Вань сюресъёс вутто загсэ

Удмурт Дунне
By Удмурт Дунне Август 2, 2013 15:21
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Вань сюресъёс вутто загсэ

 

Л. Попова

Л. Попова

Адямилы улонэ сюрес сётэ Вордӥськем сярысь свидетельство. Улонысьтыз мукет валтӥсь учыръёс но пусйисько загсын. Удыслэн ужамез пумысен вера Правительство вӧзысь Загс ужпумъёсъя комитетэн кивалтӥсь Людмила Попова.

— Людмила Александровна, мар бордын ужало Удмуртиысь загс ёзъёс?

— Милесьтым комитетмес ӵошатыны уг луы Дышетонъя но наукая, Тазалыкез утёнъя, Калыкез улон-вылонын утёнъя кадь бадӟым министерствоосын. Та ведомствоос пӧртэм ужпумъёсты быдэсъяло, таин валче соослы федерал но элькун бюджетъёсысь трос коньдон висъяське. Нош загс удыс — сюбег, соин герӟаськем вань валтӥсь ужпумъёс пыремын 1997-тӥ арын 15-тӥ ноябре кутэм 143 номеро федерал законэ но мукет актъёсы.

Милям юрттэтмылы кулэяське вань калык. Загслэн ёзъёсыз пыр туж трос гожтӥсько гражданъёслэн улонэнызы герӟаськем актъёс, мукет ужъёсын но выроно луэ. Араз загс ёзъёсы вазиське шаерысьтымы котькуд сизьыметӥез адями.

Загс удысэн кивалтэ Россия Федерация, но ужъёсты быдэсъян оскемын улосъёслы, муниципал кылдытэтъёсты но вераса. Удмуртиын Загс ужпумъёсъя комитет быдэсъясь ёзъёс пӧлы пыре. Удмурт Республикаын 2007-тӥ арын 20-тӥ мартэ кутэм 8 номеро законъя вань быдэсъян ужъёс оскемын республикаысьтымы загслэн ёзъёсызлы, но соосын кивалтон но эскерон уж комитетлы кельтэмын.

— Городъёсысь но ёросъёсысь загслэн ёзъёсыз но комитет кыӵе юрттэт сётыны быгато?

— Комитет быдэсъя куд-ог федерал куронъёсты, нош интыосысь ёзъёслэн сыӵе луонлыкъёссы ӧвӧл. Кылсярысь, комитетлэн правоез вань апостиль — нимысьтыз штамп — пуктыны кунгож сьӧры дышетскыны яке пыраклы улыны мынӥсьёслэн документъёссы вылэ. Вераны кулэ, араз 500 пала адями апостильлы вазиське. Озьы ик комитет пыр гинэ сётӥське ыштэмез интые вылез свидетельство яке справка.

Бадӟым уж нуиськомы кун регистрацияя актъёслэсь кыкетӥ экземплярзэс утёнъя. Историез тодэ ваёно ке, Россиын улӥсьёс сярысь ивортонъёсты гожъяны кутскизы Пётр Первый дырысен. Азьвыл та уж нуиськиз черкъёсын: метрикая книгаосы гожтылӥзы вордӥськемез, венчаться кариськемез но кулэмез. Черкын ужасьёс дорын утиськиз со гожтэмлэн кыкез ик экземплярез: одӥгзэ кельтылӥзы приходэ, мукетсэ келяллязы консисторие — валтӥсь духовной управление.

Совето власть но та амалъя ик ужзэ радъяз. Одӥгез акт, шуом, сельсоветын утиськиз, кыкетӥзэ возизы ёросысь, волостьысь загс ёзын. Туннэ но актъёс кык экземплярен лэсьтӥсько. Нырысетӥез кыле загс ёзэ, кыкетӥзэ келяло комитетэ.

— Макем бадӟым комитетлэн архивез?

