Дырызлэсь вазь чилектӥз

Удмурт Дунне
By Удмурт Дунне 17 сентября, 2013 12:24

Дырызлэсь вазь чилектӥз

В. Романов. 1987-тӥ ар

В. Романов. 1987-тӥ ар

Владимир Романов, яке калыкын, огшоры вераськонын — Володя Романов. Мар со сыӵе вал — удмурт литературалэн чагыр инбамаз?

Чебер, шундыё нуналэ витьымтэ шорысь гудыри-а? Яке ваньзэ сутӥсь кӧс куазен писпуослэсь, турынъёслэсь сюзэс юзматӥсь шуныт зор-а? Оло нош со зэмлыкез ватыны тыршисьёслэсь сюрессэс ваментӥз-а: чилектӥз ик лушкем пеймытын, лушкам югытэз берен инбаме ӝутӥз?!. Котькызьы бергаты но, адямиез уд берыкты. Нош огнад дыръя, асэныд ваче син вераськыкуд, сюлэм шымырскылэ ик, бышкалтӥсь юанэн вазиське: «Малы, малы ӧм уте эшмес, солэсь сюсьтылзэ сильтӧллы сётӥм?» Уг тодӥськы, ку (арез пусъемын ӧвӧл) Владимир Васильевич кагаз кесэге гинэ гожтэм аслыз эпитафия выллем сюлэмез пильымон чуръёс:

Кема улӥ ке мон
дунне вылын,
Эшъёс, тӥ шуэ:
ми сое юн яратӥм.
Вазь кулӥ ке, шуэлэ,
эшъёс:
Дыраз ӧм быгатэ
кужмо яратыны.

Та ньыль чурез лыдӟыса, кин ке вералоз, гожтӥсьлэн улонэз капчи вал шуыса? Бен, со кылдэмын, нош зэмзэ вераса, зэмос эшъёстэк, чылкыт омыртэк ӝокась сюлэмыз бордысь пызьыртэмын кылбурчилэн самой секыт вакытаз. Соку со нокинлы но кулэ ӧй вал: ассэ, пе, умойтэм возе, асьме страналэсь моральной кодекссэ тӥя Поэтлэн нимыз кивалтӥсьёслы синмазы висьытӥсь шырпулы пӧрмиз. Солэсь статьяоссэ но берыктэмъёссэ куд-ог «жалясь» редакторъёс мукет нимын (псевдонимен) печатланы кутскизы.

Нош зэмзэ ке верано, Владимир Романов шудо адями вал. Эшшо егит дыръяз адӟиз данэз, кылбурчи туж вазь быдэ вуиз, котыраз котьку но бергаллязы сое гажась эшъёсыз. Владимир Васильевич туж яратӥз улонэз, нош улон сое малы ке ӵем ик ӧз вешалля, ӟоскыт коркаяз кынтӥсь тӧлзэ погъялляз. Кылбурчи ялан витиз шунды сиосты, адями сюлэм шунытэз. Трос пол солэн югыт дуннеез сюбегалляз вень пасьтӥ потымон югытозь. Соку кулэ вал, дыр, ӟеч вазиськем, буйгатӥсь кыл, эшезлэн мычем киыз. Нош улонлэн пумыз мукет вал — со луиз Дырызлэсь вазь чилектэм кадь. Зэмос кылбурчиез калыкын ялан туж витё: солэн кужымезлы, яркыт талантэзлы музозь ик йыбырттӥм.

Та кылбуръёс В. Романовлэн архивысьтыз басьтэмын, соос татчыозь нокытын но поттылымтэ на. Жаляса верано, чуръёсызлэсь ку гожтэмзэ автор пусйымтэ, шӧдэмея, соос кылдытэмын 1980-тӥ-1986-тӥ аръёсы.

Михаил Федотов,
арез пусйымтэ.

Удмурт Дунне
By Удмурт Дунне 17 сентября, 2013 12:24