Тайга

Удмурт Дунне
By Удмурт Дунне Август 26, 2013 13:42

Тайга

789Пермь улосысь нюлэсъёсы тулыс котьку но бер вуэ но огдырлы ас интыяз сылме тэль. Тужгес но яркытгес адӟиське зэмос тулыс зор бере. Со ньылэ берпуметӥ курмем лымы люкъёсты. Быдэс омыр но пыӵа кадь яркыт тулыс шундылэн шунытэныз. Тӧл но небытгес луэ, веша тылобурдоосты но соку гинэ бычырась турын-куарез. Тужгес но со писпуослэн ненег куаръёсазы чималиен шудыны яратылэ. Дауръёсын сылӥсь кедръёс вискытӥ виштыен-виштыен быльыра чагыр инбам. Коть быдэс нунал ӵоже долкаса сыл, инметӥ уясь баблес, шукы кадь пилемъёс шоры учкыса.

Эшшо одӥг тулысэз пумитаз на Кирло буба пуныеныз нюлэс кушын. Сое колхоз пред пуктӥз нюлэсэз возьманы. Ма, гурт калык но Кирло бубалы оскиз. Озьы пересь каръяськиз нюлэс куше. Семьязэ Кирло ыштӥз, тӧдьыосын ожмаськыкуз. Гордъёс пала дурбасьтэ шуэмысьтыз, тӧдьыос гуртысьтызы узыръёсын вань семьязэ ыбизы. Озьы воргорон та дунне вылэ тыпак огназ кылиз. Пеймыт нюлэслэсь ӧз кышка. Одӥг гужем нунал, быдэс гурт калыкез люкаса, веме лэсьтӥз: губырскем, някырскем коркаез выльдӥз. Озьы воргорон ваче син кылиз нюлэсэн. Ма, куд-ог дыръя Кирлолы потылӥз: нюлэс сое эскере, вазе но пумитаз. Кирло буба тэль возьмась луэм бере, котыр инкуазь капчиен лулӟиз кадь. Гурт калык но кышкатэк я губилы, я кудымульылы нюлэскы вамыштылӥз.

Кирло буба сьӧраз басьтӥз пунызэ гинэ, нош улыно-вылоно юртсэ колхозлы кельтӥз. Отын, пе, школа усьтозы, нош оглюкетаз улоз выль дышетӥсь. Та иворлы Кирло мынектӥз гинэ, мед, пе, марлы ке но яралоз. Ӵогам юрт, огназ кылем адями кадь, кема уг века, сисьме, губырске.

* * *
Кирло нюлэсэз пичи дырысен вань сюлмыныз яратӥз. Ай аслаз атаеныз со гурт котырысьтызы нюлэскез кечат-вамат ортчизы. Озьы Кирло кынем синъёсыныз но тодмо сюресъёсты шедьтысал. Нюлэсазы кышкыт интыос вал. Татын горд шапыкъёсын нюрмульы но ягмульы асьсэос кудые курисько ке но, адямиос нюр интыез палэнтӥ ортчылӥзы. Кирло гинэ тодылӥз пичигес гинэ сюресэз, пыдесозь вуэ пыроно ке но, пыдъёс йыг-йыг музъем вылын сыло. Та сюресэз Кирлолы возьматӥз вал атаез.

Кирло татын Жингрес нимо пуныеныз улэ. Лусьтроез дас ареслэсь бадӟым ини, но туэ гинэ нырысьсэ кучапи вайиз. Туж сюлмаськиз пересь, угось пуныос таӵе арлыдазы уг ни пияло, нош юнме гинэ малпаськем: ваньмыз умой ортчиз.

Жингрес Кирло буба дорын кема аръёс улэ ни. Трос ӟичыосты но лудкечъёсты кутылӥз. Жингрес куараез, пичи гырлы кадь, чузъяськиз быдэс нюлэс тыр. Соин но Кирло буба пунылы сыӵе аспӧртэм ним сётӥз. Ньыльпыдозэ вузаны курисьёс но вал, но пересь лушкемак мынекъяз гинэ тамакен пыӵам мыйыказ: Жингрес — солэн зэмос эшез, нош эшъёсты уг вузало.

