Асьмелы дышетсконо, дышетсконо но дышетсконо

Удмурт Дунне
By Удмурт Дунне 10 сентября, 2013 11:05
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Асьмелы дышетсконо, дышетсконо но дышетсконо

Удмуртлыкез школаосы нуо Удмурт кун университетысь удмурт кылосбуръя факультетэз йылпумъямъёс

Удмуртлыкез школаосы нуо Удмурт кун университетысь удмурт кылосбуръя факультетэз йылпумъямъёс

Этнослэн азинсконаз бадӟым инты басьтэ дышетон, уката ик — профессия басьтон. Россиын шоро-куспо тодон-валан сётӥське ваньмызлы. Та ужпумъя вань выжы калыкъёс одӥг радын сыло. Собере котькуд мурт басьтыны быгатэ кыӵе ке удысъя визь-нод — специальностьлы дышетске. Та теорияя, уж вылын чаклано ке…

Секыт воз
Совето вакытэ радъям дышетонэз али ӵем курлало, озьы ке но соку адямиослэн тодон-валан люканы мылкыдзы но ӝуткаськылӥз, солы условиос но кылдытэмын вал. Туннэ дышетон пӧрмемын вуз чот. Нош вузэз басьтыны коньдон кулэ. Котькызьы милемлы мед вералозы чиновникъёс, озьы ке но специальность басьтон туж дуно йыр висёнлы пӧрмиз. Уката ик та шӧдӥське обществомылэн пӧртэм сӥослы висъяськеменыз сэрен. Одӥгъёсыз пиналъёссэс визьманы быгато кунгож сьӧрын, мукетъёсыз, профучилищеын визь-нод басьтыса но, тырмоз, шуо. Профессилы дышетонъя вылӥ учреждение огшоры, дунтэк гинэ уд пыры, нош шоро-куспо мурт понна дышетсконлы уксё тырон — вормонтэм воз. Тае адӟыны луэ нимысьтыз таблицаысь но.

Озьыен, син азьын 12 ар. 1989-тӥ-2010-тӥ аръёс ӵоже шаерысьтымы пӧртэм выжыос пӧлын дышетскем муртъёслэн лыдзы кык поллэсь ятыргес йылэм. Уката шӧдскымон соиз — шор специальность басьтыны дырто ваньмыз сямен калыкъёс, та югдуръя пӧртэм выжыос оградын сыло.

Озьы ке но вылӥ тодон-валан басьтонъя яке вуззэс йылпумъямтэ учыръёсъя удмуртъёс 1989-тӥ арын ог кык поллы ӝегало вал, та беромон, аръёс ортчыса но, ӧз воштӥськы. Ӟучъёслэсь бере кылиськом 1,65 поллы, бигеръёслэсь — 1,53 поллы. Пусъёно созэ но: удмуртъёс ӵемгес быръё гуманитарной но музъем ужен герӟаськем удысъёсты, нош мукет калыкъёс, та удысъёсты сяна, быръё инженерно-технической, экономика, эмъян, лэсьтӥськон но юриспруденция удысъёсты.

Удмуртиын зол азинскемын промышленность, озьы ке но производствоын но удмурт выжыысь кадръёс шӧдскымон инты уг басьто. Тодмо удмурт этнограф Людмила Христолюбова пусъе: городысь удмуртъёс тросгес тыршо юрттэт сётон (обслуживающей) удысын. Соин кун но муниципал кивалтонысь вылӥ должностьёсы уггес шедё.

