Воштӥськонъёс — син азьын

Удмурт Дунне
By Удмурт Дунне 16 августа, 2013 11:45
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Воштӥськонъёс — син азьын

Берло 11 ар ӵоже выльдӥськизы 22 школаос но садъёс

Берло 11 ар ӵоже выльдӥськизы 22 школаос но садъёс

Дэбес — одӥгез шоро-куспо азинскисез ёрос. Татысь калык туж ужась. Ярато музъемез, трос пудо вордо но улон-вылонзэс умоято. Ёросын ӧвӧл промышленностен герӟаськем бадњымесь предприятиоссы. Татын валтӥсь инты басьтэ гурт удыс — музъем ужан но пудо вордон. Кызьы дэбесъёс туннэ уло но ужало? Кызьы йылпумъязы нырысетӥ паларез? Со но мукет ужпумъёс сярысь маде «Дэбес ёрос» муниципал кылдытэтлэн йырыз Александр Глухов.

— Александр Леонидович, гурт удысты — валтӥсез, со бордысен мытом кенешонмес.

— Шонер. Арез умой кутским вал. Дыраз кизим тысё но пуртэсо юосмес. Тулыс бусы ужъёсты ортчытыны кунлэсь юрттэт дыраз вуиз. Но июне зоръёс чик ӧй вал, шуыны луоз. Озьы ке но, пудоез толйытыны урод ум дасяськиське. Вань луонлыкъёсмес кутыса но выль амалъёсты пыӵатыса, али кылем арын мындалэсь 80 процент пудо сиён дасямын ни. Нош берло зоръёслы луыса, лудъёсын нордӥ чебер будэ. Кукуруза но одӥг аръем турынъёс луозы на. Оглом вераса, туэ толэз урод ум потэ шуыса, малпаськом. «Мир», Калинин нимо, «Дружба» СПК-ос но «Варни» огазеяськон туэ выль сямен сенаж дасязы, вакуумной полиэтиленэ бинизы. Нош «Лесагурт» эштослэн вузаны шедёз турынэз но, силосэз но.

Туннэ озьы ик ушъяса верам потэ «Тыловай» огазеяськонлэсь кубистазэ но картофказэ. Соос Израильысь ваем амалэн ву киськазы.

Берло дыре выль ужан амалъёс пыӵало музъем ужанэ но пудо вордонэ. Со берытске ватсаса ю-нянен но йӧл-сӥлен. Тани 2010-тӥ но 2011-тӥ аре быдэс ёросъя шорлыдын котькуд гектарысь 14,2 но 14,9 центнер пала луиз. Туэ чакласьком вал сомында ик басьтыны. Но узгес, дыр, люкаськы, ӟегмы урод ӧвӧл ке но, валэс юос берлань кыскозы.

Вамышъёсмы юнмало пудо вордонын. Кылсярысь, валля арын ваньзэ 23 сюрс тонна йӧл кыским ке, миым 570 тонналы уногес люкам. Скаллы быдэ вераса, валля арын 5 сюрс 73 килограмм потӥз, нош миым со лыдпусэз 5 сюрс 152 килограммозь вуттӥм. Туэ но со котыр луыны кулэ.

Сӥль поттонъя верамонэз трос ӧвӧл. ВТО-е пыреммы шӧдӥське ни, сӥльлэн дуныз ог 30 процентлы усемын. Азьланьын кыӵе югдур луоз — нокин уг вера.

Гурт удыс, нокыӵе шуг-секытъёс шоры учкытэк, урод уг возиськы, йылэ ваньбур поттон. Миым тани ёросын 1 миллиард 7 миллион манетлы сиён-юон поттэмын, яке, валля арен ӵошатыса, 128 миллион манетлы тросгес. Со бадӟым ӧвӧл ке но, азьлане мынон сюрес луэ.

— Кызьы азинско социальной удысъёсты?