Кирло буба пунызэ маялтӥз. Дыр ӝог ортче, ваньмыз пересьме, вужме. Тани Жингреслэн но чиль-чиль сьӧд гонъёсаз пумисько гӧртэм нюжаос. Пунылэн гадьыз секытэн но секытэн ӝутскылӥз, нош пеймыт-курень синъёсыз адямилэн кадь визьмоесь учкизы дунне шоры. Пунылэн синъёсаз вал яратон: я со нюлыштылӥз кучапизэ, я, каллен нискетыса, нырыныз донгыны выриз синтэм комокез ноны пала, я лобырес быжыныз выретыса, лушкемак уӵертылӥз кузёез пала. Пересь ни ке но Жингрес, интыяз со кельтоз ачиз кадь ик нылзэ, шумпотонзэ уг ваты Кирло буба.

Огез гинэ урод: Жингреслэн трос люкаське йӧлыз, кучапиез ваньзэ ноныса уг быдтылы. Соин пересь Кирло малпаз гуртэ ветлыны, мукет кучапиосты шедьтыны.

Ог ӵукна, шунды но ӝужамын ӧй на вал, пиосмурт дасяськиз сюрес вылэ. Шабигуртозь кӧльыен шобыртэм сюрес вылтӥ ог кызь иськем люкаськоз, нош меӵак нюлэс вамен потоно ке — ог тямыс гинэ луоз. Нюлэскытӥ вамышъяны лякыт вал: пересь быдэс гадьыныз шокыштӥз юзмыт нюлэс омырез, пыдъёсыз небыт лёгаськизы ӝуйы но усем кыз лысъёс вылтӥ.

Мур нюк пала вуыкуз, Кирло нырысь кылзӥськиз коӵоослэсь кыӵыртэмзэс, нош кӧня ке улыса, тӧл вуттӥз шӧй зынэз. «Кионлэн карез», — чилектӥз пересьлэн йыраз. Со пельпумысьтыз пыӵалзэ басьтӥз но вамыштӥз коӵоослэн «вераськемзы» пала. Гуысь пересь пала дыртӥз кионлэн вужерез. Кирло буба ӧз дыректы: кызъёслэн йылъёстӥзы чузъяськиз ыбем куара. Воргорон азе секытэн усиз кионлэн шӧйыз. Синъёсыз вирен пыӵамын, берпум шокчемез бере но адями вылэ омырскыны дасяськем кадь… Нюлэс возьмась эшшо огпол пыӵалзэ зарадаз но дыртӥз котыр эскериськыны. Нюк улысь векчи пипуос пӧлын сильтӧлэн погыртэм пужымлэн выжыяз мумы кион лэсьтэм аслыз кар. Отысь Кирло буба поттӥз куинь синтэмесь кионпиосты: кык айы но одӥг мумы. Кионпиос, анайзэс утчаса, кӧт вылазы нюжтӥськизы. Ог-огзэс донгаса, тодмотэм адямилэсь зынзэ шӧдыса. Одӥг кионпи гинэ пересь пала кыстӥськиз, гольык чиньыез шедьтыса, сюпкетыны ӧдъяз. Соку Кирло бубалы йыраз лыктӥз: оло та мумы кионпиез аслыз басьтоно?

Кионпиосты котомкаяз интыяса, Кирло буба пересь изьверез сюен согиз но сюрессэ азьланьтӥз. Гуртэ вуыса, воргорон нырысь ик кожиз колхоз председатель доры. Иван Максимович соглаш луиз кионпиосты райцентре нуыны. Нош одӥгзэ Кирло сьӧраз кутӥз. Пельпум сьӧраз каллен нискетӥз кионпи: оло сиемез потэмен, оло муминыз люкиськемен.

Котьку сямен Жингрес кузёзэ пумитаз ӧс куспын. Кирло буба пуны борды понӥз нюлэскысь шедьтэм луло комокез. Соиз каллен нискетӥз, кыстӥськиз пуны пала. Жингрес паймыса учкиз кионпи шоры, кузёез пала. Кионпи пичи ке но, бордысьтыз кыстӥське адӟемпотостэм тушмонэзлэн зыныз. Кема ӧз малпаськы пуны — мумы сюлэм вормиз. Жингрес кионпиез вордосэ басьтӥз.

