Висёнэз алыны лякытгес

Удмурт Дунне
By Удмурт Дунне 6 августа, 2013 11:03
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Висёнэз алыны лякытгес

Пиналлы прививка дыраз пуктоно

Пиналлы прививка дыраз пуктоно

Кызьы утиськоно пӧртэм висёнъёслэсь? Ку но кыӵе прививкаос дунтэк басьтыны луэ? Та но мукет юанъёслы валэктӥз Удмуртиысь тазалыкез утёнъя министрлэн воштӥсез Людмила Гузнищева.

50 миллион манет эмъюмлы
Людмила Александровна верамъя, котькуд кунлэн вань прививкаосын календарез. Отын пусъемын, ку но кыӵе вакцина пуктылоно. Тани Россилэн календаряз 11 пумоез пыртэмын: B гепатитлэсь, дифтерилэсь, пужылэсь (корь), грипплэсь, туберкулёзлэсь, коклюшлэсь, столбняклэсь, полиомиелитлэсь, гемофильной инфекцилэсь, эпидемической паротитлэсь но краснухалэсь. Та вакцинаос пуктӥсько дунтэк. Со сяна, шаермылэн вань аслаз прививкаосын календарез. Соя дунтэк пукто урмонлэсь, лемтэй энцефалитлэсь уколъёс.

— Вакцина басьтонлы Удмуртилэн бюджетысьтыз арлы быдэ 50-60 миллион манет висъяське, — шуиз Людмила Гузнищева. — Вераны кулэ, 3 арлы огпол календаре выль вакцинаос пыртӥськом.

Кыкетӥ арзэ вераськонъёс мыно ни, 2014-тӥ арысен вучачалэсь (ветрянка) но пневмококковой инфекцилэсь прививкаосты но календаре йылтозы шуыса. Али соос понна уксё тыроно. Со сяна, Россиысь Тазалыкез утёнъя министерствое ми вазиськимы мукет куронэн: онкология висёнъёсты алон понна нылъёслы но кышномуртъёслы вакцинаос пыртыны.

Прививкаос пуктылыса, нылпиос пӧлын дифтериен висён 200 поллы кулэсмиз, корен — 500 поллы, нош полиомиелит берпуметӥ аръёсы шаерамы ӧз ни пумиськылы.

Вож нуныез йӧтылыны уг яра?
Куд-ог анай-атайёс пумитъясько нылпиоссылы прививка пуктонлэсь. Ӵемысь сыӵе сюрес быръё Инмарлы юн оскисьёс: соос малпамъя, кызьы азьвыл гожтэмын, озьы ик луоз, адями мугорез йӧтылыны уг яра. Сыӵеос пӧлын валэктон уж нуо эмъясьёс но, кивалтӥсьёс но.

Кылем арын шаерысьтымы 400 анай-атайёс нылпиоссылы прививкаос пуктыны ӧз лэзе, туэ — 200-эз. Озьыен, тыршемлэн пайдаез вань.

Но вань туж сак анайёс но, соос туж умой тодо, кыӵе нуналэ пиналзылы прививка лэсьтоно. Шумпотымон, арысь аре таӵеослэн лыдзы будэ.

Удмуртиын али 306 сюрс пала 17 аресозь нылпиос лыдъясько. Тазалыкез утёнъя министерствоын юнматэм программая вакцинаос пукто соизлы яке мукетызлы пиналлы. Таӵе программа али бадӟымъёслы но лэсьтӥське.

Нылпи вордӥськем бере ик анайлы верало, ку ветлоно прививкаос басьтыны. Кышномурт гожтӥське, эмъюрттэт сётон пумысен ваньзэ валэктӥзы шуыса.

— Куд-ог егит анайёс нуны ваён юртын ик уг лэзё пиналзылы прививка пуктыны, но со шонертэм. Вож нунылы В гепатитлэсь вакцина лэсьтӥське вордӥськем бераз 2-тӥ нуналаз. 7 ар ӵоже В гепатитэн висисьёслэн лыдзы 18 поллы кулэсмиз, — ивортӥз тазалыкез утёнъя министрлэн воштӥсез Людмила Гузнищева.

Одно ик БЦЖ прививка пуктоно: со тазалыклы номыр аламазэ уз вайы, юнматоз гинэ. Туберкулёзлэсь укол пукто вордӥськем бере 3-тӥ нуналаз, собере 7 но 14 арескын. Тодосчиос верамъя, нылпилы прививкаос дыраз лэсьтоно. Нылпи садэ лыктэмез бере ас вакытаз пуктымтэ прививкаосыз вылысьтыз вылаз лэсьто ке, пиналлэн выль эшъёсызлы, воспитательёслы дышонэз (адаптация) куддыр туж кема кыстӥське. Со сяна, нылпи садэ мыныса, со эшъёсызлэсь вирус кутыны быгатэ. Нимысьтыз саклык висъяно полиомиелитлы. Анай-атайёс нылпизэс та черлэсь эмъюм сётыны ӧз лэзе ке, пиналэз кӧня ке нунал доразы возьыны кулэ: уго вирус укол пуктэм нылпиослэсь паласькыны быгатэ омыретӥ.

Со сяна, тодады возе: адямилы дифтерия, коклюш яке столбняк паласькиз ке, со кулыны но быгатэ. Та туж кышкыт висёнъёс, соосын секыт нюръяськыны. Кылсярысь, коклюшлэсь нокыӵе эмъюм малпамын ӧвӧл на.

Кышкатъя пужы
Кылем арын кӧня ке мурт пужыен висьыны ӧдъяз. Соку ик тодмо луиз, вирусэз шаерамы палэнысь вуттӥзы шуыса. Пичиослы со ӧз паласькы, бадӟымъёслы гинэ: уго нылпиосыз утизы пуктэм прививкаос, нош анай-атайёссы, песянай-песятайёссы ас вакытаз ревакцинация лэсьтӥллямтэ, соин сэрен тазалыксы пужыен нюръяськыны ӧз вормы. Укол басьтон понна вазиськоно эмъян учреждениосы.

— Шаерамы 30 сюрс пала адями арлы быдэ грипплэсь прививкалы вазиське, сомында муртлы ик лемтэй висёнлэсь укол пукто. Соос пӧлын тросгес нылпиос, дышетскисьёс, эмъясьёс, транспортын ужасьёс. Удмуртиысь вань улӥсьёс пӧлын сыӵеос 25 процент луо. Со сяна, ас уксёенызы вакцина басьтыса, ужасьёссылы прививкаос пуктыло куд-ог азьмынӥсь огазеяськонъёс, — вера Людмила Гузнищева.

Вераськонъёс мыно, туэ грипплэн выль формаез кылдоз шуыса. Эмъясьёс соин нюръяськыны дасясько ни: басьтэмын тырмыт вакцинаос. Пусъёно на: прививкаос нимысьтыз соизлэсь яке таизлэсь грипплэсь уз пуктӥське, нырысь ик соос тазалыкез, иммунитетэз юнматон вылысь лэсьтӥськозы.

Елена Рябина

Удмурт Дунне
By Удмурт Дунне 6 августа, 2013 11:03
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<