Солдат луиз Кылбурчи

Удмурт Дунне
By Удмурт Дунне Август 20, 2013 10:49
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Солдат луиз Кылбурчи

В. Емельянов но В. Михайлов ог-огзэс 30 ар пала тодо ни

В. Емельянов но В. Михайлов ог-огзэс 30 ар пала тодо ни

Удмуртиысь калык писательлы но культура удысысь дано ужасьлы Владимир Емельяновлы 19-тӥ гудырикошконэ 65 арес тырмиз.

Владимир Иванович Емельянов 1948-тӥ арын 19-тӥ гудырикошконэ Кубаньысь Армавир карын вордскиз. 8 классэз йылпумъямез бере ик, 15 арескын, ужаны кутскиз: вал уллясь но пужым юрсир бичась, кислород станциын оператор вал. Отын ужакуз тупаллям тумошо учыръёс сярысь туж тунсыко вералляз. Бӧрысь соос произведениосаз пыризы. Тюмень котырысь тайгаын ужакуз луэм суредъёсъя кылдӥзы, кылсярысь, покчиослы гондырпи сярысь «Топтыжка» повестез но арлыдоослы «Савелий и Левиафан» мудрон романэз. Емельянов, Ейскысь педучилищеез йылпумъяса, служить карыны Ижкаре шедиз. Татын ик ветлӥз «Комсомолец Удмуртии» газетысь литературая студие, тодматскиз асьме писательёсын но татчы ик улыны кылиз. Газет редакциосын кќня ке ужамез бере чеберлыко литератураез вӧлмытонъя бюроен кивалтӥз, нош 1984-тӥ арын гожъяськон удысъя эшъёсыз сое Удмуртиысь Писательёслэн огазеяськонзылэн тӧроезлы воштӥсе бырйизы.

Соку мон отын литконсультант луыса ужасько вал. Одӥг кабинетын пукыкумы ик, адӟи солэсь кылбур пӧрамзэ. Со экспромт нимаське, но, кызьы шуо, экспромт — со кемалась йырын бергатэм маке. 1985-тӥ арын 23-тӥ коньывуонэ партилэн Удмурт обкомезлэн нырысетӥ секретарезлы Валерий Марисовлы 70 арес тырмиз. Сое ӟечкыланы дасяськыкуз, писательёслэн тӧрозы Семён Самсонов кылбур гожтыны куриз. Ӝыны часкын ӟечкылан дась вал ини. Мон соку солэн ручка шораз учкыса улӥсьгес мурт гинэ вал ке но, со бӧрысь та чуръёслы соавтор кариз — ӵошен, пе, кенешыса «пӧрам» ук. Кӧня серекъяса кылдӥзы кылбурысь таосыз ньыльчуръёс. Сюлмаськимы: Марисов сое исамес карыса гожтэмын шуоз-а меда, яке сюлэмызъя луоз-а?

Семён Самсонов юбилярез ӟечкыламысь бертэмез бере ивортӥз, кылбур, пе, Валерий Константиновичлы но туж кельшиз, люкаськем калык но кужмо чабиз.

* * *
Москваысь Горький нимо Литература институтын Владимир Иванович заочно дышетскиз тодмо ӟуч кылбурчилэн Николай Старшиновлэн студияз. Кыӵе гажа со дышетӥсьсэ! Со адӟиськиз, Николай Константинович асьме доры совето литературалы сӥзем нуналъёсы вуылыку но: соос асьсэды атаен-пиен кадь эшлыко, сӥлы возизы. Ма, бадӟым ӟуч кылбурчи егит эшезлэн ваньмызлы сямен кылбур бичетъёсызлы азькыл гожтыса ӟеч сюрес сӥзьылӥз. Литинститутысь студент Владимир Емельянов куке но пумит луэм Старшиновез сьӧдмась гожтэт улэ кизэ нюртыны. Нош кырсь гожтэт пӧрась мурт — литература удысысь бадњым адями. Соин Емельяновлэн «Молодая гвардия» но «Советский писатель» книгапоттонниослэн планазы матысь дыре поттыны пыртэм бичетъёсыз югыт дуннеез ӧз адӟе ни.

Владимир Иванович трос кылбуръёсты учкытэк вераны быгатэ. Йырсазез сярысь тани та учыр вера. Компьютеръёс дуно вакытэ соос сое пиеныз асьсэос бичазы. Отчы ик гожъя вал выль произведениоссэ. Но огпол, дискез куалтраса, ар ӵоже гожтэм повестез ышиз-быриз. Владимир Иванович повестьсэ кӧня ке толэзьскын выльысь гожтӥз.

