Выль кырӟан — выль инвис

Удмурт Дунне
By Удмурт Дунне Август 16, 2013 11:00
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Выль кырӟан — выль инвис

Н. Трубачев

Н. Трубачев

Крезьгурчи, техника наукаосъя кандидат, Удмуртиысь культура удысысь дано ужась, зэмос воргорон, визьмо дышетӥсь, умой кузпал но атай. Ваньмыз со одӥг адями — Дэри ёросысь Пыӵанка гуртын вордӥськем Николай Трубачев.

Та крезьгурасез «Италмас» ансамбльлэн кивалтӥсез Анатолий Мамонтов ӵошатӥз Россиысь калык артистэн но композиторен Григорий Пономаренкоен. Г. Пономаренко ӟуч калыклэн уӵыез ке, Николай Аркадьевич удмурт адямилэсь лул-сюлэмзэ усьтэ. Солэн 200-лэсь уно кырӟанъёсыз. Соосты яратыса быдэсто шаерысьтымы но солэн палэнысьтыз тодмо артистъёс но ансамбльёс.

Сяська вылысь шедьтэмын мон
— Вордски Дэри ёросысь Пыӵанка гуртын. Муми — удмурт нылкышно, айи — ӟуч пиосмурт. Мон сяська вылысь шедьтэмын. Нош сыӵеос ваньзы, пе, чебер луо. Малы ке шуоно кышноен-картэн улӥсьёс бырйыны уг быгато ни ук, нош огназ улӥсь нылкышно самой кельшисьсэ аслыз эш утча.

Мумилэн Ксения Прокопьевналэн улон-вылонэз капчи вылымтэ. Мон дорозь со сизьым нылпи ваем. Куатез нуныосыз пичи дыръязы ик улонысь кошкиллям. Берлоез 17 арес дыръяз кулэм. Кышнояськыны вуыса, анаезлы сыӵе кайгу ваем. Нош мумилэн картэз Быдӟым ожысь бертэмын ӧвӧл. Со картэз оже бырем шуыса тодэм, соберегес ик пиез кулэм, анае воксё огназ кылем. Со, кайгулы чидатэк, огвакыт юон борды но кутскылэм. Но ассэ кутэм но малпам нылпи вайыны. Аслыз эш шедьтэм. Азьло гуртъёстӥ геологоразведчикъёс ветло вал ук. Озьы муми доры патере улыны лыктӥллям кышноен картэн. Пиосмуртэз со геологоразведчикъёслэн кивалтӥсьсы вылэм. Озьы соос дорамы, милям притыкен коркамы вал, улыны кутскиллям: огпалаз — мамае, мукет палаз соос. Нылпизы вылымтэ. Улыса-вылыса муминым соос кусып тупатӥллям. Пиосмуртлэн кышноез монэ, вож нуныез, бќрдыса, пе, мамаелэсь куре вылэм. Муми шуэм: мон аслым утись вордӥ. Тӥни озьы мон югыт дуннее потэмын, анаелы соку 41 арес вылэм.

Атайме уг тодскы. Малпамея, соос ми дорын одӥг-кык ар улӥзы, дыр. Малы ке шуоно куинь аресысен улэмме, йӧнтэмъяськемме-укылтэмъяськемме син азям пуктӥсько ини. Атай кошкем бере муми мукет улӥсьёсты пыртӥз. Соослэн синтэм пересьсы вал. Муми ӵукна уже кошке но со пересез монэ учкыны косылӥз. Песяй синтэм вал, гур вылэ тубе но кылле. Мыным укылтэмъяськыны со чик ӧз люкетылы. Пыр огнам будӥ бере, туж эрико вал. Ворсаса доре кельтэ ке, мон, укноез усьтыса, пегӟисько. Кытынзэ тодӥсько — муми соку кладовщикын ужаз. Сусеке пыртыса, монэ нонтэ вал. Озьы ньыль аресозь дораз бызьылӥ. Муми шуылӥз: сомында нонтэме юнме ӧз луы, шузи ӧд буды.

