Дась ужаны

Удмурт Дунне
By Удмурт Дунне 24 сентября, 2013 15:35

Дась ужаны

Ижысь ульча-арт - удмурт кыллы реклама

Ижысь ульча-арт — удмурт кыллы реклама

Кун Кенеш бордысь Егитъёслэн парламентазы 60 мурт быръемын. Удмурт егитъёс пӧлысь солэн ужаз пыриськозы Вероника Ваулина, Александр Евсеев но Юлия Никитина. Парламентэ шедён понна соос конкурс пыр потӥзы. Нимаз быръемын на ёросъёсысь азьветлћсьёс, кылсярысь, Любовь Широбокова.

Юлия Никитина, Улосэз азинтонъя институтлэн быдэсъясь директорез:
— Конкурсэ пыриськи «Мерлыко огазеяськонъёслэн нуналзы» проектэным. Со сӥземын егитъёслэн мерлыко ужъёссэс вӧлмытонлы, асьме элькунын егитъёслэн мерлыко удысын азинскемзылы. Мерлыко огазеяськонъёслы со туж пайдаё луысал, малы ке шуоно кылдытэмын луозы пӧртэм тодон-валан бичанъя площадкаос (бухучёт, маркетинг, юриспруденция, проект гожъян, ивор вӧлмытон), вераськон-эчешон площадкаос, тужгес усто проектъёс сярысь мадись форумъёс. Таӵе нунал нырысьсэ радъяськоз Удмурт шаерамы но, Россиын но. Проект ньыль толэзьлы чакламын. Валтӥсь ужрадэз огазеяськонъёслы сӥземын. Туннэ проектэ каллен улонэ пыӵаны кутске ини.
Парламентын уж — со мон понна выль ӧр. Бадӟым мылкыды вань ужаны пӧртэм комиссиосын — социальной, выжы калыкъёслэн сюлмаськонъёсынызы яке дышетонэн герӟаськем юанъёсъя. Малпасько, пумен валало, кытын кулэлыке бадӟымгес луоз.

Вероника Ваулина, «Мынам Удмуртие» телерадиокомпаниысь журналист:
— Берло дыре социальной реклама сярысь вераськонъёс ӵем кылӥсько. Йырам малпан лыктӥз сое но удмурт кылын лэсьтыны. Ӵапак та проектэн ик дунъясь комиссия доры лыктӥ. Проект быдэсъяськемъя удмурт мерлыко реклама телевизорын, радиоын чузъяськоз, городъёсысь но гуртъёсысь бадӟым билбордъёс вылын кылдоз. Проектэ сӥземын егитъёслы, соин рекламаез дасян бордын ужалозы удмурт кылын вераськись егитъёс. Озьы соос улон шоры учкемзэс, тодон-валанзэс возьматыны быгатозы, озьы ик информациен ужанъя пӧртэм амалъёслы дышетскозы.
Туж тулкымъяськи, кызьы проектме дунъялоз жюри, быгато-а, уг-а ӟеч валэктыны. Сюлмаськемелы пумит монэ туж шуныт пумитазы, юанъёс мыло-кыдо сётъязы. Шуи: «Мон дась ужаны!», соку ачим но юн-юн валай кадь, мон зэмзэ но ужаны дась! Малпасько, парламентын удмурт калыкен, удмурт кылэн герӟаськем ужпумъёсты сэртто.

Любовь Широбокова, Якшур-Бӧдья ёросысь «Шундылэн» тӧроез:
— Зэмзэ вераса, уг тодӥськы, мар кароно вал парламентэ шедён понна. Мон уката но тупай, лэся, мукетъёсыныз ӵошатыса. Яразы, вылды, малпанъёсы, быгатонлыкъёсы, адямиосты вырӟытыны тыршеме. Шонерзэ верано ке, со зэм озьы пӧрме. Кытчы ке ӧтё ке, мынытэк уг чидаськы! Берло дыре гинэ «Рекорд Победы» акциез, тазалыкез утёнъя пумиськонъёсты ортчытӥ, ёросысьтымы азьветлӥсьёсын пумиськылӥ. Тужгес но бадӟым данъяськонэ — удмурт егитъёслы сӥзем «Ворекъян» фестиваль.

Дарья Шиляева
Туспуктӥз Владимир Беломорских

Удмурт Дунне
By Удмурт Дунне 24 сентября, 2013 15:35
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<