Визьнодан кутскоз тэтэ каронысен

Удмурт Дунне
By Удмурт Дунне 23 августа, 2013 13:19
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Визьнодан кутскоз тэтэ каронысен

DSCN0804Туэ 1-тӥ сентябрьысен улонэ пыӵаны кутске «Дышетон сярысь» выль закон. Со куре: школалэсь азьло визьнодан пыроз дышетон программае, соин ик котькуд пинал одно ортчыны кулэ нылпи сад пыр. Дышетонъя но наукая министрлэн воштӥсез Игорь Белозёров верамъя, асьме республикамы талы дась.

Шаерысьтымы ог 78 процентэз покчиос нылпи садъёсы ветло — Приволжск улосвылын та одӥгез ӟечез лыдпус. Туэ ар пумозь покчиослы учреждениосын эшшо 3 сюрс 100 инты ватсаськоз — 30 нылпи сад усьтӥськоз. Матысь куинь ар куспын 3-7 аресъемъёс пӧлын черодъёс бырыны кулэ.

— Выль стандартъёс нылпи садъёсы пыӵаны кутскозы вуоно арысен, — пусйиз Игорь Белозёров. — Дасямын но юнматэмын луоз тэшкылиосты визьноданъя нимысьтыз программа. Пиналъёслы умой-умой лыдъяны-чотаны, лыдӟиськыны-гожъяськыны одно дышоно ӧвӧл. Соос мед быгатозы асьсэды коллективын возьыны, малпанъёссэс вераны, тодон-валан басьтыны мылкыдзы мед луоз.

Таин валче матысь дыре вань воспитательёс тодон-валанзэс будэтонъя курсъёсты ортчозы.

— Тэшкылиосты визь-ноданэз ас вылаз басьтоз кун, коньдон висъяськоз республикамылэн бюджетысьтыз, — азинтӥз веранзэ министрлэн воштӥсез. — Соин ик нылпи сад понна дунъёс шӧдскымон будыны кулэ ӧвӧл. Анай-атайёс, азьло сямен ик, ас кисыысьтызы тыроно луозы пиналэз учкем-сюдэм понна гинэ. Та дунэз пуктозы муниципалитетъёс. Дышетонъя но наукая министерство соос азе куронэн потӥз ни: дунъёсты 3-3,5 процентлэсь трослы медаз будэтэ.

Нялтас вераса, азьло сямен ик чакламын компенсанциос: семьяын 1 пинал ке, анай-атайлэн тыриськонъёсысьтыз 20 процентсэ бырыктозы. 2 пиналлы — 50 процентсэ, 3-езлы — 70 процентсэ берлань сётыны чакламын.

* * *
«Дышетон сярысь» выль законын таӵе но куронэз вань: дышетскон книгаос-пособиос нылпиослы висъяськыны кулэ дунтэк.

Тросэз улосъёс талы чик дась ӧй вал. Шуге-леке вуиз асьме республика но: бюджетын талы коньдон чакламын ӧй вал. Дышетонъя но наукая министерстволэн лыдпусъёсызъя, ваньзэ-ӧвӧлзэ 820 сюрс пала книгаос басьтыны кулэ. Туннэ нуналлы школаосы вуэмын ог 200 сюрсэз гинэ. Со пӧлысь ог 70 процентэз — выль стандартъёсъя дышетскисьёслы, со 1-тӥ-3-тћ классэ мынӥсьёслы. Эксперимент чот выль стандартъёс пыӵатӥсько на куд-ог 5-тӥ-6-тӥ классъёс пӧлын.

— Уката секыт югдур 5-тӥ-11-тӥ классъёслы учебникъёс басьтонэн, — шуиз Игорь Белозёров. — Туэ таос пӧлысь кык куиньмосэзлы гинэ книгаос висъяны быгатом. Оскиськом, анай-атайёс валалозы югдурез. Тросаз школаосын учебникъёсты киысь кие кельто — бадӟымъёсыз сёто пичиосызлы.

* * *

Шаерысьтымы школаосы туэ 249 егит специалистъёс ужаны вуизы ни. Кылем арын та вакытлы 209 мурт вал.

Дышетон учреждениосын 759 буш инты вань на. Котьку сямен ик уката уг тырмо математикая, физикая, кунгожсьӧр кылъёсъя, физкультурая дышетӥсьёс. Но Дышетонъя но наукая министерство та пумысен сокем уг куректы, буш урокъёс кыльыны кулэ ӧвӧл, пе. Азьло аръёсы югдур уката секыт вал, шуом, кылем арын та вакытлы 1 сюрс 104 буш инты лыдъяськиз. Но туала дышетӥсьёс одӥг ставкаен гинэ уг ужало.

— Дышетӥсьёс кӧня тыршо, сомында ик басьто, — шуиз дышетонъя но наукая министрлэн воштӥсез. — Туэ ӝыны ар понна шоро-куспо уждунзы 20 сюрс 421 манет вал, со республикаысьтымы экономикаын шоро-куспо уждунлэсь кӧнялы ке бадӟымгес но луиз. Али 1-тӥ сентябрьысен визь-нодасьёсты нош ик шумпоттом — уждунзэс ог 20 процентлы йылтыны чакламын.

Сентябрьысен озьы ик ог 20 процентлы уждунзы йылоз воспитательёслэн, ватсаса тодон-валан сётон но профессилы дышетон удысын ужасьёслэн, ог 10 процентлы — воспитательёс бордын ужасьёслэн.

Дышетӥсьёслэсь уждунзэс йылэтон понна республикамылэн бюджетысьтыз ватсаса 460 миллион манетлэсь ятыр коньдон висъяно луоз.

Элина Кумачёва
Туспуктэмез: kvarkenoroo.ucoz.ru

Удмурт Дунне
By Удмурт Дунне 23 августа, 2013 13:19
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<