Выль ӝук сиёд — удмуртомод

Удмурт Дунне
By Удмурт Дунне Август 13, 2013 14:37

Выль ӝук сиёд — удмуртомод

Киров улосысь удмуртъёс ӧтчаськизы выль ӝук сиыны

Киров улосысь удмуртъёс ӧтчаськизы выль ӝук сиыны

Кылем шутэтскон нуналъёсы шулдыр вал Киров улосысь Слободской районысь Гырдор (Светозарево) гуртын. «Выль ӝук» ужрадэ улосысьтызы вань удмуртъёс люкаськылӥзы. Кузь сюрес шоры учкытэк, ми но вазь ӵукна ик бускельёсмылэсь выль ӝуксэс сиыны потӥмы.

Ми вуыку, школа азбарын калыкез лачак ни вал. Куазь вераны луонтэм шулдыр кариськиз, пилемъёс улысь ӵужак гинэ пӧсь шунды потӥз.

Чебересь удмурт дэремъёсын дӥсяськыса, мӧйы но егит калык чур гинэ школа пала кыстӥське. Удмурт шаерлэсь сокем кыдёке вуыса, пельёс уг оско, ява: пичиез но, бадӟымез но шалтыр гинэ удмурт кылын лабырто.

Капка азьын, кырӟаса но арганэн шудыса, куноосты пумита Слободской культура юртын ужась Владимир Котельников. Владимир Евгеньевич «Играй, гармонь!» передачаын но трос пол гинэ быгатонлыкъёссэ возьматъям ини.

Ужрадын пӧртэм удысъёсъя кибашлыослэн киужъёсынызы адӟытон усьтӥллям, турлы вузъёсын вуз каронъёс радъяллям. Нылпиослы нимысьтыз шудон площадка лэсьтӥллям, егитъёслы — волейболэн шудон инты.

Сцена син пӧртмамон чебермамын: борддоръёс вӧзы зарни шепен культоос пуктылэмын. Бакчаысь жалем сиёнъёс но варенняос-компотъёс ӝӧк вылэз узырмыто. Люкаськем калыкез бадӟым ужрадэн ӟечкылаз Слободской ёрослэн йырыз Владимир Хомяков:

— Шумпотӥсько удмурт калык понна: со уг ышты выжызэ, уг вунэты анай кылзэ, утьыса возе вашкала сям-йылолзэ, «Выль ӝуке» мыло-кыдо пыриське. Азьланяз но тазьы ик тупаса, огкылысь мед уломы. Инмар ӟеч ю-няньзэ но тыро-буро бакча сиёнзэ мед сётоз. Гидамы пудоосмы мед куаёзы, кеносъёсмы ю тысен мед тырмозы, нылмы-пимы мед удалтоз, тазалыксэ Инмар мед сётоз. Озьы асьмелэн выжымы юнгес луоз. Нылпиосмы таӵе ужрадъёсмес адӟыса будӥзы ке, соос одно ик удмуртлыкез азинтӥсьёс луозы.

Шулдыр Гырдор
— Удмурт шаерын улӥсь иськавынъёсмылэсь Гербер но Виль праздникъёсты ортчытъямзэс кылылӥмы ни вал. Улосысьтымы куд-ог удмурт коллективъёслы асьсэлы но отчы пыриськылыны шуд усьылӥз ни, — вера Светозаревоысь удмурт культурая центрен кивалтӥсь Алевтина Кайсина. — Малпамы, нош малы ми удмурт шулдыръяськонъёс ум ортчытъяське? Ёросамы 715 удмуртъёс уло. Ёрос кивалтӥсьёс но та пумысен кылпум поттылӥзы ни вал: ойдолэ, пе, кыӵе ке но ужрад ортчытъяломе, отын вань удмуртъёсты огазеяны мед быгатомы. Кызьы адӟиськоды, малпам ужмы быдэсмиз. Но ми сое Виль шуыса ӧм нималэ, «Выль ӝук» каримы. Мугез таӵе: 2-тӥ августэз, Ильин нуналэз, ми улонысь кошкемъёсты буре ваён нуналэн лыдъяськомы. Соку тросэз шайвылэ ветло. Ильин нунал бере арня ортчыса, «Выль ӝук» радъяськомы. Туэ со витетӥзэ ортче ини. Арысь аре калык тросгес но тросгес люкаське. Табере бордамы бигеръёс но, поръёс но, ӟучъёс но шумпотыса пырисько, милемын ӵош асьсэлэсь быгатонлыксэс возьмато. Городэ но бускель республикаосы улыны кошкем нылпиосмы но ӵыжы-выжыосмы мыло-кыдо берто празднике.

