Удмуртия но фестиваль — люконтэм

Удмурт Дунне
By Удмурт Дунне 31 августа, 2013 04:37
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93
Updated

Удмуртия но фестиваль — люконтэм

Брангуртъёс куноосты пумитазы удмурт сямъя - пыжиськыса

Брангуртъёс куноосты пумитазы удмурт сямъя — пыжиськыса

Культурая министр Дмитрий Иванов шаерысьтымы иворчиосын пумиськиз. Кенешон сӥземын вал калык творчествоя Брангурт фестивальлы, вуоно театр сезонлы но 2014-тӥ арлы — со лулчеберетлэн ареныз ялэмын.

Брангурт — шаерлэн ымнырыз
Калык творчествоя нырысетӥез калыккуспо Брангурт фестиваль быдӟалаеныз паймытэ. Кичӧлтӥсьёсыз — Россиысь культурая министр Владимир Мединский но Удмуртилэн Президентэз Александр Волков. Шӧдскымон юрттэт сётӥз Россиысь калык творчествоя юрт, фестивале лыктӥз кивалтӥсез Тамара Пуртова. Фестивале ньыльдонлэсь ятыр куриськон вуиз, тямысэз фольклор коллектив шаермылэсь данзэ утёз. Шоркарысь куноос — М. Пятницкий нимо академической ӟуч хор, Д. Покровскийлэн ансамблез но эктонъя но кырӟанъя «Садко» ансамбль.

Ужрадъёс пӧртэм интыосын ортчо. Д. Ивановлэн чакламезъя, фестивальлэн увертюраез яке кутсконэз — Брангуртын тодматскон ӝыт, «Брангурт шыкысъёс» шулдыръяськон.

30-тӥ гудырикошконэ 10 часын Ижкарысь Эшъяськон юртын ортчоз «Глобализация вакытэ материальной луисьтэм калык узырлыкез утён» котрес ӝӧк. 17 часын фестиваль сӥё-дано усьтӥськоз циркын.

31-тӥ августэ 11 часэ мылкыд карисьёсты ӧте «Лудорвай» музей, татын жингыртоз «Юмшан» базар. 19 часысен Ӟуч театрын — бадӟым гала-концерт.

1-тӥ куарусёнэ 16 часэ циркын фестивальлы йылпумъянъёс лэсьтэмын луозы. 19 часэ Эшъяськон юрт азьын этнопозыръяськон гудыртоз. Татчы вань мылкыд карисьёс вуыны быгато.

Нимысьтыз радъямын калык куиськон сямлы сӥзем ужрад, пӧртэм улосъёсысь ог 50 куиськисьёс вуыны кулэ. 3-тӥ куарусёнэ кунгожсьӧр куноос шаеренымы тодматскозы, соос поталозы Кияса, Дэри, Вотка ёросъёсы. Перевозное черкогуртын Португалиысь артистъёсты кияр сылалтыны дышетозы, киясаос куноослы Пётр Кривоногов баталистлэсь музей-юртсэ возьматозы.

Фестивальлэн валтӥсь малпанэз — вашкала крезьгур узырлыкез утёно. Брангурт песянайёс вужзэ выленыз герӟаны пӧрмытӥзы, ӵапак таиз — валтӥсь вормонзы, пусйиз министр. Фестивалез чакламын 2 арлы огпол рядъяны, элькун тыршоз сое вордскем музъем выламы кельтыны. Такем бусьтыр ужрадъёсын котькыӵеез улосвыл ушъяськыны уг быгаты. Зэм, берло дыре Удмуртилэн фестиваль феноменэз син шоры йӧтэ. Асьме дорын ортчо Цирк фестиваль, Чайковский нуналъёс, Гербер, Сабантуй… Фестивалез радъян капчиен уг сётӥськы, но со аспӧртэм уксё кыскон амаллы пӧрме. Брангурт фестивальлэн бюджетэз — 13 миллион манет. 3 миллионзэ висъяз элькун, кылемзэ — федерация.

Опера шутэтскоз
Культура удысын матысь дыре бадӟым лыдпусъёсты пусъён чакламын: 5 ар тырме Ижкарысь зоопарклы, 10 ар — цирклы. Операя но балетъя театр 1,5 арлы пытсаськоз — выль сезонзэ театр уз усьты. 1-тӥ куарусёнысен тупатъян ужъёс кутскозы. Али ик дасямын ни залэз чеберматон эскизъёс, соосты малпаз «Удмуртгражданпроект». Труппа ужтэк уз пукы. Кылсярысь, симфонической оркестр кӧня ке толэзьлы Калык творчествоя юртэ — Егитъёслэн коркаязы выжоз. Артистъёс 6 спектакль дасян бордын ужаны медо. Выль юртэз турлы репертуарен усьтозы. Со сяна, гастрольёсы потаны но камерной программаосты дасяны чакламын. Валамон, «Аидаез» Шарканэ уз нуэ, пальпотӥз Дмитрий Иванов, нош артистъёслы азьтэмскыны ӧвӧл сётоно.

650 миллион манет висъяз Россия Операя но балетъя театрез тупатъян вылысь.

2014-тӥ арын Чайковский нимо фестивале вуыны соглаш луэмзэ ивортӥз ни В. Гергиев. 2015-тӥ арын, шаерамы вордскем классиклы 175 ар тырмыку, фестиваль эшшо но паськыталоз. Культурая министерство бадӟым юрттэтлы оске. 2014-тӥ ар Россиын культуралэн ареныз нимамын. Таин валче асьме учреждениос грантъёс утӥзы. Элькунысьтымы киужъёсъя юрт выльдӥськон ужъёслы 5 миллион манет басьтоз, Калашников нимо музей Михаил Тимофеевичлэн 95 арес тырмемезлы сӥзем адӟытонэз радъяны — озьы ик 5 миллион. Азьло кадь ик чакламын ёросъёсты «пыкъян»: азьланьтӥськозы тужгес но усто лыдӟиськон юртэз, модельной клубез шараясь ӵошатсконъёс.

Дарали Лели
Туспуктӥз Владимир Беломорских

Удмурт Дунне
By Удмурт Дунне 31 августа, 2013 04:37 Updated
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<