Вождэс эн вае, эшъёсы!

Удмурт Дунне
By Удмурт Дунне 30 августа, 2013 11:08

Вождэс эн вае, эшъёсы!

Шаянтон дыр

Шаянтон дыр

Пичи йырвизьмын-а, укылтэм сямо луэмысьтым-а, пичи дыръям вӧсь карыны шедьтылӥ вӧзысьтым адямиосты. Сомында аръёс ортчыса но, со учыръёс, венен бышкам кадь, улыны маза уг сёто. Та сярысь шара гожтыса, эшъёсы азьын чылкытатскеме потӥз. Вождэс эн вае, эшъёсы.

Инмар утиз, дыр
Мыным соку куинь-ньыль арес вал. Бака урамамы ньыляз ик артысь коркаосын жиляк ньыль-вить нылпиен семьяос улӥзы. Куинь коркась пичиос ог-огенымы тупаса улӥмы, пыр ӵош шудылӥмы. Анай-атайёсмы уже кошко но, милемлы эрик луэ. Ог-огмы доры ветлыса, корка берыктӥське вал. Дӥськутъёсты сандыкысь поттаськом но одӥгаз сэргы лавка лэсьтӥськом, мукетаз — больница, куинетӥяз — школа. Куать-сизьым пӧлысь кудмы ке дышетӥсь, кудмы ке врач, лавкачи…

Одӥг пол ми дорын шудыкумы, малы ке керетон ӝутӥськиз. Бускель коркась мон быдӟа ик Валя эше Надя апаеныз куатаськыса дорысьтымы потӥзы. Мон буш одеколон флаконэз киям басьтӥ но сьӧразы бызьыса потӥ. Капка доры вуэм Валя шоры мертаськи но со флаконэз йыртышказ ик зӥрти. Пияла пилиськиз — Валилэн йырысьтыз вир пазьгиськиз. Эше кеськыса бӧрдэ. Мон кышкай. Пегӟыны но уг валаськы ни. Ваньмыз Вали котыртӥ бергало, жаляло, мыным мыжыксэс возьмато. Мар луиз берло — уг тодӥськы ни.

Валие та учырез, оло, вунэтӥз ини. Ми соин берло кыктоос кадь люконтэм эшъёс луимы, школаын но пыр ӵошен пукимы, вань ватосъёсмес но ог-огмылы вераськомы вал. Нош виысал ке эшме! Инмар утиз, дыр, сьӧлыктэм нылпиез.

Кивалтос но шедиз ук!
Таиз учыр луиз, Атабай школаын дышетскыкумы. Сизьыметӥ классысен шузимымон синмаськи вал ӟуч пилы. Со тямысэтӥ классын дышетскиз. Ог-огмылэсь туж мӧзмиськом вал, котькуд урокын записка гожтыса дасяллямы. Переменае потӥськом но ӧс куспын пумиськиськом, гожтэмъёсынымы лушкемак гинэ воштӥськиськом. Ар куспын та пичи гожтэтъёсы быдэс пачка люкаськизы. Мон соосты зарниез кадь утьыса вози. Интернатын улӥськом бере, матрац улам ватылӥ. Комнатаын нокин ӧвӧл дыръя сю пол но лыдӟылӥ соосты. Уй куспын сыӵе мӧзмисько вал пияшелэсь!

Кыӵе уг яратӥськы вал каникулъёсты. Яратоно мурттэ сокема адӟытэк ул ай! Котькуд нунал гожтэт лэзьяллямы ог-огмылы. Таосыз но со пачкаын ик вал.

Мар бон сыӵезэ гожъямы ини? Кызьы урок ортчиз, кыӵе оценка басьтӥм, кыӵе книга лыдӟиськом но мукет. Яратонмы милемлы дышетскыны чик уг люкеты вал. Ма, кызьы урод дышетскод, возьыт луоз ук гажанэд азьын.

Огпол ватосме шедьтэм интернатын ик улӥсь тямысэтӥ классын дышетскись пияш. Гожтэтъёсме милям комнатаямы ик лыдӟыса пуке. Мон школаысь бергес берталляй: я репетиция, я общественной уж (комсомол огазеяськонлэн секретарез вал). Пырисько но, со яке мон шоры горыса учке, гожтэтъёсын шонаса, гочигочи, шуэ. Мар монэн луиз! Чик ӧй вала, мар ки улам сюриз, корт кобыен шукки ук! Пияш йыр бордаз кутӥськиз но, ӵыж ӵыжектыса, комнатаысьтымы бызьыса потӥз.

Зарни пырыосме кыӵе ке укылтэм пияш лыдӟиз, йӧтылӥз шуыса ӝожомеменым, быдэс пачка гожтэтъёсты ӝуась плитае куштӥ. Гомак тылын басьтӥз. Берло валай янгыш лэсьтэмме, но бер вал ини. Ой, бӧрдӥ ук, бӧрдӥ! Сюлэмысьтым маиз ке чигиз, оло. Со минутъёсы ик кӧня ке арлы бадӟымгес луи кадь.

