Улонын рользы — рольёс

Удмурт Дунне
By Удмурт Дунне 30 августа, 2013 13:44
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Улонын рользы — рольёс

Щукин нимо училищеез 40 ар талэсь азьло йылпумъязы Ф. Будина, Г. Владыкина, В. Байков, Р. Нефёдова, П. Романов

Щукин нимо училищеез 40 ар талэсь азьло йылпумъязы Ф. Будина, Г. Владыкина, В. Байков, Р. Нефёдова, П. Романов

Удмурт театрын, жадёнэз тодытэк, 40 ар пала шудо ни Москваысь Щукин нимо вылӥ театральной училищеез йылпумъямъёс. Ӵапак соос вылын ик возиське туала театрмы. Котькудӥз ог сю пӧртэм рольёсты шудӥз, соос пыр кыдаз, будӥз.

Галина Владыкина
Россиысь дано артистка Галина Владыкина котьку но шудэ оскымон, сцена вылын ассэ шӧдэ эрикын. Сокем быгатыса быдэстэ рольёссэ, валамысь ик дугдӥськод: сцена вылын-а со рользэ шудэ яке зэмос улонын. Со, шуом, Грация — кескич но пӧяськись нылкышно (И. Гавриловлэн «Пужъятэм дэрем» комедиез), яке шаплы но визьмо Мартина (Ж.-Б. Мольеръя пуктэм «Эриктэм эмъясь» спектакль), оло нош «Яратэ — уг яраты» (Ф. Буляков) драмаысь Васёна — картэзлэсь шуныт кылъёссэ ноку но кылымтэ кышно, яке капчи мылкыдо, ӟечезлы оскись Василина (Ф. Буляков «Бызьыны вуэм песяйёс»). Со сяна, син шоры соку ик пуксе А. Григорьевлэн «Атас Гири» комедиысьтыз Дарья милиционер — егит, кышкасьтэм, дӥсьтӥсь. Г. Владыкина та ролез ик быдэстӥз, кӧня ке аръёс ортчыса — «Матронлэн егит картэз, яке Атас Гири-2» комедиын. Сыӵе ик задор, сыӵе ик дӥсьтӥсь, юморез валась. Син азе пуксе Галина Михайловналэн А. Островскийлэн «Гроза» пьесаысьтыз кивалтыны яратӥсь Кабанихалэсь рользэ быдэстэмез но уно мукет. Галина Владыкиналы капчиен сётӥсько котькыӵе рольёс, соосты со быдэстэ сюлмысь.

Фаина Будина
Россиысь дано артистка Фаина Будина кыӵе гинэ рольёсты ӧз быдэсты. Аслаз ик серемпыр верамез вань: пересьёсты но, мугорзэс вузась нылокъёсты но шудоно луиз. Капчиен быгатэ со одӥг образысь мукетаз выжыны, соослэсь пуш дуннезэс яркыт но оскымон возьматыны. «Арлэн усто ролез» — таӵе нимен 1980-тӥ арын пусъемын вал Фаина Будина А. Макаёноклэн «Трибунал» спектакляз шудэмез понна. Капчи ӧй вал солы, егит муртлы, пересь муртлэн образаз выйыны. Но ас бордаз ужамез, чиданлыкез та артисткалы юрттӥзы анайлэсь образзэ оскымон возьматыны. Тодэ лыктэ «Атас Гириысь» Матронлэн ролез но: кескич, нырзэ котькытчы чуртнась, аслыз кулэ дыръя сукыр яке кылӥсьтэм кариськись пересь зэмос улонысь кадь. Солэсь образзэ выросъёс пыр адӟытэм сяна, Ф. Будина сое возьматӥз вылтус ласянь но: йыраз кырыж-мерыж керттэм кышет улысь пельзэ поттыса. «Матронлэн егит картэз, яке Атас Гири-2» комедиын Будина-Матрон мӧйымемын ни, узырмон сярысь гинэ малпаське, пӧяськись муртлэн куриказ шеде, шудэз кема уг кыстӥськы.

Фаина Будиналэн творчествоысьтыз пусйытэк кельтыны уг луы «Медея» трагедиысь (удмурт кылэ берыктӥз А. Уваров, пуктӥз режиссёр А. Малых) Медеялэсь образзэ — яратӥсь но вожась, курадӟись кышномуртэ. Учкисьёслы вунонтэм кылиз Фаина Будиналэн «Бызьыны вуэм песяйёс» (Ф. Буляковъя) спектакльын Ивановналэсь, озьы ик «Зарнилэн сьӧлыкез» (Д. Мамин-Сибирякъя) пьесаын Марфалэсь рольёссэ шудэмез. Со сяна, та артистка огпол гинэ ӧз пыриськылы удмурт кылбуръёсты вольыт лыдӟонъя ӵошатсконъёсы.