Мыным 5 арес дыръя муми бызиз бускель Башур гуртысь сьӧд кылем (кышнотэк) пиосмуртлы. Али кадь ик тодӥсько ай, со вал февраль толэзе. Сюратайлэн нылпиез вылымтэ, озьы ке но мон солы туж мултэс потӥ. Огполаз Казмасысь пиосмуртэн юыса пуко но нылпиосты будэтон сярысь верасько. Сюрбуби шуэ: тани кызьы пиналъёсты визьмано. Монэ тол куазен дӥськуттэк корказе поттћз но ӧсэз ворсаз. Муми шур дуре гылъяськыны кошкемын вал.

Нош мукетъят соос кытчы ке валэн куное ветлӥзы, мон капкаез дыраз усьтыны ӧй вутты. Со понна сюрайи монэ сюлоен жугиз. Муми туж зол но чурыт кышномурт вал. Вылаз ик, сюратай сое мон вылэ узатъяз. Ӧжыт янгышасько ке, еэн зол гинэ сюрылӥз. Но мумилы мон сое простить кари: юромо вӧсь карыны ӧз туртты, визьмасько кожаз. Сюрайилэн киыз туж мынэ вал, гуртын вань коркаос солэн киосыныз ӝутэмын, пе, но ньылоныз быдтӥз, юонзэ ӧз вормы.

Арганлы мынӥм, баянэн бертӥм
— Пичи дырысеным шӧдӥське вылэм крезьгур доры кыстӥськеме. Муми но, сюрайи но адӟизы, мукетъёслэсь арганзэс киям кутылӥсько шуыса. Гуртын юмшанъёс дыръя арганчимы шоры сак учкылӥ, кызьы шудэмзэ чаклай. Пумен ачим дыши. Нырысетӥ кырӟанэз — њуч «Яблочкоез» — дышетӥ. Собере муми шуиз: аслыд арган басьтом. Мынӥмы городэ, пыримы ӵыжы-выжыосмы доры — муми со воргоронлэн киросноез вал. Та пиосмурт шуэ ини, мар со арганэн вырод, басьты пиедлы баян. Та юртын ик крезьгуръя училищеысь дышетӥсь улэ, али асьмеос солэсь юалом. Дышетӥсь баянэн вуиз, со усточи бере, ка-а-а-к шудыса лэзиз ук. Мынам сюлэмы вырӟиз. Арган кулэ ӧвӧл ни, всё, баян гинэ басьтом на. Озьы 55 манетэн баян шедьтыса, бертӥмы. Гуртэ вуим но, чидан ӧвӧл ини. Озьы но кыскасько, тазьы но — номыр уг пӧрмытӥськы. Бӧрдэме ик потэ ини, малы тае басьтоно вал, арганэн ик шудысал ини. Басъёсыз но татын мукетэсь, тапалаз но куинь ряд, мон кыкен гинэ шудыны дышемын. Муми курадӟемме адӟыса, городэ мынӥз но «Самоучитель игры на баяне» басьтӥз. Котькуд нунал шудӥ. Ӵукна зарядка интые киям баянме кутӥсько вал. Пӧрмыны кутскиз ведь. Школаын ялан конкурсъёс луо вал. Шудэмме тодыса, монэ сцена вылэ поттаны кутскизы. Нырысьсэ шудӥ: «Ой, эсьмаса, эсьмаса» но «Вало дурын, шур дурын» гуръёсты. Та кык кырӟанэз кылэмез бере школа директормы, ӟуч пиосмурт, классэн кивалтӥсьмылы шуэм: та пияшез азьланяз бадӟым сюрес вите. Али валасько ини, соку мон туж кырыж шудӥ шуыса, но школаен кивалтӥсь шӧдэм, дыр, крезьгур мынам улонам бадӟым инты басьтоз шуыса.

