Бумага чида…

Удмурт Дунне
By Удмурт Дунне 10 сентября, 2013 13:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Бумага чида…

_mon3799Утиськоз-а удмурт школа Башкириын?

Берло 20 ар куспын Россиын 9 сюрслэсь уно школаос ворсаськизы ни. Тросэз соос гуртъёсысь. Пӧлазы ӧжыт ӧвӧл удмурт школаос но. Тани Удмуртиын сюлэсь данакгес удмурт школаос пытсаськизы. Сыӵегес ик югдур Башкортостанын но. Ог вить ар талэсь азьло татын 58 удмурт школа лыдъяськиз. Нош али кӧня кылемын меда?

— Ми Башкортостанысь но Татарстанысь Дышетонъя министерствоосы удмурт школаос пумысен арлы быдэ вазиськиськом, — вера Удмурт Элькунысь дышетонъя но наукая министерствоысь специалист Надежда Ямаева. — Туэ но гожтэтъёс ыстӥмы. Татарстанысь рос-прос валэктон вуиз. Отын удмурт школаослэн нимъёссы, кыӵе ёросэ интыяськемзы, удмурт кылэз дышетӥсь пиналъёслэн лыдзы — ваньмыз умой пусъемын. Нош Башкортостанысь Дышетонъя министерство кӧня ке ар ӵоже ни удмурт школаослэсь кыӵе ёросъёсы интыяськемзэс но уг гожты.

Гожтэтэз учкисько но паймиськӧ Башкириын 2012-тӥ-2013-тӥ дышетскон арын 15 школаосын 288 пиналъёс вань предметъёсты удмурт кылын дышетӥллям. Паймод но бырод, ява! Бумага котьмае чида. Зэм, куке но (кылем даурлэн 60-тӥ но 70-тӥ аръёсаз) сыӵе школаос вал. Мон ачим но начальной классъёсын тодон-валан анай кылын люкай. Соку арифметикая но, природоведениея но, мукет предметъёсъя но удмурт учебникъёс вал. Али соос ӧвӧл ни. Дышетӥсьёс, ӟуч кылын поттэм учебникъёсты удмурт кылэ берыктыса, ужало шат? Талы оскыны шуг.

Кылем арын Башкир Элькунысь 21 школаын 1 сюрс 459 пинал, удмурт кылэз предмет карыса, дышетэм. Озьыен, 21 вылэ 15 ватсаськом но, 38 потэ. Башкириын 38 удмурт школа кылемын? Берло куинь арскын 20-ез ворсаськизы? Та юанъёслы валэктон утчаса, кыдёке ветлонэз ӧвӧл. Школаослэн ворсаськемзы сярысь иворъёс пӧртэм ёросъёсысь вуыло. Кылсярысь, валля арын Калтасы ёросын вить удмурт школа пытсаськиз. Бадӟым Качак школа гинэ ужа на, шуи ке, чик уг янгыша. Бурай ёросын но сыӵегес ик югдур. Вить удмурт школаос пӧлысь та вакытэ огез гинэ кылемын. Янаул ёросын, мон тодэмея, Андреевка, Коньга начальной школаос ужамысь дугдӥзы. Татышлы ёросысь Бигиней школа (татын куке но дышетскизы Менсадык Гарипов, Фёдор Пукроков, Андрей Гильмаев) покчи классъёсты гинэ визьнодалоз на. Школатэк кылем удмурт пиналъёс табере бускель бигер, пор гуртъёсы ветло. Калтасы ёросысь Бадӟым Туганеевоысь удмурт пиналъёс понна анай кылзэс дышетон Калтасыын, ёрос центрын, радъямын, Бурай ёросысь пельгаос понна — ёрос центрысь куинь номеро школаын, алтауос понна — Ваныш бигер гуртын.

Нош удмурт гуртъёсын пытсам юртъёс озьы ик буш сыло. Тани мынам вордӥськем Алтау гуртам но школалэн юртэз нокинлы кулэ ӧвӧл. Кӧня ке пиналъёс дышетскыны бускель Ваныш гуртэ ветло. Автобуссы я луэ, я уг. Гуртъёс вискын ӟеч сюрес ӧвӧл угось. Толалтэ со сюресэз лымы соге, усьтыны нокин уг дырты. Трос интыосын та выллем югдур кылдэмын. Нош школаосты ворсан азьланьтӥське. Оптимизация бадӟымесь гуртъёсы но нюжтӥськыса кадь вуэ. Гуртъёслэсь ӵуказе нуналлы осконзэс со шыпытак «ньылэ». Бумага чида, отчы олокыӵе лыдпус но гожтыны луэ. Паймоно огезлы: шуг-секытъёсты кылдыто адямиос ик.

Башкортостанын кӧня удмурт школаос? юан но, омыре ошиськыса, кыле. Удмурт кылэз дышетонэн герӟаськем ужпумъёс отын трос. Ватонэз ӧвӧл, удмурт учебникъёсты школаосы вуттон сярысь берло аръёсы нокин уг сюлмаськы. Башкортостанысь Дышетонъя министерствоын со ужен вырись ужасьсы ӧвӧл.Удмурт школаосын анай кылэз дышетон ас эрказ лэземын, шуыны луэ. Кытын ке но вашкала учебникъёсты уже куто на, мукетаз соос воксё ӧвӧл. Удмурт кылын выль книгаос но школаосы туж шер вуо. Удмурт кылъя но литературая дышетӥсьёс тодон-валанзэс будэтон понна Иже ветлыны луонлык уг шедьто. Башкортостанысь удмуртъёслэн культурая центрзылы но та ужпумъёслы бадӟымгес саклык висъяно вылэм. Востэм улыса, азьлане уд мыны. Школаосты но шыпытак гинэ ворсаллялозы. Нош бумага вылын ваньмыз умой возьматэмын луоз.

Ульфат Бадретдинов,
Россиысь огъя дышетон удысысь дано ужась

Туспуктэмез: www.montessori-ufa.ru

Удмурт Дунне
By Удмурт Дунне 10 сентября, 2013 13:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<