— Пусйымонэз вань. Тужгес но бадӟымез шумпотонмы — 1-тӥ сентябрьлы Дэбес черкогуртын усьтӥськоз 190 интыен нылпи сад. Али 242 мурт черодын сылэ. Специалистъёслэн верамзыя, выль садэ ватсаса 50 пиналэз интыяны быгатозы на. Соку черкогуртын югдур тупатскоз. Нылпи садэз пуктӥз «Дельтастрой» огазеяськон. Дэбесэз выль юрт уката шулдыртоз, нош нылпиослы но анай-атайёслы кылын вераны луонтэм шумпотон луоз.

Нылпи учреждениос ласянь югдур умоя гуртъёсын но. Тани Удмурт Льӧмын школа-сад усьтӥм. Сыӵе ик юрт лэсьтӥське Котегуртын. Соин ӵош ик, жаляса верано луэ, ёросын 3-ез школамы вужесь, туала куронъёслы уг тупало ни. Та ужпумез син азямы возиськом.

Воштӥськонъёс мыно тазалыкез утёнын. Ӟеч-ӟеч тупатъям ёрос больницаез но солэсь поликлиниказэ. Выльдӥсько фельдшер-акушер пунктъёсмы. Озьы ФАП-ёс тупатъямын Н. Пыхта, Сюрногурт но Бадӟым Ӟӧтым гуртъёсын. Табере адямиос врач доры Интернет пыр гожтӥськыны быгато. Висись дырзэ шыръяны пӧрмытэ.

Вань та ужрадъёс но мукетыз юртто ёросын демографиез умоятыны. 2008-тӥ арысен тросгес вордӥсько нылпиос. Тани миым, валля арен ӵошатыса, 16 нылпи шумпотон ватсаз. 1000 улӥсьлы быдэ миым ог 18 нуны вордскиз. Та лыдпус куинетӥ арзэ ӟечоме.

— Кызьы быгатӥсь-коды егитъёсты ёросэ кельтыны? Шедьто-а соос тупамон уж инты?

— Ёросын синэ ужтэк кылемъёслэн лыдзы. 2009-тӥ арын ужась калык пӧлын 4,4 процентэз ужтэк улӥз ке, миым 1,9 процент вал, нош туэ со лыдпусэз 1,2 процентозь вуттыны чакласьком. Со понна луонлыкъёс вань. Асьме дорысь ужбергатӥсь кирпич шуккон заводэз улӟытыны басьтӥське. Соин ӵош ик Дэбеслэсь 13 иськеме изваска но чарпа (щебень) поттонэз радъяны чакласьком. Со выль карьер луоз.

Берло дыре милям но кӧня ке кужмояло лэсьтӥськон ужъёс. Кылсярысь, 2011-тӥ-2012-тӥ аръёсы 2700 но 2789 сюрс квадрат метр улон коркаос пуктэмын. Туэ но та вормонмес ум куашкатэ. Миым 8,5 иськем газ гумы кыскемын. Туэ чагыр эстӥськон вуттом Зар-Медлое, Удмурт Льӧме но Пичи Ӟӧтыме. Та ужез нуэ Ижысь «Газинвестстрой» огазеяськон.

Йылпумъяса верам потэ: берло 11 ар ӵоже Дэбес ёросын социальной удысысь 42 юрт лэсьтэмын-выльдэмын. Со пӧлысь 22-ез — дышетон ёзысь, 9-эз — тазалыкез утёнысь, 7-ез — культура, 3-ез — спорт но 1-ез — калыкез улон-вылонын утён удысъёсысь.

Вератэк кельтэме уг поты миым дорамы ортчытэм Гурт тол шудонъёсты. Пытьыез син азьын: куасэн бызьылон сюресэз югдытэ электротыл, отӥ роликен ворттылыны луэ ни. Нош туэ ортчытӥм шашкиен шудонъёс. Дорамы кужымзэс мертаны ветлӥзы бускель Башкортостан, Свердловск но музон улосъёсысь шашкиен шудӥсьёс.

Ёрослэн азинскемез син азьын.

Геннадий Романов
Туспуктӥз Владимир Беломорских

Удмурт Дунне
By Удмурт Дунне 16 августа, 2013 11:45
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<