Калык азе потӥсько ке, куанӥсько

Удмурт Дунне
By Удмурт Дунне 6 сентября, 2013 11:05

Калык азе потӥсько ке, куанӥсько

Д. Фонвизинлэн "Ослоп" спектакляз К. Никитин шудэ ослопез

Д. Фонвизинлэн «Ослоп» спектакляз К. Никитин шудэ ослопез

Константин Никитин — Щепкин нимо театр училищеез туэ быдтэмъёс пӧлын азьветлӥсь. «Узы-боры» киноысь Максим, «Шунды» казакпи, кырӟась но ӝытъёсты нуись.

— Костя, бертӥд…

— Бертӥм, эсьмаса. Али ӧраз пыриськом. Нырысь гастрольёсы потам, гудырикошконэ театрын репетициос кутскизы ни. Милемыз Мувӧйя но газъя институтлэн ӵыж-выль огъяулоннияз пырто. Таиз понна театрлэн директорез А. Ураськин сюлмаськиз. Вуоно аре культураын ужасьёслы юртэз пуктыса вуттозы ни, шуо.

— Удмурт егитъёслэн тулкымазы зымид. Алигес кырӟан гожтӥд. Кырӟась но луэмед потэ-а?

— Копак универсальной уд луы, дыр. Тыршоно адскыны отын но, татын но. Малы кырӟаме потэ? Огласянь, кемалась потэ вал ини — театре выемлэсь азьло ик. Мукет ласянь, кырӟаны быгатон — бадӟым плюс. Репертуар вань ке, капчигес коньдон жильдыны.

— Кыксэ гинэ кырӟандэ тодӥсько.

— «Яратонэ» («Пот ни, пот…») гурез Дима Загребин кырӟа вал. Мыным та кырӟан малы ке туж кельшиз, Дима сое кузьмаз. Мыным соку 17 арес гинэ вал ай. Ижкарын 4 номеро лэсьтӥськонъя лицейын дышетски, 9-тӥ класс бере электрогазосварщик луыны малпасько вал. Дышетски но — мар ке сюлэмам ӧз лякиськы (серекъя).

— Соку ик удмурт егитъёс борды кыстӥськид, луоз?

— «Шунды» огазеяськонэ кыскизы Эграысь Люба Громова но Пичи Пурга ёросысь Гожняысь Люда Чернова. 2007-тӥ арын «Шундыкаре» ветлӥ. Мон соку удмуртъёслэн движенизы сярысь воксё номыр но уг тодӥськы вал. «Шунды» али ке но бордаз возе. Туэ со мыным выль проектъёсыныз (турслёт, лаборатория) кельшиз.

— «Яратӥ-яратӥ» кырӟандэ Анатолий Эркишев дорын гожтӥд. Тазэ но кемалась кырӟаськод кадь?

— Нырысьсэ удмурт кылын со 2009-тӥ арын «Усточикар» лагерьын чузъяськиз. Мар мыным кельше «Усточикарын» — смена бере пиналъёс концертэн гуртъёсы потало. Удмурт кылэ та бигер кырӟанэз Фанил Нуриахметов берыктӥз. Соку, баянэн шудыса, кырӟамы. Гожтыны ӧй ваньмылы, туэ гинэ «Камали» студиозь вуи. Толяен кылмы тупаз. Шӧдӥсько, со но вите, тани-тани мар ке вылез «пуштоз» шуыса… Огазьын ужаны кельшиз.

— Коля Анисимов бигерзэ кырӟа, Тимерханова но… Тынад кырӟан дуннеед маин висъяськоз?

— Аслэсьтым гожтэм гуръёсме кырӟаме потэ. Кылбурчиос но вань, вӧзам ик тани Лёша Котков. Ӵош дышетскем пиосынымы гуръёс гожтылӥм ни. «Узы-боры» съёмкаос дыръя «Вераме потэ, нылъёс» кырӟан гожтӥм. Сое, зэмзэ вераса, бурят пиослэсь асэстӥм вал.

— Зэм-а? Тазэ уг тодӥськы вал. Иське, милемыз, нылашъёсты, алдады: тӥ понна гожтӥм, шуиды вал…

— Сокем ик ӧм алдалэ. Удмурт кылъёссэ Коля Смирнов гожтӥз. Киноын мукет гуръёсмы но вань, соосты улӟытыны луэ.

— Кырӟась удмурт пиос укыр трос ӧз-а луэ? Котельников, Уллапала Бой, Белослудцев, Йорга Каче радэ пыриськод…

— Ма, мон, нырысь ик, театрысь актёр. Калык азе потӥсько ке, куанӥсько. Азьло сцена вылын туж возьдаськисько вал, мултэс вамыштыны кышкалляй.

— Матысь дыре кытын выступать карод?

