Дауръёс пыр поттоз квартал

Удмурт Дунне
By Удмурт Дунне 5 сентября, 2013 09:56
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Дауръёс пыр поттоз квартал

П. Башенинлэн дачаяз кылем дауръёсысь уно арбериос возисько

П. Башенинлэн дачаяз кылем дауръёсысь уно арбериос возисько

«Музей квартал» проект сярысь вераськонъёс трос вал ни. Со Сарапуллы выльдӥськыны юрттоз, туристъёсты купеч городэ кыскоз. Та проектэн тодматскыны удалтӥз Мугорез кыдатон культурая, спортъя но туризмъя министерстволэн Сарапулын ортчем кенешаз.

Кыӵе вал Кам дурысь город 18-тӥ-19-тӥ дауръёсы, кинъёс отын улӥзы, «Музей кварталлэн» презентацияз лыктэмъёс ас синмынызы адӟизы. Соос пумитазы В. Михинэз — 19-тӥ дауре Сарапулын улэм узыр купецез — со кадь дӥсяськем адями нуиз экскурсиез. Синмаськымон Башенинлэн дачаез! Кӧня со сярысь кылэм вал! Вож писпуос пӧлын сылэ тӧдь-тӧдь юрт, со азьын — фонтан. Нош корка пушкын уно суредъёс, дуно дӥськутъёс, трос пӧртэм чыры-пырыос — ваньмыз кылемын Башенинъёслэн семьязылэсь. Кварталтӥ ортчыку, вуылӥмы пряникъёсын-шудонъёсын ярмаркае, А. Пушкинлэсь скверзэ, реальной училищеез, нылкышно гимназиез, госпиталез адӟим. Зэмзэ 18-тӥ-19-тӥ дауръёсы вуылӥмы кадь!

Валамон, вашкала юртъёсын али пӧртэм ведомствоос интыяськемын, озьы ке но огез мукетэзлы уг люкеты: вуж архитектура исамын ӧвӧл, коркаос вашкала туспуктэмъёсъя выльдылэмын.

— Культураез но туризмез азинтон — таӵе ужпум пуктэ Д. Медведев. Ми малпамы, со городмылы азинскыны юрттоз: Сарапулын сомында тунсыкоез, тросэз понна тодмотэмез. Озьы ик шумпотӥськомы, кармес Россиысь Туризмъя пичи городъёслэн ассоциациязы пыртӥзы шуыса, табере ми одӥг радын Елабугаен, Угличен но мукет тунсыко каръёсын, — вераз Сарапул городлэн йырыз Анатолий Наумов.

«Музей квартал» проектлэн авторез Сабина Креклина малпанзэ туж аспӧртэмлыкоен лыдъя. Экскурсиын милемлы тросгес веразы дышетон удыс сярысь: кыӵе предметъёслы 18-тӥ-19-тӥ дауръёсы тужгес бадӟым саклык висъязы, кин школаосын но гимназиосын дышетскиз, кыӵе формазы вал… Но вераны луоз тазалыкез утён, азьвыл архитектура яке мукетыз сярысь но.

27-тӥ сентябре «Музей кварталын» ӧсъёс ваньмызлы усьтӥськозы: котькин быгатоз тодматскыны выль проектэн, Сарапуллэн историеныз. Ас поннад но та тунсыко маршрутэз ортчыны луоз: кварталысь котькуд юрт азьын азьвыл но туала туспуктэмъёсыныз, историеныз афишаос лэсьтэмын, мукетыз вашкала юрт доры сюрес возьматэмын.

«Музей квартал» сяна, Сарапулын «Надеждалэн карез» (Н. Дурова сярысь) но «Тодматске, Сарапул!» (городэз автобусэн котыртон) экскурсиос радъясько. Огкылын, мӧзмыт уз луы, тужгес но историен, культураен тунсыкъяськисьёслы. Озьы ик, Сарапулэ мыныса, одно ик Кам шурлэн ярдураз но вуылоно — со выжыкылын кадь чебер.

Елена Рябина
Туспуктӥз Константин Ившин

Удмурт Дунне
By Удмурт Дунне 5 сентября, 2013 09:56
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<