Тямысэтӥ класс бере Ижысь Советской ульчае интыяськем крезьгуръя училище котыртӥ гожеръяй, но пырыны ӧй дӥсьты. Мынӥ дасэтӥ классэ, сое йылпумъяса, 1967-тӥ арын пыри Ижысь сельхозинститутэ. Муми нодъяз: «Пие, мын инженере, со туж гажамон но кулэ профессия». Озьы ик луиз. Институтын тодон-валан люкакум но, крезьгурлэсь ӧй палэнскы, вузысь баянистъёслэн ансамблязы шудӥ. 1972-тӥ арын мон диплом басьтӥ. Муми пенсиын вал бере ини, монэ Дэри ёросэ ик ужаны лэзизы. Ужаны кутски валтӥсь инженер луыса РТП-ын. 1975-тӥ арын ини нош ик февраль толэзе партилэн райкомезлэн номенклатурая ужасез луи но, монэ лэзизы та ёросысь «Урал» колхозэ валтӥсь инженере. Огшап ортчыса, Люк сельсоветэ председателе пуктӥзы. Кытчы партия косэ, отчы ик мынӥськод вал. Озьы монэ ыстӥзы ёросысь связья узелэн кивалтыны, собере Дэри черкогуртысь шор ёзо школае — машиноведениея урокъёс нуи. Шонерзэ вераса, школаын ужаны мыным туж кельшиз. Воргорон шуыса, лэся, мыным туж укылтэм классэз сётӥзы, ваньмыз сямен пиос. Но пиналъёсын ми ог-огмес туж валаса улӥмы. Соос мыным ваньзэ верало, оско вал. Али но куд-огъёсыз дорам ветло, улэм-вылэмзэс мадё, визь-кенеш юало. Табере соос воксё бадӟымесь ини, городысен автобусэ, трамвае пырисько ке, тодмало но мыным интызэс сёто. Озьыен, ӧз вунэтэ на.

Школаын луонлык кыл-дӥз крезьгур дуннее мургес зымыны. Институтын дышетскыкум ай, мон малпасько вал кырӟан гожтон сярысь. Озьы, 25 ар малпаськыса но уж вискын шудыса, 1988-тӥ арын нырысетӥ крезьгуре кылдӥз. Асьме культуралэсь мон соку кыдёкынгес вал, но сюлэм мӧзмиз удмурт кырӟанлэсь. Бугыръяськыны кутски пӧртэм сборникъёсын. Таизъя но крезьгур вань ини, та кылъёсъя но гур малпамын. Но син шорам йӧтӥзы Анатолий Леонтьевлэн чуръёсыз. Та кылбур мынам улонэлы туж тупа кадь потӥз. Озьы кылдӥз «Арганчилэн кырӟанэз». Сое тодмо артист Николай Кардапольцев кырӟа.

Инмарлэн кылыз куинь
— Нырысетӥ кырӟанэ 38 аресам кылдӥз. Крезьгуръя дышетскеме ӧвӧл бере, мон валасько вал, ужме кинлы ке возьматоно шуыса. Оло, кырӟанэ аслым гинэ кельше, нош калыке поттыны уг яра. Соберегес ик мыным тодматскыны шуд усиз крезьгурчиен, писателен Пётр Кубашевен. Ӝӧк сьӧрын пукыкумы, шуисько, уд кылзы-а кырӟанме, крезьгураны йӧндырисько но, пӧрме-а, уг-а — уг валаськы. Со сак кариськиз. Кырӟанме быдэстӥ но, Пётр Николаевич шуэ: «Умой, мон таӵе крезьгурез ӧй кылы на вал. Но Инмарлэн куинь кылыз, эшшо кык кырӟан гожты на. Бӧрысь вераськом». Мынам мылкыды ӝутскиз. Эшшо гожтӥ. Со нош ик кылзӥз но шуиз: «Шаерамы вордӥськиз выль композитор». Собере монэ тодматӥз Геннадий Прокопенкоен. Геннадий Александрович телевиденилэн но радиолэн хоренызы кивалтӥз. Дораз мон дасяськыса мынӥ, кырӟанъёсылы нотаос туж чебер гожтӥ. Йыры туж шузи вылымтэ, шӧдске. Г. Прокопенко учкиз но юаз кыӵе мынам образование. Мон серемпыр шуисько: «Йылпумъяй Башур консерваториез». Геннадий Александрович паймыса шуэ: «Мынам сыӵе дышетон учреждение сярысь кылэме ӧвӧл». Собере верай ини, нокыӵе но крезьгуро тодон-валанэ ӧвӧл шуыса. Кивалтӥсь паймиз: нотаосты, пе, туж шонер гожъямын ук.