Татын мултэс уз луы удмурт менталитет — асвалан — сярысь вераны. Востэм но лекъяськисьтэм, дыртӥсьтэм но ужзэ пумозяз быдэстӥсь, ваменэс но куатаськись — таӵе сямъёс пыӵамын удмуртъёслы. Калыкмы уг жугиськы, уг алякъяскы. Шуак-дуак тупась учыръёсын востэм но чидан мылкыдыз кыре потэ. Таӵе сямъёс, удмуртъёсты урод шуыса, уг пусъё, соос дауръёсын пыӵамын калыклы. Выжыысь выжые удмуртъёс гыризы, пӧйшуразы но чорыгазы. Соослэсь ӟеч улэм интыоссэс мукетъёс асэстыку, асьме калык ӵемысь кошкылӥз, выль инты утчалляз. Тазьы карыны быгатымтэез дыръя чидано кариськылӥз. Ӵапак таӵе сяммылы луыса асьмеос али но чидаськом, соин пумитъяськыны ум быгатӥське мукет калыкъёс пӧлы сылмонлы. Иське, таӵе югдурез уд вошты, но солэсь ӝоглыксэ кулэстыны луоно ук. Мар со понна кароно?

Кышкыт вамыш медам лэсьтэ
Та ужпумез вормон пыремын Президентлэн Владимир Путинлэн ӵектэм «Россия Федерациын кун национальной политикая 2025-тӥ арозь стратегия» документаз но. Кун кивалтон ёзъёслэн валтӥсь ужпумзы — утьыны федерация амалъя кылдытэм кун кивалтонэз. Мон туннэ уг дыртӥськы вераны, макем шонер но валаса быдэсъяське вал национальной ужпум совето власть кылдон вакытэ. Соку ужпум мукет вал — зӥбем но бере кылись калыкъёслы сайканы юрттон, нош куд-огзэ быронлэсь утён. Та ужпум, 1930-тӥ аръёс вуытозь, оглом ӟеч быдэсъяськиз.

Адӟиське: та ужпум туннэ но лэчыт сылэ. Со вакытэ ик куд-огез политикъёс — Жириновский но Прохоров кадьёс — асьсэ программаосазы верало бадӟым губерниос кылдытъян сярысь. Шонерак вераса, та туж кышкыт вамыш, со быдэс Россиез куашкатыны амал. Солы пумит али ӵапак кулэ туала системаез ужатыны, кысӥсь этносъёсты сайкатыны. Асьме дорын таӵе калыкъёс — со удмуртъёс но бесерманъёс.

Кун национальной программа куре Правительствоын нимысьтыз ёз кылдытыны. Татын малпаськонэз но ӧвӧл — нациосын ужась министерство Россиын луыны кулэ.

Верано созэ но: мукет улосъёсын ӵошатыса, Удмуртилэн та удысъя трос вормонъёсыз. Асьмелэн кемалась кылдытэмын Нациосын ужан политикая министерствомы, тырше Эшъяськон юрт, соослы тырмыт юрттӥське республика. Татын шӧдске: вылӥ кивалтӥсьёсмылэн азьпала учконзы но шӧдонзы вань. Вылаз ик, та ужез буш интыын ум кутскиське — республикаын вань теорияя зэмос инъет — «Феномен Удмуртии» проект. Наукая ужасьёс пыр-поч эскеризы ни шаерысьтымы кун но муниципал кивалтӥсьёслэсь ужзэс, чаклазы, кызьы радъясько пӧртэм калыкъёслэн кусыпъёссы, кызьы соосты юнматыны луэ.

Выжы калыкез утён понна кулэ кылдытыны улыны но ужаны условиос. Республикалэсь гурт удыссэ кужмоятоно, отын мед утиськозы кужмо хозяйствоос но, мед кылдозы нимаз фермеръёс но. Соку гурт улоз, иське, удмурт калык но музъем ужлэсь уз палэнскы, озьыен, уз быры. Со дыре ик малпано, кызьы удмуртъёсты утёно но азинтоно городын.

«Быгатэмзыя» медаз пӧяське
Городын удмуртлыкез утьыны луоз дышетон чотын гинэ. Со — школаосын визьнодан, озьы ик профессилы дышетон.