— 19-тӥ куарусёнэ «Пепелац» клубын удмурт позыръяськонын. Наташа Бурановаен ӵош ӝытэз нуыны кулэ вал, но уг пӧрмы — бызе, шуо.

— Паръяськыны вакытэд вуэ ни. Ӵош дышетскем нылашъёсты Наташа Васильева но Таня Сунцова Муское кылизы шуыса, кӧтты ӝож ӧй вал-а?

— Шуак бызизы — ӧз но вералэ. Таиз милемлы сюрприз вал, нокин ӧз тодылы. Ма, шаплыесь: военнойёсты шедьтӥллям — Удмурт театр соосты амалтэк лэзёно луиз. Нош «Девы» спектакль жаль потэ ик — нылъёс џапак отын шудӥзы вал. Туж зол постановка. Учкисьёс синвуаськыса пуко. Тамбове потакумы, кошкыны лэзьытэк, кема чабыса сылӥзы. Али вераськонъёс вань ик, та пьесаез улӟытоно шуыса.

— Ачид но кышно басьтыны уд-а малпаськы? Курсады кузъяськемъёс вань ни: Марина Самсонова но Вадим Дмитриев, Настя Шубина но Алёша Котков.

— Али нылашен йырин ӧвӧл. Кышнояськи ке но, кытчы кышноме пыртом? Коркае ке луысал…

— Выль сезонэз маин усьтоды?

— 83-тӥ театр сезонэз усьтомы 25-тӥ-26-тӥ коньывуонэ Д. Фонвизинлэн «Ослопеныз». Али «Горе от ума» пьесаез дасяськомы. Мускоысь режиссёр Сергей Яшин пуктэ. «Вальс-фантазия» порма лэсьтомы, шуэ. Грибоедовлэн гожтэмез, зэмзэ верано ке, туж мӧзмыт ук! Ӟеч педагог, Щукин училищеын дышетэ. Спектакльмы дуно ик усиз. Но тунсыко йӧтэ. Шудӥськом ваньмы ик, массовкаын отчы-татчы бызьылӥськом, сцена вылысь ум ик васькаське. Максим Григорьев но Слава Осипов Чацкиез шудо, Милон — Серёжа Наговицын, Юра Ерошкин.

— Тыныд герой-любовник амплуа сётыны ярато кадь.

— «Щепкаын» дышетӥсьёс малы ке сыӵеен адӟизы. Максим Григорьев, Костя Ложкин тани серемес геройёсты шудо. Мынам но куддыр комик луэм потэ. Мукет ласянь, Костяез герой-любовникын син азе пуктыны ик уг луы. Со сцена вылэ потэ ке, учкись пальыша ни.

— Тонэ кыкетӥ Алексей Ложкин шуыса нимасез вань. Максим Князевен та нимез «люкыны» уд-а выриське?

— Князевен? Кыкетӥ Ложкин — со всё-таки мон! (Серекъя). Ложкинэн ӵош тупакумы, юасьёс сюрылӥзы ини: Лёша, пиед ӧвӧл-а та? Мирошкаез, шуисько. Алексей Арсентьевич зол юрттэт сётэ. Кызьы тодматским, весь котырамы выре. Театрын поръя ӟеч мылкыд, коллектив шуныт. Нырысь гинэ милемын таӵе выро, кожаськом вал, но чик но озьы вылымтэ.

— Мае витиськод театрлэсь? Кыӵе спектакльёсты сцена вылын адӟемед потэ?

— Ӟеч режиссёръёслы оскиськом. Визьмо йыръёс уггес тырмо, лэся. Зэмзэ вераса, классикаез шудыны акыльтӥз ини. Комедиосын но чакласьконо (шаерамы берытскемлэсь азьло театрлэн вотэсбамаз пырим но — отын комедиос гинэ, куалектӥм ук!). Мускоын дышетскыкум, монэ зол чепыльтӥз МХАТ-ысь «Пролётный гусь» постановка. Пичи сцена, кут лобам кылӥське. 2 час ӵоже учкисьёс шокчыны ӧз дӥсьтэ. Милям но камерной театр сярысь чагыр малпанъёсмы вань… Труппаенымы ӵош эскерон вылысь выльзэ усьтыны умой луысал.

— Мар люкетэ нош?

— Интымы ӧвӧл. Пичи сценалы котыр, куара, тыл кулэ уга. Удмурт театрлэн сценаез — со мукет. Нырысь бадӟым сценалэсь курдаллям, дышымтэ вал. Но тани дышиськом. Кивалтӥсьёсмы шуо: ужалэ гинэ!

Дарали Лели
Туспуктӥз Ольга Глухова

Удмурт Дунне
By Удмурт Дунне 6 сентября, 2013 11:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<