Вормонэз гур вылын уг шедьто

Удмурт Дунне
By Удмурт Дунне Август 9, 2013 15:17

Вормонэз гур вылын уг шедьто

Спортысь ветеранъёсты ӟечкылазы

Спортысь ветеранъёсты ӟечкылазы

Та нуналъёсы котырес лыдпуссэс — 90 арзэс — пусйизы шаерысьтымы спортъя но мугорез кыдатон культурая ёзъёс.

1923-тӥ арын август толэзе Удмурт шаерын кун политикаез радъянлэн удысъёсыз пӧлы пыртэмын вал мугорез кыдатон, спорт. Маин бен висъяськиз со вакыт? Али гинэ йылпумъяськиз вир кисьтон — граждан ож. Быриз уно сюрсъёсын калык, вуиз ёрмыса улон. Шаерысьтымы 351 сюрс 646 мурт сютэм улӥз, кулонэн нюръяськиз. Ӵапак таӵе секыт вакытэ Совето власть басьтӥськиз таза улонэз ӝутон борды. Озьы вамышен-вамышен улонэ мур пыӵаны кутскиз вашкала Римысь веран: «Таза мугорын — таза мылкыд». Мугорез кыдатонъя политикаын валтӥсь интые потӥз кужмо, визьмо но котыр ласянь адӟем карымон адямилэн образэз. Та улсын ик радъяськыны ӧдъязы таза улонлы сӥзем ужрадъёс, пӧртэм пумо ӵошатсконъёс. Мугорез кыдатон культура арысь аре паськытгес вӧлмыны кутскиз партия, озьы ик комсомол, профсоюз огазеяськонъёс пыр. Ӝоген кылдӥзы спортъя «Динамо», «Зенит», «Спартак», «Темп», «Строитель», «Наука» огазеяськонъёс. Бадӟым данэн лыдъяськиз «ГТО» — «Готов к труду и обороне» — гадьпусэн пусъён. 1936-тӥ арын Удмурт АССР-ын кылдӥз мугорез кыдатон культура но спорт ужпумъёсъя нимысьтыз комитет.

Быдӟым Отечественной война кутскон арын шаерамы лыдъяськиз куинь стадион но вуын уянъя кык базаос, нош Ижысь педучилище нырысьсэ дасяз 11 специалистъёсты — мугорез кыдатон культурая но спортъя вылӥ квалификациен дышетӥсьёсты. Уката емышо луизы 1970-тӥ-80-тӥ аръёс. Шаерысьтымы тужгес но кужмоосыз егитъёс пыриськизы Дуннелэн но Европалэн чемпионатъёсаз, Олимпиада шудонъёсы. Кызьы вератэк кельтод дуннелэн трос пол чемпионэз Галина Кулакова, Тамара Тихонова, Владимир Никитин сярысь.

Жаляса верано, Совето власть вакытэ ӝутэм ужъёс куашказы выльдӥськон аръёсы. Дас ар куспын мугорез кыдатон культура лябӟиз, калык спортлэсь палэнскиз. Но биньгозыез кырмыны быгатӥмы выль Россиын — выль даурын. Туннэ мугорез кыдатон удыс юн сылэ пыд вылаз. Та сярысь верало шаерамы арлы быдэ ортчись тол но гужем шудонъёс, спортсменъёсмы арысь аре пырисько вылӥ ӵошатсконъёсы. Берло 12 ар ӵоже пуктэмын 65 пала спортъя объектъёс, выльдэмын уно спортзалъёс! Удмуртия берыктыны быгатӥз биатлонистъёсты, куасэн бызьылӥсьёсты, капчи атлетикая спортсменъёсты дасясь шаерлэсь нимзэ. Азьланьын — Сочиын ортчоно олимпиада. Асьме спортсменъёсмы отчы пыриськытэк уз кыле.

Спортъя но мугорез кыдатон культурая ёзъёслы 90 ар тырмонэн валче та удысысь ветеранъёсын пумиськылӥз Удмурт Республикалэн Президентэз Александр Волков. Шуныт мылкыдын пумитаз со спортысь ветеранъёсты Владимир Никитинэз, Владимир Осинцевез, Александр Ходыкинэз, Галина Кулаковаез, Тамара Тихоноваез но уно мукетъёссэ.

Пусйытэк кельтыны уг луы тазэ но: Президент А. Волков кичӧлтэмъя, та нуналъёсы шаерамы кылдытэмын спортэз азинтонъя нимысьтыз кенеш. Отчы пыризы шаерысьтымы спортъя федерациослэн кивалтӥсьёссы, закон кылдытъян удысын, озьы ик властьлэн быдэсъясь ёзъёсаз тыршисьёс. Кивалтоз кенешен ачиз Президент.

Сергей Захаров
Туспуктӥз Андрей Поздеев

Удмурт Дунне
By Удмурт Дунне Август 9, 2013 15:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<