Раиса Нефёдова
Удмуртиысь калык артистка Раиса Нефёдова синчеберзэ кадь утьыса возе дышетӥсезлэсь М. Тер-Захаровалэсь гожтэмзэ: «Сӥзисько тыныд выль инвисъёсы кыстӥськондэ быдэс улонэд ӵоже нуыны. «Дуэньяысь» монашкалэсь образзэ гинэ ӧвӧл, ӟырдыт мылкыдо испанкалэсь рользэ но ӟеч мед пӧрмытод».

Жаляса верано, испанкаез шудыны Раиса Геннадьевналы ӧз кылды, но ӟырдыт темпераментэн кышноосты возьматоно луиз ик. Кыдёке ветлонэз ӧвӧл: макем учкымон быдэстӥз со А. Григорьевлэн «Эмезь кисьмаку» комедиысьтыз райисполкомысь чиновниклэсь Эмма Ивановналэсь рользэ. Комедиын яркыт шудыны быгатэмзэ Нефёдова возьматӥз «Мае кизёд, сое аралод» (С. Лобозёров) спектакльысь Катериналэн ролез пыр.

Раиса Геннадьевна котьку но висъяське йӧно, кыл вылаз сылыны быгатӥсь, юн сямо луэменыз но котькуд вамышсэ малпаса лэсьтэменыз. Артисткалэн зэмос улонысь сямъёсыз паймымон герӟаськизы сцена вылын возьматэм образъёсыныз: А. Афиногеновлэн «Машенька» пьесаысьтыз крезьгуръя дышетӥсь Нина Александровна, Т. Черновалэн но В. Ушаковлэн крезьгуро «Айна» драмаысьтызы Узыбей. Яке басьтом тани Ю. Поляковлэн пьесаезъя пуктэм «Улон-шудон» спектаклез. Раиса Нефёдова отын шудэ войнае пыриськемез бӧрсьы инвалид кылем пияшлэсь анайзэ — Евгения Петровнаез. Улон вылэ ӝожтӥськытэк, анай шунытсэ сётыса, макем утялтэ, сюлмаське со пиез сярысь. Пиезлэсь эшъёссэ но со улонэз валаны дышетэ лякыт кылъёсын. Р. Нефёдовалэн шудэмез татын туж учкымон.

Пётр Романов
Пётр Михайлович Романовлы ужез яратон мылкыд пичи дырысеныз пыӵамын, Россиысь дано артистлы та ӟеч сям юрттэ улоназ но, творчествояз но. Солы угось шудоно луэ пӧртэмлэсь пӧртэм рольёсты. Котькудӥз пыр шӧдӥське та артистлэн улон шоры учконъёсыз, лякыт юморез.

Али ке но син азям пуксе егит артистлэн «Бугырес тулыс» (Е. Загребин) спектакльын куанер муртлэсь Пылькинлэсь рользэ шудэмез. Макем ӟеч возьматӥз со музъем ужасьлэсь пуш дуннезэ. И. Гавриловлэн романэзъя пуктэм, Удмурт театрлэн кылдонэзлы сӥзем «Вордӥськон» спектакльын Пётр Романов возьматӥз Волин режиссёрлэсь образзэ. Та геройлэн прототипез луиз РСФСР-ысь калык артист, нырысетӥез профессиональной режиссёр Кузьма Ложкин. Пётр Михайловичлы угось соин ӵош ужаны кылдӥз на. Та ик юрттӥз артистлы солэсь образзэ туж оскымон возьматыны. Пётр Романовлэн тужгес но яратоно ролез — Ф. Абрамовлэн романэзъя пуктэм «Кык тол но куинь гужем» спектакльысь Михаил Пряслин. Романовлэн героез юн сямо, юн вамышен азьлань мынӥсь. Нош «Атас Гири», «Эриктэм эмъясь» комедиосын артист чылкак мукет образэ выже. Майталов — пӧяськись, гольтыръяськись, йӧнтэм. Нош Лиандр — зэмос герой-любовник. Михаил Пряслин но Майталов, Лиандр — вань та рольёс Пётр Романовен быдэстэмын одӥг группаын ӵош дышетскем эшезлэн, Удмурт Республикаысь искусство удысысь дано ужасьлэн Василий Ушаковлэн пуктэм пьесаосаз.