Озьы кык толэзь ортчыса, телевидение но радио пыр мынам кырӟанъёсы чузъяськыны кутскизы ини. Соосты быдэстӥз Гостелерадиокомпанилэн хорез. Тужгес ӵем лэзьязы Т. Черновалэн кылъёсызъя гожтэм «Шумпотон кузьмасе тон мынам» но Н. Байтеряковлэн кылбурезъя «Вай, ошмесэ» кырӟанэз. Бӧрысь та хор мынэсьтым эшшо 14 кырӟанме гожтӥз на.

Дэри черкогуртысь школаын мон 20 ар ужай, но соин валче ик тырши на клубын но. 1989-тӥ арын Дэри черкогуртын культурая дворец усьтэмзы бере кылдытӥ «Вуюись» ансамбль. Кырӟан гожъяны кутски бере, коллектив но люкай ини. Со, мынам творчествоя лабораторие выллем луиз. Кузпалы мынам крезьгурлэсь туж кыдёкын, соин ик выль кырӟан гожтӥсько ке, нырысь дунъясьёсы луо «Вуюисьысь» эшъёсы.

1990-тӥ аръёсы Ижысь филармониын ортчылӥзы удмурт культуралы сӥзем ӝытъёс. Огаз сыӵе ужрадын «Вуюисьлэсь» кырӟамзэ кылэм Анатолий Мамонтов. Концерт бере со дорам лыктӥз но кырӟанъёсылэсь нотаоссэс куриз. Соберегес ик «Италмас» ансамбльысь артистъёс но кырӟанъёсме быдэсъяны кутскизы.

Нялтас вераса, туэ сӥзьыл «Вуюись» калык ансамбльмылы 25 ар тырме. Ми сое сћё-дано пусйыны дасяськиськом. Творчествомес гажасьёслы бадӟым концерт возьматом октябрь толэзе. Одно ик ӧтёмы эшъёсмес: Ижысь «Ӟардон» ансамблез но Кияса ёросысь Карамас-Пельга гуртысь «Инвожоез». Чузъяськозы трос выль кырӟанъёсмы. Нош август пумын пыриськом Брангурт калыккуспо фестивале.

