Яратон уг пересьмы вылэм

Удмурт Дунне
By Удмурт Дунне 13 сентября, 2013 16:10

Яратон уг пересьмы вылэм

Г. Бекманов

Г. Бекманов

Дэри черкогуртысь арлыдоослэн «Мӧзмон» клубазы землякенымы Удмурт Республикаысь дано но калык артистэн Геннадий Бекмановен пумиськон ортчиз. Черкогуртамы вань усто куиськисьмы Светлана Жданова. Со Геннадий Ивановичлы быдэс уй куиз синпель, отын гожтэмын «Яратон уг пересьмы». Зэм но, ми туж яратӥськом сое, яратонмы ноку уз пересьмы. Геннадий Иванович милемлы ӟеч но капчи мылкыд кузьмаса кельтӥз, ачиз сярысь трос тунсыкозэ вераз.

— Пичи дыръям анае ас интыяз пастухе лэзья вал, — тодаз вайиз Геннадий Бекманов. — Вазь ӵукна султэм уг поты, но ма карод — анай косэ ке, одно ик кылзӥськоно. Шунды пӧсь, нунал кузь потэ вал, кытӥяз кырӟалляй но.

Арганэн шудыны бадӟым братэлэсь дыши. Но мыным сое туж ик уг оско вал, кытӥяз пуконэз, киям кутыса, арган интые кыскалляй.

Школаын дышетскыкум, 4-тӥ-5-тӥ классысен, умой быгатӥ баянэн эктон но кырӟан гуръёсыз шудыны. Соку ини ӧтьылыны кутскизы солдат пиез армие келянэ. Классэн кивалтӥсьмы школалэн директорезлы верам: Бекманов, пе, трос урокъёсыз келля, армие кошкись пиосыз келяны ветлэ. Директор дораз ӧтиз но шуиз: «Мынэсьтым юаськытэк, уд ни мыны солдат келянэ». Армие кошкись пи ачиз директор доры мынэ но юа вал: яралоз-а Геналы, пе, монэ келяны? Собере дорам лыктэ но шуэ: «Ойдо, директор лэзиз». Мон шумпотыса мынӥсько ини машиналэн кузоваз, баянэн шудыса, Дэриысь военкоматэ. Нош ӵуказеяз директор ӧте но шуэ: «Малы ветлӥд, мон ведь ӧй лэзьы вал».

Бадӟым классъёсын дышетскыкум, клубе ветлыны кутски, спектакльёсын шудӥ. Дас класс бере Ижын культпросветучилищеын одӥг ар дышетски но, армие басьтӥзы. Бертэме бере удмурт кылъя но литературая дышетӥсе Зинаида Семёновна Ниязова Уфаысь искусствоосъя институтэ пырыны дэмлаз. Отын ини мон артист луи.

Ог сю пала рольёс шудӥ, дыр, Удмурт театрын, но самой яратоно но мур роле — Егор Загребинлэн «Кикы нош силе но силе» пьесаысьтыз Кузебай Герд. Котькуд рольмес дышетӥськом 3-4 толэзь. Ульчаын но, базарын но, трамвайын но, уйин кӧлыку но, образ пушкы пырыса, кылъёссэ дышетӥськом. Азьвыл театрын суфлёръёс вал ке, али ӧвӧл ни. Пьесаын гожтэм кылъёсыз, одӥгзэ но воштытэк, сцена вылын вераны кулэ, со капчи уж ӧвӧл.

Удмуртъёслы одно ик спектакльын кырӟанэз мед луоз, сотэк кӧтсы уз тыры. Баянэн шудэмъям кырӟаме потыны кутскиз, йырам крезьгуръёс но лыктыны ӧдъязы. Одӥг пол мылкыды секытгес вал, Галина Романовалэсь кылбурзэ лыдӟи но соку ик гур пуктӥ: «Тон ӧвӧл мынам, мон ӧвӧл тынад, ыштыны гинэ шедьтӥськем тонэ». Аслым но яраз, калык но умой пумитаз кырӟанме.

Та кылбурлы валэктон гожтӥз Владимир Романов — «Яратон уг пересьмы». Озьы кылбуръёс пӧлын бугыръяськыны кутски. Самой дуно кырӟанэ — Анатолий Перевозчиковлэн кылъёсызъя гожтэм «Аргурезь». Отын удмуртъёслэн улон шоры учкемзы, историзы возьматэмын.

Тодам лыктэ таӵе учыр. Ог 10 ар талэсь азьло гастролен ветлӥм Башкириысь удмуртъёс доры. Туж шуныт пумитазы — 5 ар ӧм ветлэ ни вал доразы. Отысь бертӥм но, Алла Кузнецовалы шуисько: гожты вал палэнысь удмуртъёс сярысь кылбур, кыӵе мӧзмо соос асьмелэсь. Кык час гинэ ортчиз, Алла 15 куплетэн кылбур вайиз. Ваньмыз умоесь, кудзэ куштыны ик уг валаськы, нош кырӟанлы 4-5 куплет гинэ кулэ. Йырам соку ик лыктӥз крезьгур, визьтэммыса мынӥ театре, соку ик шудӥ но кырӟай. Театрын шутэтскон нунал вал, нош мынам кинлы ке но кырӟаме потэ. Кышномурт сторожлы шудӥ но кырӟай. Ма, номыр ӧвӧл кадь, шуиз.

Кинлэсь ке кылбурзэ бырйисько ке, со адямиен одно ик пумиськисько, соин вераськисько. Кылбур — со одӥг, нош улэп адями — мукет. Людмила Кутяновалэсь кылбурзэ синйылтӥ, пумиським паркын скамья вылын. Пыдъёсы, пе, висё, трос ветлыны уг ни быгатӥськы. Пумиськонысь бертыса, син азям пуктӥ: кыӵе солэн эктэмез потэ, дыр, тани монэн вальсын берга. Соку ик йырам крезьгур лыктӥз, гожтӥ «Берпуметӥез вальс» кырӟанме.

Огвакытэ театрысь кошкылӥ, Александр Баймурзинэн, Евгений Андреевен «Катанчи» ансамбль кылдытъямы. Удмуртие лыктыны кулэ «На-на» ансамбль, соосыз пумитаны оскизы милемлы. Стадионын ог 5 сюрс адями люкаськемын. Пумиськонэз нуись ялӥз: «Асьме дорын куноын «На-на» группа». Ох, чабо ук егитъёс, шумпото, кесясько. Собере шуизы: «Нош табере тӥ азьын «Катанчи» ансамбль. Стадион шыпак луиз. Ми, ма карыны валатэк, ог-огмы шоры учкыса, сылӥськом. Кырӟамы куинь куараен, бубенъёсын. Туж зол чабизы. Паймоно кадь, Удмуртиын улӥсьёс кыдёкысь группаез тодо, нош асьсэлэсь артистъёссэс кылэмзы но ӧвӧл.

Мария Ишматова.
Дэри черкогурт

Удмурт Дунне
By Удмурт Дунне 13 сентября, 2013 16:10
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<