Вормон бере сюлмаськон

Удмурт Дунне
By Удмурт Дунне Август 23, 2013 11:47

Вормон бере сюлмаськон

Быгиос паймыто кунояны быгатэменызы

Быгиос паймыто кунояны быгатэменызы

Август кутсконын шараяськиз фин-угор дуннелэн культурая шоркарезлэн нимыз. Калыккуспо вожвылъяськонын вормисе потӥз Шаркан ёросысь Быги гурт. Та ивор, Быгиын но ёросын улӥсьёсты сяна, бысдэс шаермес лӧпкытӥз: котькинлэн та гурт сярысь тодэмез потӥз.
Бере ӧз кыле кунгож сьӧрысь СМИ-ос но. Таосыз Интернетэ мертчиськизы. Нош отын Быги сярысь ивор ӟуч кылын гинэ но ӧвӧл, мар веранэз ни англи кылын ивор сярысь! Йырам малпан каръяськиз: нош ачим, шаркан пи, трос-а меда тодӥсько та гурт сярысь? Мар вераны быгато мон фин-угор дуннеысь культурая шоркарен тунсыкъяськисьёслы? Та юанэн валче мылкыды ӝутскиз Быгиез котыр ласянь эскерыны-тодыны.

* * *
Быги Шаркан ёрослэн тужгес но чебер интыяз сылэ: татын ӝужыт вырйылъёс, вож нюлэсъёс, ошмесъёс. Гурт ёрос центрлэсь 15 иськеме гинэ ке но пуксемын, зоро куазь дыръя Быгие мынӥсьёс шуге-леке шедьыны быгатозы: сюреслэн ог 5 иськемез асфальтэн шобыртэмын ӧвӧл. Гуртэ пырыку, гурезь вылысен Быги кырымпыдэсын кадь адске: чибориё липетъёсын коркаос, радэн-радэн урамъёс.
Быги гурт аслэсьтыз 425-тӥ арзэ пусйиз ни. Та интыосы 1588-тӥ арын Вужгуртысь вуэмъёс каръяськиллям. Калык верамъя, Вужгуртын быдэс гуртлы одӥг гинэ ошмессы вылэм. Вулы мынэм кышномуртъёс, черодын сылыса, куспазы ӵемысь ченгешо-керето вылэм. Жугиськонъёс но поталлям. Воргоронъёс, выль улон инты утчаса, туала Быги гуртлэн ошмесо интыосаз вуиллям. Ошмес вӧзын ик быг-быг ӝуйы будэм. «Быг-быг» кыл бордысь ик гурт ним но потӥз. Азьло дыръёсы Быгиез удмурт сямен «Быгы» но шуо вылэм. Гуртысь арлыдоослэсь «Быгы» шуэмзэс али но кылыны луэ на.
Туала вакытэ Быги гурт — «Быги» муниципал кылдытэтлэн шорсюлмыз. Та поселение пыре вить гурт: Быги, Быгипочинка, Шегъян, Каӟес но Эбек починка. Быги гуртын 182 юрт лыдъяське, улэ 630 адями. 98 процентэз — удмуртъёс. Гурт калык пӧлысь тросэз «Восход» эштосын тырше. Таиз хозяйство ёрослы гинэ ӧвӧл, быдэс шаермылы тодмо луэ парсь будэтэменыз.
Быгиын вань шор ёзо школа но «Ӟардон» нимо нылпи сад. Таяз 60-лэсь ятыр тэшкылиос ветло. Нош школалэсь выль юртсэ 2008-тӥ арын гинэ усьтӥзы ай. Туж чебер но йӧно юрт гуртлэн котькуд сэрегъёсысьтыз адӟиське.
— Удмурт кылэз утён но азинтон — милям валтӥсь ужпуммы, — шуэ Быги школалэн директорез Андрей Голубин. — Школаямы 157 нылпи дышетске. Соос пӧлысь 90 процентлэсь ятырез — удмурт семьяосысь. Нырысетӥ классысен 11-тӥ классозь удмурт кылэз дышето. Ма, ӟучъёс но удмурт кылэз дышетыны пумит уг луо. Анай-атайёс талы шумпото гинэ: урод шат куинь кылэз — удмурт, ӟуч, англи — тодыса будыны! Ӟучомомы шуыса, кышканмы воксё ӧвӧл.
Зэм но, Быгилэн шорсюлмыз — культурая «Зоринча» центр. Гурт калык шумпотыса пыриське та центрлэн ужрадъёсаз. Татын туристъёсты мыло-кыдо пумитало, калыкез шулдырто. Маскаръяськыны яратӥсьёс понна 25-тӥ арзэ ини ужзэ радъя «Беренэс» театр. Со калык театр нимен но пусъемын ни.
Библиотекаен кивалтӥсь-лэн Наталья Коробовалэн верамезъя, быгиос туж ярато лыдӟиськыны:
— Дорысьтымы уг кошкыло нылпиос. Ма, пиналэз но, мӧйыез но ми доры дырто газет-журнал лыдӟыны.
Быгиослэн лыдӟиськыны яратэмзы адӟиське почта пыр газет-журналъёслы гожтӥськонысь но. Та гуртысь почта ёзлэн кивалтӥсез Ольга Бехтерева ивортэ:
— Гурт калык шумпотыса гожтӥське удмурт газет-журналъёслы. Тужгес но яратыса лыдӟо «Удмурт дунне», «Ӟечбур!», озьы ик ёросын потӥсь «Инвис» газетъёсты, «Кенеш», «Кизили» журналъёс басьто. Шумпотӥськом, удмурт изданиосты басьтӥсьёслэн лыдзы, пичиен ке но, будэ шуыса.

* * *
Быги та нуналъёсы ик дась ини куноосты пумитаны. Гурт калык таӵе вормонлы шумпотэмын.
«Быги» муниципал кылдытэтлэн йырызлэн Нина Беляевалэн али туж кысык вакытыз, уно сюлмаськонъёсыз:
— Та нуналъёсы клубмес выльдон-тупатъян борды басьтћськимы. Туристъёс дорамы вуылыны кутскытозь, юрт чебер но учкымон мед луоз. Сюрес лэсьтон пумысен вераськонъёс-кенешонъёс нуиськомы. Быгимы сярысь Интернетын ивор ӧвӧл шуыса, вормисе потэммы бере ик туж зол шӧдӥськиз ни. Юанъёсын соиз-таиз вазиське. Соин ик матысь дыре одно ик гуртмылэсь сайтсэ усьтом.
Гуртын улӥсьёс та вормонлэсь выль пумиськонъёсты, тунсыко ужрадъёсты но выль адямиосын тодматсконъёсты витё.

Павел ВАХРУШЕВ

Удмурт Дунне
By Удмурт Дунне Август 23, 2013 11:47
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<