— Комитетын возисько республикаямы улӥсьёс пумысен 1927-тӥ арысен актъёслэн кыкетӥ экземпляръёссы, нош загс ёзъёсын — 1925-тӥ арысен нырысетӥ экземпляръёс. Милям вань туала куронъёслы тупась куинь хранилищемы вордӥськем, вордосэ басьтэм, атаез тодэм, кузпалъяськем, люкиськем но кулэм сярысь актъёсты утён понна. Фондмы электрон амалэ выжтэмын 1993-тӥ арысен. Та вакытэ валтӥсь ужпум — кылем даурысь 20-тӥ-30-тӥ аръёсысь вужмем документъёсты электрон амалэ выжтон. Талы кулэ луоз 2 миллион 400 сюрс манет. Правительство куронмес умоен лыдъяз. Оскиськомы, матысь дыре элькун но федерал бюджетъёсысь юрттэт луоз.

— Кытысь коньдон висъяське удыстылы?

— Федерал бюджетысь коньдон ар пумын вуэ Россия Федерациысь Юстицияя министерстволэн Удмурт Республикая управлениезлэн счётаз, собере сое выжто элькун бюджетэ. Куронъёсмыя со шаерысьтымы загс ёзъёслы висъяське ни Коньдон ужпумъёсъя министерство пыр. Огъя заявкаосты сётӥськомы котькуд толэзе. Тани Ижевск городлы араз висъяське 22 миллион манет: куинь загслы но Эшъяськон юртысь гожтӥськон заллы. Валамон, ёрос ёзъёсы коньдон ӧжытгес мынэ.

Нош комитетлы — кун кивалтэтлэн быдэсъясь ёзэзлы — коньдон висъяське элькун бюджетысь. Со уксё трос ӧвӧл, 90 процентэз кошке уждунлы но пӧртэм фондъёсы налог тыронлы. Удмурт Республикалэн Президентэз но Правительство озьы ик коньдон висъяло загс ёзъёсысь гожтӥськон залъёсты но ужан юртъёсты выльдыны-тупатъяны.

— Секыт ӧвӧл-а загс ёзъёс куспын коньдонэз висъяны?

— Милям со ваньмыз радъямын. Городъёсысь но ёросъёсысь муниципал кылдытэтъёс 1-тӥ маёзь ивортыны кулэ ни, вуоно арын кӧня коньдон кулэ луоз, кытчы со кутӥськоз. Удысысьтымы вань кивалтӥсьёсын ӵош апреле кенеш ортчытӥськом. Отын эскериськом ини, кытчы висъяно бюджет коньдонэз.

2012-тӥ арын Удмуртиысь загс ёзъёслы сётэмын вал 73 миллион 211 сюрс 405 манет тыр субвенциос. Cо пӧлысь 42 миллион 606 сюрсэз уждун тырыны кошкиз, 1 миллион 405 сюрсэз — связез радъянлы, 106 сюрсэз — транспортэн юрттэтлы, 2,5 миллионэз — коммунальной юрттэтлы, 11 миллионэз — юртъёсты выльдон-тупатонлы но ужан тӥрлык басьтыны, 15 миллионэз — тылпулэсь но лушкаськонъёслэсь утиськонлы, мебель но пӧртэм арбериос басьтыны.

Интыысь кивалтон ёзъёс ар ӵоже ивортонъёс лэсьто калыклы юрттэт сётэмзы пумысен, кытчы мынэ висъям коньдон. Бюджет уксёез кутэм пумысен ивортонъёсты котькуд аре сайтамы сётӥськом.

— Загс ёзъёс берло дыре калыклы юрттэт сётонэз электрон амалэ выжтон бордын ужало.

— Бен. Кылем арын Ижын улӥсьёс кузпалъяськон сярысь куриськонзэс гожтыны быгатӥзы ни электрон амалэн. Сое ужатон понна нимысьтыз программа басьтӥмы. Нош таяз арын шаерысьтымы вань мылкыд карисьёс куриськонъёссэс сётыны быгатозы ни загслэн ёзъёсаз. Та юрттэтэз улонэ пыӵатыны быгатӥмы федерал бюджет чотын. Республикаысьтымы Информатизацияя но связья министерство озьы ик юрттэ кун услугаосты электрон амалэ выжтыны.

Печатлаське «Удмурт Республикалэн 2011-тӥ-2013-тӥ аръёслы чаклам бюджетысьтыз расходъёсты ӟечомытон» программаез но «Шара бюджет» проектэз быдэстон улсын.

Сергей Захаров

Удмурт Дунне
By Удмурт Дунне Август 2, 2013 15:21
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<