Кайсыпалась — Сенкопалэ
— Милям муниципал кылдытэтамы 17 гурт пыре, — маде «Светозарево» муниципал кылдытэтэн кивалтӥсь Валентина Богданова. — Но улӥсьёсыз вань 12-аз гинэ. Кылемъёсаз коркаоссэс дача интыын возё, гужемзэ гинэ отын уло. Гуртмы Кировлэсь 60 иськеме интыяськемын, Слободскоёзь — 17. Гуртамы тужгес но арлыдоез, 92 аресъемез, Мария Фёдоровна Кайсина. Али гинэ дунне вылэ вордӥськиз Марк Тимкин. Черкогуртын «Родина» СПК-мы возиське на. Отын 25 ужасез. Кивалтэ колхозэн Владимир Тимофеев. Кунян гидмы сяна, вань на 70 йырлы чаклам скал гидмы. Гуртын кык магазинмы ужа, культура юртмы но медпунктмы вань. Газ сярысь ке верано, со милям Слободскойын гинэ но ӧвӧл на.

Шумпоттэ: татын ульчаоссы гинэ но чылк-чылк удмурт нимаськӧ Кайсыпал, Сенкопал, Уллапал но Выллапал. Тросэз ветло Кайсин, Тимкин но Морданов фамилиосын.

Школазы бадӟым, улыно-вылыно ке но, пиналъёслэн куаразы ичигес чузъяське.

— Егитъёс городэ улыны кошкемен, гуртын нылпиос туж ӧжыт вордӥсько, — вера школалэн директорез Владимир Соловьёв. — Дышетскисьёсмы 45 кузя лыдъясько. Бускель Роготнево но Кариново гуртъёсысь нылпиосты автобусэн ворттӥськомы на. Жаляса верано, туэ нырысетӥ классэ мынӥсь пиналъёсмы ӧвӧл. 11-тӥ классэз быдтӥсьёсмы но ӧй вал. Шумпоттэ на соиӟ школаын удмурт кылэз факультатив амалэн ке но дышетӥськом. Нуэ сое Светлана Алексеевна Батина.
Нылпиосмы ӟеч дышетско. Туэ школаез зарни медален йылпумъязы Елена Рыжкова но Виктория Кайсина.

Школаен одӥг липет улэ интыяськемын нылпи сад. Азьвыл покчиослэн нимаз юртсы вал. Ог 7 ар талэсь азьло сое ворсазы. Али садэ 4 пинал ветлэ.

Гуртысь даслэсь трос парсьпиос ӵошатскизы

Гуртысь даслэсь трос парсьпиос ӵошатскизы

Бызьылӥзы парсьпиос
Ужрадэ лыктэмъёслы тунсыко программа радъямын вал. Концертын калыкез шулдыртӥзы Киров улосысь вуэм коллективъёс. Шулдыръяськонэз усьтӥзы Слободской культура юртысь «Лызкутюк» (зангари) ансамбле ветлӥсьёс. Соос гуртысьтызы сюан-ярашонэз возьматӥзы. Ансамблен кивалтэ Галина Кузьмина. Шунытэсь кичабонъёсын пумитазы Балезино ёросысь Ушур культура юртысь «Мылкыд» ансамблез (кивалтӥсез Татьяна Корепанова). Асьсэос но ушуръёс ӝутскем мылкыдын кырӟазы-веразы, татысь калыклэн шуныт пумитамзылы но капчи мылкыдызлы паймизы.

Собере сцена вылэ потӥзы Гырдорысь егит семьяос. Соос куспын пӧсь ӵошатскон радъяськиз. Ог-огенызы кема аръёс ӵоже тупаса улӥсь кузпалъёс но егитъёслэсь бере ӧз кыле. Бакча сиёнъёслэсь кӧттыр пӧрасьёс, сиён-юон лэсьтӥсьёс куспын но вожвылъяськонъёс туж тунсыко ортчизы. Ужрадэ пырисьёс но азьпал радэ потэмъёс ваньзы ик синпель кузьымъёс басьтӥзы.

Шулдыръяськонлэн тужгес тунсыко люкетэз — парсьпиослэн ӵошатсконзы. Гуртазы тросэз парсь вордо бере, калыкез паймытон понна малпазы таӵе ӵошатскон. Туэ даслэсь трос парсьпизэс вожвылъяськонэ поттӥзы. Котькинлэсь шаплыгес но чупресгес бызьылӥз Андрей Зянкинлэн нурскетӥсез. Кузё парсьпиез понна бадӟым кузьым утӥз.

— Валлё аръёсы Удмурт шаерысь «Выль ӝук» шулдыръяськонамы куное вуылӥзы «Удмурт Кенеш» ассоциацилэн вице-президентэз Татьяна Ишматова, «Удмурт дунне» газетлэн азьвыл редакторез Алексей Шкляев, кырӟасьёс Александр Катков но Анна Плотникова, — тодазы ваё ужрадэз радъясьёс.

Таяз радэ но Анна Плотниковаез ӧтизы. Калык сое туж шуныт пумитаз, сцена вылысь кошкыны уг лэзё ни вал.

***
«Выль ӝукын», вӧсям ӝукез сиытэк, нокин но ӧз кыльы, дыр, 7 пуртыын со пӧзьтэмын вал. Шулдыръяськонэз йылпумъяса, ужрадэ вань пыриськем артистъёс но кырӟась коллективъёс, ваче ки кутскыса, бергазы.

Любовь Тихонова
Туспуктӥз Ольга Иванова

Удмурт Дунне
By Удмурт Дунне Август 13, 2013 14:37
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<