Россиысь Конституциез но «Дышетон сярысь» выль законэз чакласа, таӵе йылпумъян лэсьтыны луэ: кун но муниципал учреждениосын дышетон но визьнодан ужез нуыны яра республикалэн кун кылыныз, но со дыре ик ӟуч кыллы изъян ваемын медам луы.

Кыкетӥез: Россиысь калыкъёс быгато нылпи садъёсын, покчи классъем школаосын но основной школаосын дышетонэз радъяны анай кылынызы — татын вань бичатӥсь люкетэз — «быгатэмзыя», пе (в пределах возможностей). Та кыллы луыса тросэз шедьтозы удмурт кылэз дышетонтэм вылысь мугъёс.

Куинетӥез: пусъемын та правоосты утьыны амалъёс.

Ньылетӥез: анай кылын дышетон но визьнодан сярысь ужпумъёсты асьсэлэн нимысьтыз актъёсынызы юнмато дышетон учреждениос — соос, кин радъя тодон-валан сётонэз.

Озьыен, Конституция гарантиос сётэ кылъёсты азинтонлы но утёнлы. Удмуртиын дышетонъя министерство кык пол — 1991-тӥ арын но 2000-тӥ арын — люкалляз Национальной дышетонъя концепциез юнматонъя коллегизэ. Озьы ке но со кылиз сыӵеен ик, кыӵе вал 1991-тӥ арын. Соин али но республикаямы вань школаосын дышетон мынэ ӟуч кылын, удмурт, бигер но пор кылъёсты дышето предметэз сямен. Йӧн-йӧн удмурт школа быремын. Та югдур вуттӥз асьмеды таӵе адӟонэ: 1926-тӥ арын 99,1 процентэз удмуртъёс анай кылынызы лыдъязы удмурт кылэз, 2010-тӥ арын — 55,6 процентэз. Нацилэн ӝыны люкетэз уг тоды анай кылзэ. Туннэ лыдпусъёс возьмато: вань дышетскисьёс пӧлысь сизьыметӥ люкетэз гинэ ветлэ удмурт кылъя но литературая урокъёсы. Та югдур возьматэ: берыктоно удмурт национальной школаез.

Валамон, котькуд уж — со кыӵе ке жильы выллем. Отысь кыӵе ке кульчоез колӟояське ке, жильыез пертчон понна шедьтоно но кысконо та кульчозэ. Мынам малпамея, таӵе йыр висёнэз луыны кулэ дышетон удысэ пырись котькуд субъектлэн — пиналлэн, анай-атайёслэн, дышетон учреждениен кивалтӥсьёслэн, дышетонъя управлениын но ведомствоосын ужасьёслэн. Таӵе сюлмаськемзы соослы кыӵе ке пайдаен — моральной но, материальной но — берытскыны кулэ.

Огдыре ик малпаськоно, кызьы удмуртъёслы но бесерманъёслы вылӥ тодон-валан сётоно — гуманитарнойзэ сяна, технической удысъя но. Выжы калыкъёслы вузъёсын квотаос азьло чакламын вал, туннэ сыӵе амал пайда уз вайы. Озьыен, пиналъёслэсь тодон-валан дуннее кыстӥськонзэс юнматоно школаосын. Кылсярысь, луысал ёросъёсын радъяны Кузебай Герд нимо гимназилэсь филиалъёссэ, нош муниципал кивалтӥсьёслы вузъёсын контрактъёс гожтыны.

Национальной политикаез 2025-тӥ арозь азинтон стратегилы сӥзем документъёс кутэмын луозы Удмуртиын но, мукет улосъёсын но. Та уже, кун кивалтон ёзъёс сяна, мед пыриськозы выжы калыкъёслэн огазеяськонъёссы но. Ӵапак соос бордысь потэ, сюлмасько-а калыкъёс асьсэлэсь азьлань сюрессэс утён пумысен.

Карл Пономарёв,
история наукаосъя доктор
Туспуктӥз Ирина Крестьянинова

Удмурт Дунне
By Удмурт Дунне 10 сентября, 2013 11:05
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<