Сюлмаськонэн артэ вамышъя шумпотон

Удмурт Дунне
By Удмурт Дунне Август 2, 2013 14:28
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Сюлмаськонэн артэ вамышъя шумпотон

Н. Чайников

Н. Чайников

Кызьы улэ но ужа сьӧлта калык? Мар вылез, умоез лэсьтӥське, кыӵе воштӥськонъёс шумпотто? Со сярысь кенешиськом Сьӧлта ёрос муниципал кылдытэтлэн йырыныз Николай Чайниковен.

— Николай Леонидович, ёросын азинске музъем ужен вырон, сӥль-йӧл поттон. Соос бордысен ик вераськонмес но мытом.

— Ужъёсмы каллен мыно. Тулыс дыраз но агротехникалэн куронъёсызъя кизим 11 сюрс 670 гектар тысё но пуртэсо юос. Гурт хозяйствоослы туэ бусы ужъёсты дыраз быдэстыны элькунысь юрттэт дыраз вуиз. Музъем ужасьёс ӝутскем мылкыдын тыршизы. Кидыслы висъям лудъёсты химия препаратъёсын жуг-жаглэсь сузям. Удалтэм ю-нянь будэтон вылысь мукет ужрадъёс но ортчытъям. Но туннэ, жаляса верано луэ, куазь кӧс улэмен, ӝыныезлэсь тросэз валэс юосмы, яке 6 сюрс 134 гектар, куасьмемын, туж вакчи будэмын, комбайн, оло, интыен-интыен шеп йыръёсты но басьтыны уз быгаты. Специалистъёслэн верамзыя, бер вуэм зоръёс югдурез чутрак уз воштэ ни.

Пудо сиён дасян ласянь но трос верамонэз ӧвӧл. Та удысын котьку сямен умой ужало «Свобода» но «Звезда» эштосъёс. Та хозяйствоосын, мукетъёсыныз ӵошатыса, тросгес люкамын турын, сенаж но силос. Кӧня ке осконмы вань на кукурузалы, тарилы но одӥг аръем турынъёслы. Соос чеберскыны кулэ. Нош зернофураж 35-40 процент сяна уз люкаськы, дыр.

Оглом вераса, таиз тол капчи уз луы. Озьы ке но ышыгын ум улӥське, пудо вордонэз ялан азинтӥськом. Пудо выжыез умоятыны туэ республика 15 миллион манет висъяз. Со коньдонэз уже кутӥзы «Свобода» но «Звезда» СПК-ос. Кивалтӥсьёссы — Денис Калабаев но Владимир Блинов. Та хозяйствоос ик трос йӧл но сӥль потто. Эштосъёслэн тыршеменызы, туэ нырысетӥ паларе, кылем арын та дырен ӵошатыса, ёрос 67 тонналы тросгес йӧл вузаз, озьы планмес 101 процентлы тырмытӥм. Та ласянь адӟем карымон тыршо «Батыр» огазеяськонысь, «Свобода», «Звезда» СПК-осысь дояркаос но специалистъёс. «Батыр» ООО-ез будон сюрестӥ валаса нуэ Валерьян Григорьев.

Гурт калыкен, специалистъёсын но кивалтӥсьёсын пумиськылыса-вераськыса, пусйыны быгатћськом: суй-пыдмы, мылкыдмы куашкамтэ. 2010-тӥ арез но пырпотӥм, шуг-секытъёслы ӧм сётске. Тазэ но вормом шуыса, малпаськом, вылӥ кивалтӥсьёс но, Москва но ас поннамы уз кельтэ, кыӵе ке но юрттэт вуоз…

— Черкогуртэ вуыса, син шоры йӧто выль юртъёс…

— Шумпотыса пусъеме потэ: Сьӧлта черкогуртэз али ик шулдыртэ ни ӵыжак выль нылпи сад. Толэзь ортчыса, 1-тӥ сентябре, со ӧсъёссэ вӧл-вӧл усьтоз. Отын 140 нылпи дышетскоз-будоз. Юрт пуктӥське Удмуртиез азинтон программая, сое быдэстэ шаерысьтымы «Титан» огазеяськон. Кузёез — Павел Титов, Кун Кенешлэн депутатэз. Дорамы усто но быгатӥсь специалистъёс но лэсьтӥськисьёс ужало. Соослы котькыӵе юрт ӝутонэз оскыны луэ.
Выльзэ пуктэмен ӵош, Югдонын но ӟеч-ӟеч выльдӥм нылпи учреждениез. Нош кылем арын Сьӧлта ёрос больницалэсь поликлиниказэ выльдӥм. Озьы ик ӟеч-ӟеч тупатъям Сьӧлта шор ёзо школаез.

140 пиналъёс вамыштозы выль нылпи садэ

140 пиналъёс вамыштозы выль нылпи садэ

— Шумпоттэ сюресъёслэн выльдӥськемзы но.

— Али тани бадӟым ужъёс мыно Кильмезь шур вамен кортлэсь но бетонлэсь выж лэсьтонын. Азьло отын ошем выж гинэ возизы. Табере калык но, хозяйствоос но кыӵе шумпотозы! Арысь аре умоятӥськом сюресъёсмес. Туэ љутӥськом Юмга-Кейлуд но Копка-Рысай сюресэз. Кузьдалазы кыкезлэн ик огкадьгес — 4,5 но 4,8 иськем.

Азинске газ кыскон. Чагыр эстӥськонэн шунтӥсько-пӧрасько ни Сьӧлта, Халды черкогуртъёсын улӥсьёс. Туэ Узя черкогуртэ вуттом.
Тӥни озьы ёросын, бадӟымесь ӧвӧл ке но, воштӥськонъёс вань. Будэ уждун тырон, Сьӧлта черкогурт син азьын паськыта, чебересь коркаос пуксё, калыклэн улон-вылонэз умоя.

Геннадий Романов
Туспуктӥз Владимир Беломорских

Удмурт Дунне
By Удмурт Дунне Август 2, 2013 14:28
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<