Пётр Михайлович мон понна вунонтэм кылиз на Н. Сидоровлэн «Улӥськом-вылӥськом, шу» спектакльысьтыз Антон пилэсь рользэ шудэменыз. Антон — кужмо адями. Но сое чигтӥзы 90-тӥ аръёсысь воштӥськонъёс. Семьяез тэшканы ӧдъяз, хозяйствоез куашканы кутскиз. Антон ваньзэ тае адӟе-вала, но номыр карыны уг быгаты… Нош В. Соллогублэн «Беда от нежного сердца» водевиляз Романов артистлэн героез — Золотников — чылкак мукет ини: со биньгозыез дыраз кутыны быгатэ.

Пётр Романовлэн берпуметӥ рольёсыз пӧлысь одӥгез — «Намер» (А. Григорьев) спектакльысь Яша. Ватытэк верано ке, пьеса ляб, сыӵе ик пӧрмиз спектакль но. Артист возьматэ семьязэ гажась, йӧно атаез. Но Пётр Романов кадь кужмо артистлы но секыт йӧтэ геройзэ авторен кылдытэм рамкаосысь поттыны.

Вячеслав Байков
Россиысь дано артист Вячеслав Байков — паськыт диапазонэн артист. Синмаськымон но туж ӟеч сюлэмо солэн героез Егор Полушкин — Б. Васильевлэн повестезъя пуктэм «Эн ыбылэ тӧдьы юсьёсты» пьесаын. Нош Ж.-Б. Мольерлэн «Эриктэм эмъясь» комедияз со быдэстэ Сганарельлэсь — лэчыт визьмо геройлэсь — рользэ.

«Атас Гири» спектакльын, комической амалъёсты кутыса, Вячеслав Петрович туж зэмос но оскымон кылдытэ Капыръяновлэсь образзэ. Учкисьлы сокем кельшиз солэн шудэмез — геройлэн образэз лякиськиз кадь артист борды. Вячеслав Петрович та пумысен шуэ: «Ачим ик паймисько та рольлы — Капыръяновез юри мон понна кылдытӥллям, кожалод». Байковлэн Капыръяновез вераськиз кавказ акцентэн, нош учкись чылкак абдраз, зэмос улонэз сценалэсь висъяны ӧз быгаты ни — ма, кызьы ай лымшор палан вордскем Капыръянов удмурт кылэз тодэ? Тодэ лыктэ М. Коноваловлэн «Гаян» романэзъя пуктэм спектакль, отын Байков шудӥз Емельян Пугачёвлэсь рользэ. Байковлэн Пугачёвез визьмо, огшоры калыкен огкыл шедьтыны быгатэ, но со вие ик тушмонъёсты синазькыль каре. Вячеслав Петрович яркыт возьматыны быгатӥз Е. Загребинлэн «Эш-Тэрек» трагедиысьтыз Перилэсь образзэ, озьы ик туж тунсыко потыса ужаз со «Тень Алангасара» нырысетӥ удмурт фильмын.

Вячеслав Байков ассэ эскериз режиссураын но. Со пуктӥз Т. Ардашевалэн пьесаезъя «Золотая птица» спектаклез но Г. Ходыревлэсь «Кызьы Анникаен Табыш Вумуртэз вормизы» выжыкылзэ. Капчиен ӧз сётскы Байков режиссёрлы В. Ванюшевен кылдытэм «Дорвыжы» удмурт эпос бордын ужан. Таӵе жанр угось театр понна выль. Секытэн сётскиз, но учкымон пӧрмиз бурлеск жанрен пуктэм «Пужъятэм дэрем» спектаклез (И. Гавриловлэн комедиезъя).

Улонын В. Байков — тунсыко адями, серемес вераськыны быгатӥсь, лэчыт визьмо. Учкисьёслы со тодмо юморескаосты, серемес веросъёсты лыдӟеменыз, артистъёслэн улонысьтызы тунсыко учыръёсты мадеменыз.

* * *
Щукин нимо училищеез йылпумъямъёслэн творчествоязы котьку шӧдӥськиз дышетскыкузы Вахтангов нимо театрын шудэмзы. Татын соосты дышетӥзы ужзэс яратыны, мур малпанъёсты учкись доры вуттыны, котьку њеч мылкыдо луыны. Соосты сюлмаськытэ театрлэн азьлань улонэз, угось театр номырин воштонтэм луэ калык культураез утёнын, азинтонын.

Анна Евсеева

Удмурт Дунне
By Удмурт Дунне 30 августа, 2013 13:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<