* * *
Дыр ӝог бызе. Кемалась ӧвӧл ни Кирло бубалэн гордалэс пуныез. Со интые пичи нюлэс коркае кылиз сыӵе ик горд нылыз — Гордань. Но бордаз интыяськиз кион — Тайга. Кыӵе пӧртэмесь вал соос: Гордань — пичи мугоро, пиштӥсь гонэз кыдёкысен адскиз, куараез но жингрес чузъяськиз. Нош Тайга пичи кышкась комокысь пӧрмиз бадӟым пурысялэс гоно кионлы. Кирло буба выриз кионэз дышетыны ӵӧжъёсты но лудкечъёсты кутылыны — ӧз пӧрмы. Изьверлэн пушказ сайказы кадь кема дауръёсын но мукет кионъёсын люкам тодонъёсыз. Тайга, йырзэ урдыса, палэнысен чаклаз Горданьлэсь дэриез коласа, жингрес утыса шашыос пӧлтӥ бызьылэмзэ. Пунылэсь кышкаса, инме лопырак ӝутскизы куаем ӵӧжъёс. Кирло буба сое гинэ возьмаса сылӥз — омырез пилиз пыӵалысь ыбем куара. Ву вылэ усиз тылобурдо. Гордань быдэс мугорыныз дыртӥз вием бурдо понна ӵыпетэ зымыны. Тайга тае эскериз палэнын, вуэ ӧз пыры, кужмо ангессэ юнме ӧз усьты.

Нырысь лымы усем бере Кирло буба малпаз Тайгаез лудкечъёслэн но ӟичыослэн пытьыоссыя нуллыны. Но озьы гинэ уг луы вылэм. Зэм, Тайга ӝог валаз, ма со лэсьтыны кулэ. Кионлэн угось пельыз но нырыз умойгес шӧдӥзы котыр дуннеысь куараосты. Но солэн кутэм лудкечъёсыз Кирло доры ӧз вуэ, малы ке шуоно Тайга, шуныт вирез шӧдыса, пӧйшуръёсты лакыр! кесялляз: сӥлез но, куэз но номырлы ӧз яралэ ни.

— Кызьы меда Тайгаез пӧйшураны дышетоно? — трос пол малпаськылӥз Кирло буба кион шоры учконъяз. Угось Тайга гуртоослы кышкытлык уг ке но вайы, колхоз пред трос пол курылӥз Кирлоез кионзэ виыны.

— Оло оскалтоно соин кион вылэ мыныны? — Кирло буба ас малпанэзлы паймыса, валес вылысьтыз ик султӥз.

— Январе ик, тросгес лымы усем бере, Тайгаен луоз пӧйшураны потыны, — гур азе пуксьыса, оло аслыз, оло кионлы вазиз Кирло буба. Гурысь ӝуась сэрегпумъёсты бугыртыса, пересь ӵындӥз тамаксэ но, тӧдьы тушсэ маялтыса, каллен вазиз на: — Тайга вузэменыз ас палаз ӧтёз кионэз, нош мон сое ыбо.

* * *
Сӥзьыл ик Кирло буба синйылтӥз кион ветлон сюресъёсты но отчы куд-ог тужгес но ӝужыт писпуосы лабазъёс (пӧйшурасьёслы султон интыос) лэсьтыса кельтӥз. Озьы вуиз тол, юнмазы кезьытъёс. Кирло буба тае гинэ возьмаса улӥз. Воргорон Тайгалэн чыртыяз думиз пужым лысъёс пӧлын пӧзьтэм кулэсь кал — озьы адями зын ышоз. Пересь, шунытгес дӥсяськыса, потӥз сюрес вылэ. Нюлэс дуре вуыса, Кирло кионэз думетысь лэзиз — пӧйшур тросгес пытьы мед кельтоз. Собере дораз ӧтьыса, воргорон кионэз думиз пужым борды. Ачиз тубиз писпуэ.