* * *
Владимир Емельянов берыктон бордын уно ужа. Со удмурт фольклорысь произведениосын «Ялыке» но «Айкай» бичетъёсты ӟуч лыдӟись доры вуттӥз. Одӥг удмурт писательлэсь но чуръёссэ ӧз кельты, дыр, берыктытэк: поэзиын — куамын сюрс чурлэсь ятыр, прозаын — ог ньыльдон автор лист мында. Удмурт кылбуръёсты ӟучаз берыктэмаз но, асьме йылолъёсты ӟеч тодэменыз, удмурт шӧмо чуръёсыз кылдылӥзы.

Литератураез гажасьёсын пумиськон дыръя Владимир Иванович Кузебай Гердлэсь «Кулэм потон уе шайтанъёсты уллян» кылбурзэ лыдӟыны яратылэ. Сое со озьы берыктӥз — огвыллем куараосын кылъёс бырйыса, глагол вылэ глагол бырттылыса. Ачиз шабала тушсэ но кузь йырсизэ пурӟытыса, туно-пелё кадь речитативен кутске но, эктыса выллем ик лыдӟе. Кылбурез зэмос спектакльлы пӧрмытэ.

1992-2002-тӥ аръёсы Владимир Емельянов «Луч» журналлэн валтӥсь редакторез луыса ужаз. Отын но трос ужъёс лэсьтэмын вал, но нимысьтыз пусъеме потэ пальыштык пыр гожъям кылбуръёссэ. Журналысь «НОС» нимъем сэрегын Ефим Самоварщиков кушем нимын юморен тырмем чуръёссэ со бӧрысь ньыль бичетъёсын печатлаз.

Берло аръёссэ Владимир Иванович трос ужа драматургия удысын. Солэн «О, Боже, ты зачем меня оставил?» пьесаезъя Америкаысь огаз театрын но спектакль пуктӥзы. Азьвыл но со та удысэз эскерылӥз ини. 1987-тӥ арын ӟугырес ужпумъя документальной фильмлы сценариеныз калык творчествоя Союзысь кыкетӥ фестивальлэн лауреатэз луиз вал ини. Нош 2000-тӥ арын Ижысь Операя но балетъя театрын Евгения Копысовалэн крезьгуреныз «Лебединый край» кантатаез чузъяськиз. Куамынлэсь трос кылбуръёсызъя кырӟанъёс пыртэмын документальной но чеберлыко фильмъёсы, клипъёсы, соосты радио но телевидение пыр сётъяло.

Литинститутысь студент дырысеныз Владимир Емельяновлэн Москваын трос тодмоосыз вал. Асьме доры лыдӟисьёсын пумиськонъёсы со вайылӥз Александр Пушкинлэсь воргорон выжыя берпуметӥ вайзэ Григорий Пушкинэз, кылбурчиез Игорь Крохинэз но мукет эшъёссэ.

Владимир Емельяновез Россиысь Писательёслэн огазеяськоназы 1981-тӥ арын кутӥзы. Берло дасо аръёссэ со Мускоын улэ ни. Отчы кошконэз таӵе вал. Соку бадӟымез пиез Россилэн шоркарысьтыз огаз банкын программистын тыршиз. Кивалтӥсьсы тодэм, ужасезлэн Ижысь куное лыктэм атаез писатель шуыса. Озьы Владимир Ивановичлы вазиськем: юбилей ӝытэлы сценарий ӧд гожтысалды-а, пе. Кылбурчи, солэн улэм-вылэмез сярысь рос-прос юалляськыса, уй куспын ужзэ быдэстэм. Юбилярлы кельшем та сценарий но юам: ужед понна кӧня дун куриськод? Писатель верам: «Вить сюрс сётӥды ке, шумпото». Соиз соглаш кариськем. џуказеяз кылбурчи абдрамлэсь но абдрам — банкир кисыяз вить сюрс доллар понӥз.

Асьме дорын, трос улосъёсын сямен ик, литература сюрныл интые кылемын бере, Владимир Емельянов шоркаре улыны шонтӥз. Котькуд писательлэн гожтэм произведенизэ, нылпизэ сямен, калыке поттэмез потэ ук. Нош со шаплы пӧраны быгатэ. Туннэ нуналлы Удмуртиын, Москваын но вордскем палъёсаз со кылбуръёсын но поэмаосын, повестьёсын но романъёсын куамынлэсь ятыр книгаос печатлаз ни.