Крезьгурась кандидат
— Котькуд зэмос воргорон сямен корка пуктоно кариськи. Шӧдӥсько, коньдонэ уз тырмы. Малпай, Дэри шор ёзо школаын но ужало, городэ но интыясько. Ветлӥ, учкылӥ, кытчы мыныны луоно. Монтажной техникуме но резюмеме келяй. Кык нунал ортчыса, отчы ӧтизы ини. Техникая нимысьтыз дисциплинаосъя преподавателе кутӥзы. Лэсьтӥськон машинаос, автомобильёс но тракторъёс дисциплинаосъя студентъёсты дышетыны кутски. Озьы ик сюрес вылын ветлон правилоосты но валэктӥ на. Озьы арняяз кык нунал Дэри школаын тырши, ньыльзэ — Ижын. Зол ужай. Нуназеозь монтажной техникумын, собере Дэрие дыртӥсько. Техникумын арысь аре тросгес часъёс сётыны кутскизы. Озьы 2005-тӥ арын школаысь кошки. Нош техникумын кык ставкаен тыршыны кутски. Татчы Ижысь техникая кун университетысь преподавательёс но ветло вал. Ужамме адӟизы но доразы ӧтизы на. Озьы мон ИжГТУ-ын но часъёс нуи. Соку ик кандидат ужме гожтӥ. Уен-нуналэн ужай, малы ке шуоно корка пуктоно вал. Юртъерме дас куинь ар ӝутыны выри, вуттӥ. Та аръёс ӵоже сокем гажай-дунъяй техникумез, юртме вуттэме бере но отысь ӧй кошкы. Кылем арын гинэ пенсие потӥ ай. Студентъёсын ужаны кельшиз. Соослэн но преподавательёслэн гажамзы дуно потылӥз. Егитъёс пӧлын ачид но егит улӥськод ук. Но тросэз потэ адями бордысь. Мон уг юиськы, уг кыскиськы, сюлмам вожпотонэн уг улӥськы. Черекъяса-даллашыса уг ветлӥськы, пичиеныз но, пересеныз но одӥг кыл шедьтӥсько. Соин ик егит возиськисько, дыр. Мон пушкын мумилэн чурытэз но эсэпсэ шӧдон-валан огкадь пуко.

Семьяын пиосмурт кузё луыны кулэ. Кузпалэным Валентина Александровнаен тодматскимы ай студент вакытамы. Кык нылпи вордӥмы, табере кык нуныкайёсмы будо ни. Кышное Дэри школаын ик дышетӥсьын ужаз, интернатэн кивалтӥз. Сельхозинститут бере со тодон-валанзэ будэтӥз на Москваысь психологияя но педагогикая институтын. Соку нылпимы вал ини. Кузпалы дышетскыку, пиенымы мон пуки. Озьы нуны утёнэз тодӥсько. Шонерзэ вераса, та уж мыным туж ӧз яра. Соин ик малпасько, нуныез утьыны кулэ анай ик, нош визьноданы, уката ик пиосты, кулэ атай. Кузпалы но пиналъёсы асьсэос кырӟанэн уг эшъясько ке но, монэ крезьгурен эн выры уг шуо.

Пӧртэм интыосын тырши, 30 арлэсь трос дышетон удысын ужай. Быдэс улонме мон дышетӥсь но, крезьгурчи но. Дышетон но культура удысъёсын сюлмысь тыршеме пусъемын 50-лэсь уно Данъян грамотаосын. Озьы ке но валтӥсь интыын мон понна — кырӟан, со лул-сюлэмме буйгатон. Вань ужъёсы пӧлысь таиз тужгес но ярамонэз. Мынэсьтым туж ӵем юало, кӧня кырӟан гожтӥды ини? Ужпум лыдыз бордын ӧвӧл ук. Соин ик та юан мыным туж уг кельшы. Малы ке шуоно нуналлы быдэ гур гожтыны луэ, нош соос калыке ӧз вӧлме, адямиослэн сюлмазы ӧз пыре ке, озьыен, тыршемед — юнме, ужамед — палдурес. Нош кин ке одӥг-кык кырӟан кылдытоз но дауръёслы кылзӥсьсэ-кырӟасьёссэ шедьтоз. Оскеме потэ: мынам но гуръёсы калыклы мурт уз луэ, кылзӥсьлэн сюлэмаз сюрес шедьтозы азьланяз но. Арлыды сярысь уг малпаськиськы. Выль кырӟан кылдэ ке, мон понна выль инвисъёс усьтӥсько кадь. Азьланьзэ Инмар гинэ тодэ, нош адями чылкыт малпанъёсын но сюлмаз чебер крезьгурен улыны кулэ. Мон озьы ик улӥсько.

Галина Семёнова

Удмурт Дунне
By Удмурт Дунне Август 16, 2013 11:00
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<