыльы. Та ласянь тужгес но шӧдӥське «Огъя Россия» фракцилэн тыршемез: отчы тужгес но трос депутатъёс пыро, сюлмаськытӥсь ужпумъёсъя соос огкыл ӝог шедьто, таин валче законъёс улонэ ӝоггес пыӵало, кыӵе ке кужмо ӵашетонъёс уг кылдо. Таиз туж пусйымон. Но мукет ласянь, куддыръя сюлэмам мӧзмон каръяське — тодам лыкто парламентмылэн историысьтыз ӟырдыт кенешонъёс, ченгешонъёс…

uractАндрей Ураськин, витетӥзэ ӧтчам Кун Кенешысь депутат, Удмурт театрлэн кивалтӥсез:
— Историмес ум вунэтӥське: сое пусъён улсын шаерамы ортчо пӧртэм ужрадъёс.

Кылем даурлэн пумаз калыклэн кун властьлы осконэз тэшканы ӧдъяз, странаын огыр-бугыр луиз. Егитъёслэн кунмылэсь возьдаськон мылкыдзы но кылдыны кутскиз. Шумпотымон: та шекъёс туннэ нуналлы палэнтэмын. Калыклэн улонэз ӟечоме, кивалтӥсьёслэн сётэм кылзы быдэсъяське. Закон кылдытъян но рос-прос радъямын, депутатъёс тыршо обществоын кылдӥсь лэчыт юанъёсты ӝог сэрттыны-пертчыны. Егитъёс пӧлын но Атыкай музъеммес данъян мургес но мургес пыӵа. Ма, учке ай, Америкаын улӥсьёс, кунзэс данъяса, юртсы йылэ ӝутыны быгато куншетсэс. Маин асьмеос пӧртэмесь? Оло нош соослэсь кужмогес яратӥськомы кунмес! Соин ик, малпасько, ӟечезлы оскон кунамы эшшо но юнмалоз. 75 ар куспын талы кужмо инъет кылдытэмын ни.

chirkova_emЕлена Чиркова, витетӥзэ ӧтчам Кун Кенешысь депутат, Эгра ёросысь «Зуринский агрокомплекслэн» кивалтӥсез:
— Кун Кенешлэн депутатэз луыса тыршисько бере, парламентлы 75 ар тырмон мон понна но туж дуно. Гуртоосын кенешыса, малпанэ вуиськод: кун властьысь ёзъёслэн ужамзы сярысь соос туж ичи тодо. Таӵе дыръя мар веранэз на кужмо граждан позицизы яке кыӵе ке ӵектонэн потэмзы сярысь. Депутатъёс, озьы ик властьлэн быдэсъясь ёзъёсысьтыз кивалтӥсьёс улонмес котыр ласянь ӝутыны тыршо. Но со дыре ик тыршоно калыклэсь но тодон-валанзэ будэтыны. Ӝутскем мылкыдын пумитай тани мае: Кун Кенешысь депутатъёс шаерысьтымы школаосын нуыны ӧдъязы парламентаризмлы сӥзем урокъёсты. Малпасько, та уж паськыт но пайдаё радъяськоз, пиналъёслэсь тодон-валанзэс будэтоз, улонын шонер сюрес бырйыны юрттоз.

Елена Никитина

Удмурт Дунне
By Удмурт Дунне 28 сентября, 2013 13:30
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<