Чук ишкалтыны мед кылдоз!

Удмурт Дунне
By Удмурт Дунне Сентябрь 10, 2013 13:01

Чук ишкалтыны мед кылдоз!

Ӵушкон ошон сям уг вуны

Ӵушкон ошон сям уг вуны

Ӝоген нош ик пиосты армие басьтон вакыт вуоз. Кызьы азьвыл солдат пиосты келяллязы? Мар воштӥськиз туннэ?

Та юанъёслы валэктон утчаса, вазиськи Аксакысьтымы 84 аресъем Беткынэй Матӥ апайлы (Бектуганова Матрёна Терентьевна). Тани мае со тодаз вайиз:

— Нырысьсэ солдат пи келянэз 11 аресам адӟи. Война кутскон аре вал со. Солдатъёслы повесткаос вуылыны кутскизы 21-тӥ июне. Ноку но уг вунэты агай-вынъёсылэсь — Колялэсь, Васялэсь но Пашалэсь — войнае кошкемзэс. Али сямен соку солдат пиез ӧтчась ӧй вал. Соос асьсэос тодӥзы, кин доры кожалозы. Сьӧразы басьтылӥзы эшъёссэс, калъяськылӥмы ми но, пичиос. Сьӧраз ик — армие басьтыны лыктэм уполномоченной. Солдат пи келясьёс корка йыгасько но кырӟало:
Усьтоз меда, уз меда
Та ӵогам но капкаез?
Ӝуатоз меда, уз меда
Семилинейной
лампазэ?

Собере, корказе тубыса, ӧсэ йыгасько, пыро:
Ӟеч ивор но кылӥськиз но,
Ми пыроно кариським…

Кузёос ӝӧк вылэ пуктӥсько, «бекче» потто, ӝыны литръем бутылкаез озьы шуо вал. Война аре бон мар пуктозы ӝӧк вылэ? Шорем нянь, куртчыны картошка сюриз ке — ярам. Солдат пи эшъёсыныз ӝӧк сьӧры ӧжытак пуксьыло но потыса экто-кырӟало:
Тау карса ум кошкиське,
Нош ик вуом, дыр, али.
Кошкон часмы вуиз ни,
Милемыз келяны
лыктэлэ.

Коркась потон азязы, пукон вылэ султыса, мумыкор борды солдат пи чук шукке. Пурт куштэ выж вылэ. Мертче ке — бертонлы. Нош кырӟало:
Шуккылэм но, ой,
чукъёсме,
Чай юыкуды, учкелэ.
Вылаз тузон
пуксьылыку,
Небыт тылыен маялтэ.
Ачим ке но, ой, бертӥ,
Пиньыным ишкалтыса басьтыло.

Одӥг коркан кема ӧз ӝегаллялэ: уполномоченной дыртытъяз, кошкон час вуэ ни шуыса. Ӵыжы-выжызэс, эшъёссэс ортчыса, солдат пиос уробое пуксьылӥзы но, чыртыысьтызы ӵушконъёсынызы шонаса, кырӟаса кошкылӥзы.

Кошкон азязы калык, эх, бӧрдэ вал! Ма, аслам но туннэ но пушкы тыре, синкылие потэ. Тани Одой Иванлэсь (Пальников) кошкемзэ тодам вайисько. Вал уробое пуксем маке выльысь тэтчиз но шуиз: «Ой, одӥг пол коть аслам коркам эктыса кельто!» Келясь калык алэ синкыли пыр: «Ой, Иван, уг яра ук озьы — бырод!» Быриз.

Солдатэз йыраз лентаосын чеберъяны война бере кутскизы ни. Соку ик нылъёс пиослы пужыятэм ӵушкон сётылыны ӧдъязы, татӥязгес пичияк уксё сётӥсьёс но луизы. Сюрес вылын солдат пилы со туж кулэ ук.

Нош бертӥсь солдатэз кыӵе шумпотыса пумиталлязы, оло, быдэс гурт люкаськылӥз. Сокем бадӟым вал данэз асьмемыз утисьёслэн! Табере сыӵеез ӧвӧл ни, армие мынэмез но тросэзлэн уг поты. Я, солдат пи келянлэн самой яркыт тодметэз кылемын: чук шуккон но пурт куштон. Армие вань кошкисьёслы мед кылдоз шуккем чуксэс ишкалтыны.

Валерий Баймурзин
Туспуктӥз Александр Горбунов

Удмурт Дунне
By Удмурт Дунне Сентябрь 10, 2013 13:01
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<