Инмын тыр толэзь яркыт пиштӥз. Югдытӥз лымы люкъёсты, нюлэс палтӥ кынмем шурлэсь бервылзэ. Кезьыт лыосты ик зубектытэ. Уйшор вуыса, Кирло буба каньылак гинэ вазиз кионлы. Тайга, татчыозь шыпыт пукыса, жадем кадь, интыысьтыз вырӟиз, пужымлэсь палэнскыны вырыса кадь, нискетыны кутскиз. Тыр толэзь, огдырлы пилем сьӧры ватскыса, выльысь кырмыштӥз. Аслаз кезьыт югытэныз пиштытӥз котыр дуннеез. Кирло буба пужым вайёс пӧлысь куаретӥз: «Кырӟа, Тайга!» Сое гинэ возьмам кадь, мумы кион, толэзь пала йырзэ урдыса, вузыны кутскиз. Оло эриксэ ыштэмез сярысь пӧйшур кырӟаз, оло нюлэслэсь мӧзмемез сярысь бӧрдӥз… Кирло бубалэн, та кырӟанэз кылыса, быдэс мугорыз юзыр-кезьыр луиз, тодаз лыктӥз Тайгаез шедьтэмез. Нош кион вузӥз но вузӥз. Тӧл со вузэмез ас сьӧраз нуиз: лымыен шобырскем бусыез потыса, бергатӥз шур вылын но выльысь выйиз нюлэс пушкы. Котыр чал-чал луиз, быдэс инкуазь кылзӥз кадь кионлэсь кырӟамзэ.

Но тани шур сьӧрысь кылӥськиз мукет кионлэн вузэмез. Тайга чусомиз, чигназ пужымлэн вужераз. Нош мукет кион, огдырлы чусомыса, выльысь куаразэ сётӥз. Ӧтиз кадь, сюрес возьматыны курыса… Тайга пушкын зэмос кион сайказ. Вожомыса учкиз Кирло буба пала но солэн киысьтыз кулон вайись пыӵалэз шоры… Изьвер азьлань кыстаськиз, но корт жильы сое ӧз лэзьы.

Тайга мар карыны ӧз вала ни, куанер я азьлань бызе, я берлань чигна. Нош мукет кион матэ но матэ вуэ, вузэмез золгес но золгес кылӥськиз ни. Тани ачиз но адӟиськиз: йырзэ музъемозь лэзьыса, бусые потӥз айы кион. Тайга соку потӥз пужымлэн вужерысьтыз. Кирло бубалы туж умой адӟиськиз айы кион: толэзьлэн сиосыз чилязы кузь тӧдьы гоназ, бадӟым мӧляяз, кужмо пыдъёсаз но чорк сылӥсь пельёсаз.

Тайга каллен нискетыны кутскиз, шӧдӥз кадь воргоронлэсь малпанзэ. Айы кион дыртӥз выль тодмоез пала, матэ но матэ вуэ. Тани кылиз на витьтон вамыш, ньыльдон, куамын… Кирло зӥбиз пыӵаллэсь куриксэ… Омырез пилиз ыбем куара. Огдырлы чусомиз быдэс дунне. Оло, пересьлэн киосыз дыректӥзы, оло синмыз ляб адӟиз — кион улэп кылиз. Айы кион тӧлэн ӵошатскыса кадь, мур лымые выйылыса, берытскиз но нюлэс пала бызиз. Тайга нош но нош кыстаськиз, чыртыысьтыз калэз ӧз чида — Тайгалы эрик кузьмаса, чигиськиз. Оло ноку но тазьы ӧз бызь на вал кион: азьлань, выль улон пала, азьлань, тодмотэм пеймыт нюлэс пушкы… Кыдёке вуыса, Тайга дугдӥз, берытскиз но огдырлы ас интыяз пумиз. Оло со озьы Кирло бубаен люкиськиз? Нюлэскысь вузэм кылӥськиз но, Тайга син азьысь ышиз…

Елена Вахрушева
Суредаз Вера Штыкова

Удмурт Дунне
By Удмурт Дунне Август 26, 2013 13:42
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<