Кыӵе куректӥ яратоно пияшелэсь гожтэтъёс сутэмысь! Нош со йӧнтэм пи кулыны но быгатысал шуыса, чик йырам ӧз лыктылы. Али визьмыным валасько ини мар дауртэмме. Со пияш улэп ӧвӧл ни. Будэмез бере дугдылытэк юылэм. Озьы ик кулэм.

Ӧй быгаты буйгатыны
Мон синмаськемын вал Пашалы, солэн эшез — Саша — мыным, нош со Сашалы синмаськемын эше. Саша мыным нырысь нокыӵе уг поты вал. Сьӧрам быж кадь ветлэмысьтыз берло акыляк луи. Пичи братэз пыр весь запискаос лэзья вал.

Ми тямысэтӥ классэ выжим, нош пиос кин кытчы пазьгиськизы. Саша — атабай пи — городын дышетскиз ке но, котькуд нунал сямен берталляз. Нош ӝыт интернатэ ваське но укноетӥ милемыз учкыса улэ (штораос ӧй вал). Мон мукет комнатае урокъёсме лэсьтыны пегӟисько. Пиос мыным гожтэтъёссэ вутто ини: «Яратӥсько, мӧзмисько, часталы ке но пот!» Воже потыса, кесясько вал соосты.

Гужем каникулъёс дыръя Саша котькуд ӝыт дас кык иськеме милям гуртамы ветлыны кутскиз. Ми изьыны дасяськиськом, нош со укно уламы мотикеныз жургетэ, шула, потыны косыса. Тылэз кысӥськомы но, кошке. Сыӵе дыръя дядяйлэсь туж кышкасько вал: мар со шуоз?

Одӥг пол пеймытэн нош ик вуиз. Дядяй кытчы ке но кошкемын. Сашка весь сигналить каре. Укноез усьтӥ но, дядяй бертэ! Та дырозь одӥг пол но жоб кылъёсын вераськисьтэм нылаш кеськыса лэзи ук: «Да пошёл ты к чёртовой матери!» Собере укноме шарк! пытсай. Сашка мотиксэ вырӟытӥз но синтэм-пельтэм ми палась лобатӥз.

Аслым героиня кадь потӥ соку: ӧй кышка сыӵе кылъёс вераны! Нош али визьмыным нош ик шуэрскисько: мар мон дауртӥ?! Сыӵе умой пияш вал: капчи мылкыдо, кыллы шаплы, визьмо, спортсмен, велосипедэн но, мотикен но туж шумприч ворттылэ. Кыӵе возьмаз, дыр, одӥг пол ке но шуныт ваземме, шораз небыт учкемме. Мон асме ачим гинэ яратӥсь вылӥськем, лэся. Ньыль ар пала Саша яратон висёнэн курадӟиз кадь. Нош мон ӧй буйгаты сое. Оло, монэн йырин туж вазь юылыны кутскем. Пиналысен бырыны шедиз.

Мар понна курадӟытӥзы?
Пинал дыръям лэсьтэм урод ужъёсы мыным гань-гань улыны маза уг сёто. Нош милемыз туж вӧсь каремъёс тодазы ваё меда мар понна сокем ултӥямзэс?

Та шимес учыр вал кык-куинь, нош апаелы вить-куать арес дыръя. Ваньзэ тае кышкыт вӧтэз кадь гинэ син азям пуктӥсько на, но вӧсь луыса, дынгыр тэтчаса бӧрдэммес туж умой тодӥсько.

Бака ураммылэн пумаз тымет вал. Тулыс вуэ ке, со одно кыриське. Вуэз ӵӧж-ӟазегъёслы пыласькымон гинэ кыле на. Со ву пукись интыосын, дэриын «пань-пань, котэм нянь» шуыса, шудӥськомы вал.

Уг тодӥськы ни, кинлэн йыраз лыктэм пичиосты ултӥяны. Милемыз апаеным гольык кылизы но пушнерен быдэс мугормес шлачкытъязы. Сыӵе вӧсь! Пегӟыны турттӥськомы, со укылтэмъёс сьӧрамы уйисько но нош ик шукко. Одӥг чылкыт интымы но ӧз кыльы. Нош дорамы нокин ӧвӧл.

Мугормы сутӥське, мар карыны ум тодӥське. Бӧрдыса бызимы мемейёс доры. Мемей воксё чабкиськиз, табань кадь пульсам вылтырмес адӟыса.
— Кин тӥледыз озьы пушнераз?! Кыӵе сюлэмтэм нылпиос со сыӵе? Вот фашистъёс! — сюлэмыз вӧсь луыса ик, мемей милемыз маин ке но зыраз.
Кӧня висимы на со бере! Нэнэлэсь-дядяйлэсь ноку тыш сиеммы ӧй вал, нош кыӵе ке укылтэм нылпиос милемыз сокем курадӟытӥзы.

Римма Рылова,
Можга ёросысь Александрово гурт

Удмурт Дунне
By Удмурт Дунне 30 августа, 2013 11:08
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<