Ижкарын трос чебер нылъёс

Удмурт Дунне
By Удмурт Дунне 20 сентября, 2013 11:18
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Ижкарын трос чебер нылъёс

Гордъёс асьсэды возьматӥзы пӧртэм вожвылъяськонъёсын

Гордъёс асьсэды возьматӥзы пӧртэм вожвылъяськонъёсын

Ижкарын куарусёнэ «Горд фестивалез» ортчытон ӟеч сямлы пӧрмиз ини. Та празднике шулдыръясько ваньзы: бадӟымъёс но, пичиос но, горд, сьӧд, тӧдьы йырсиё муртъёс.

Арысь аре «Горд фестиваль» котыраз тросгес но тросгес калыкез люка. Таяз куарусёнэ со радъяськиз Ижысь Шор площадьын, Космонавтъёслэн парказы, Кызьпу арамаын, «Динамо» стадионын но М. Горький нимо садын. Вань мылкыд карисьёс быгатӥзы пӧртэм мастер-классъёсы вуылыны, спортъя ӵошатсконъёсын кужымзэс мертаны, «Горд чеберайёслэсь» вожвылъяськонзэс учкыны, Киров ураметӥ велосипедэн ширъяны, Гоша Куценколэсь кырӟамзэ кылзыны.

Уно нылпиосыз но егитъёсыз огазеяз «Шундыкар» площадка. Котьку сямен удмурт егитъёслэн «Шунды» огазеяськонзылэн ёзчиосыз тунсыко мастер-классъёс ортчытӥзы: дышетӥзы яркыт суйпоскесъёс (браслет) пуныны, чебер сяськаос лэсьтыны. Дасямын вал пӧртэм конкурсъёсын программа. Кылсярысь, пиналъёсыз куризы Ижкарез яратэмзы сярысь вераны. Яратонзылэсь мугъёссэ — татын мынам калыке улэ, Ижкарын вордӥськи, милям тужгес но чебер нылъёс но мукет — конкурсэ пыриськисьёс удмурт, ӟуч, англи кылъёсын веразы! Тунсыко вал мукетыз вожвылъяськон но: жаг тырон гордалэс-ӵуж пуйыосты, скотчез но качыез уже кутыса, командаос Горд чеберай пӧрмытыны тыршизы. Собере со чеберайёс, «выль» дӥськутсэс куштытэк ик, шулдыръяськонзэс азьланьтӥзы.

Площадкаын ӧз чалмылэ удмурт кырӟанъёс. Пӧртэм конкурсъёсы пыриськем сяна, люкаськемъёс концерт учкизы. Соосты шулдыртӥзы Алина Антонова (со ик нуиз ужрадэз), Надежда Данилова, Анастасия Рысаева но «Берекет» группа.

— Мон туж пайми но шумпотӥ, «Шундыкарамы» удмуртъёслэсь но трос ӟуч пиналъёс анай-атайёсынызы лыктӥзы шуыса. Соос вожвылъяськонъёсы туж мыло-кыдо пыриськизы, — вераз «Шунды» огазеяськонлэн тӧроезлэн воштӥсез Ренат Гафуров.

Динамо стадионын «Горд батыр» вожвылъяськон ортчиз. Гурт шудонъёсын гозы кысканъя ӵошатсконъёсын вормисе потылэм командаос нош ик ваче пумиськизы. Соос борды итӥськизы на «Удмуртнефть» огазеяськонысь воргоронъёс. Кужмо нюръяськонын нырысьсэ чемпион луизы мувӧй поттон удысын ужасьёс, кыкетӥ но куинетӥ интые потӥзы Грак но Пичи Пурга ёросъёсысь командаос.

Ужрадэз йылпумъяз американ футболэн шудон. «Ижевские сталевары» пумиськылӥз Пермьысь «Стальные тигры» командаен. Куноос 48:6 лыдын асьмелэнъёсты коказы.

— Та фестиваль 2004-тӥ арысен радъяське, туэ дасэтӥзэ ортчиз ни. Мынам огпол-кык пол гинэ сое кельтэме вань, мукетъёсаз ваньмаз эшеным ӵош ветлӥ, — вера ужрадэ пыриськись Людмила Белых. — Котькуд ар гордалэс-ӵуж костюмъёсмес дӥсяськом (соосыз нимысьтыз та праздниклы вуримы) но шулдыръяськиськом. Мон туж яратӥсько эктыны но концертъёс учкыны. Озьы ик котькуд аре «Горд фестивальын» конкурсъёсы пыриськисько, кузьымъёс басьясько. Туэ но, карнанэн бызьылыса, ческыт саламъёс утӥ.

Мукетсэ ческыт саламез — бадӟым перепечез — Шор площаде вуэмъёс адӟыны но веръяны быгатӥзы. «Перепечкинъёс» та фестивальысен метр быдӟа перепеч пыжизы. Ческыт вал-а — уг тодӥськы, но тусызъя огшоры перепечлэсь зол висъяськиз.

Елена Рябина,
Валентина Емельянова

Удмурт Дунне
By Удмурт Дунне 20 сентября, 2013 11:18
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<