Москвае улыны кошкыса но, со элькунысь гожъяськисьёслэн радысьтызы ӧз куштӥськы. Шоркарын удмурт литературалы, культуралы сӥзем ужрадъёсы но мылысь-кыдысь пыриськылэ.

Владимир Михайлов

Пыж
Валерий Болтышевлы

Тани мынам вуж резина
пыже —
Пунэм выллем дунтэм
сётӥз эше.
Ӝыжомемын ини солэн
дурыз,
Пилиськемын ини
полысъёсыз.
Пушказ омыр мырдэм
гинэ пыре,
Уд шӧды, кызьы
кайпалскод отысь шуре.
Чильым, ужпи, кышно
но со ӧвӧл —
Но та пыжтэк улон
мыным ӧвӧл.

Пыже укша мынам
улонэлы
Тэшкам, чигем, кышъям
интыеныз…
Но со сыџе матын
сюлэмылы,
Сыӵе дуно њукрес
куараеныз.
Ненег тулкым вылын
лэйкакумы,
Мон малпасько:
Ӝог визылын
Со ӵуказе,
Бадӟым вӧсь чорыгез
кутыкумы,
Уз ӟазыра — вазёз жин
кырӟанэн.

Выль сюресъёс вылэ соин
потом,
Пумитамы пужалтӥськоз
бугрес тулкым.
Нош Инмарен ке
гожтэмын вуэ выён —
Со шур пыдсы васькоз
ӵош монэным.

Ӧз быры на чорыг мур
вуосын,
Соин ик выйыны милем
ай вазь.
Тани толон но эктӥзы
курик йылын
Ньыль чипеен одӥг тузӥ
карась.

Соин ик чуръёсме но
йылсаны
Мон осконэн пӧлэстыса
туртто.

Та вуж пыже кутскиз ке
выйыны,
Одно ик потыны солы
юртто.

Писпу вай
Генрих Перевощиковлы

Ӟардыку шур дурын
пукыкум,
Зар бӧрдӥз тылскемысь
ыль писпу.
Тћнь озьы табере ул
но ул,
Тодыса — ма вераз
улэп лул.

***

Оӵ вадьсы нап йӧл кадь ик бусъёс волскемын,
Ӵап сыӵе муръёысь ӝутскись ӵын.
Нош липет сьӧръёсысь чильпырась вырйылын
Тӧдь кызьпу быльыра сюсьтылэн.

Огвадес ортчыса — возьматскиз ке шунды —
Син шорын бус сылмоз но толӟоз.
Тулкымъёс кутскозы зарниен шудыны,
Нош кызьпу камкоӵо* кадь лобӟоз.

Тонэныд пумиськон нош — чылкак мыддорин:
Йӧтскисько ке чагыр укнояд —
Синъёсме бусатэ укноед ик дурын
Шундыен палёмись учкемед.

*камкоӵо – чайка, чарлан

Палэсмурт

Толон вераз мыным
аръёс ӵоже визь люкам мурт,
Дунне вылын ӝыны даур улэм удмурт:
Музъем вылын вань на, пе, палэсмурт —
Ӟуче берыктоно ке — ӝыны мурт.

Солэн одӥг гинэ пыдыз, одӥг киыз,
Одӥг синмыз
шузи-мази тусаз.
Пеймыт ӵашша ке но солэн карыз,
Нырзэ вуттэ каре* но пыртаса.

Кык дуннетӥ со ялан калтыртэ,
Кыказ ик — валантэм но синазькыль.
Нокин солы уг сӥзьы шудбурзэ,
Таза дэлет уг кар нылпиезлы.

Оло, ӧвӧл солэн одӥг но нылпиез
Но кылемын ни чылкак со огназ.
Малпан радыз ӝыны-ло-палдурес –
Огмурт ке но куке но шат туназ.

Котькудна ласянь со ӝыны-паллянтык,
Бур-зэмлык кылемын кыдёке.
Кылёз сьӧд кырныж, тӧдь куака галяны,
Кык сюлмыз ик дугдӥз ке куке.

*каре – городэ

Берыктӥз Владимир Михайлов

Удмурт Дунне
By Удмурт Дунне Август 20, 2013 10:49
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<