Пудо сиён дасяны уз быгаты пӧрмостэмез гинэ

Удмурт Дунне
By Удмурт Дунне 23 августа, 2013 13:02

Пудо сиён дасяны уз быгаты пӧрмостэмез гинэ

А. Коробейников

А. Коробейников

Дальний Востокын улӥсьёс шуге-леке вуэмын ву ӝутскемен, нош шаермылы ыштонъёс вае кӧс гужем. Та ласянь гуртоослы курадӟоно луэ ни берло ньыль ар ӵоже. 

Удмурт Республикаысь Правительстволэн Тӧроезлэн воштӥсез Александр Коробейников туэ ю-нянь дасянэз тазьы дунъяз: югдур шумпотымон ӧвӧл. Куазь кӧс возиськемен, бусыос сутскизы, урожай кулэсмиз. Ю тысез октон-калтон шаерамы азинтӥське, чакламъя ваньзэ-ӧвӧлзэ люкаськоз 380-400 сюрс тонна пала. Кылем арын та лыдпус 600 сюрс вылын возиськиз. Нош 2010-тӥ арын — ӵапак соку кузёяськиз укыр кӧс куазь — люкаськиз 300 сюрс тонна гинэ. Озьыен, туэ но югдур ӟеч ӧвӧл: ю тысь сю сюрс тонналы гинэ ятыргес люкаськоз. Валамон, со вуттоз фуражъя дефицитэ. Хозяйствоослы сиён басьтоно луоз палэнысь. Ярам ай, фуражлы мынӥсь тысь одӥг тоннаез сылэ 7 сюрс манет пала. Ю тырмыт люкаськымтэен йырин кылем ар пумын солэн дуныз 14 сюрс манет вылын возиськиз.
— Туэ 2010-тӥ арын кадь шуг-секытъёс кылдыны кулэ ӧвӧл, — малпанзэ шараяз Александр Коробейников. — Пудо сиён дасяны уз быгаты пӧрмостэм кивалтӥсь гинэ. Угось берло дыре зоръёс кисьтӥзы ни, вылаз ик, куазь шуныт возиське. Нордӥез турнан ӟеч пайда сётыны кулэ.
Кӧс куазьлы уг сётскы кын улэ кизем ю-нянь. Тужгес но — чабей. Вице-премьер А. Коробейников пусъемъя, шаерысьтымы хозяйствоос толйись юослы бадӟымгес саклык висъяны кулэ. Угось кӧс куазен ӵапак соос чотын пайда поттыны луоно. Кылсярысь, тол улэ кылем арын киземын вал 70 сюрс гектар. Туэ чакламын 105 сюрс гектар пала кизьыны. Та нуналлы толйись юос согемын ни 36 сюрс гектар вылэ.
Республикаысьтымы гурт хозяйствоослэн ыштонъёссы туннэ нуналлы лыдъямын-чотамын — со 1,5 миллиард манет пала. Федерал бюджетысь юрттэттэк гуртоослы секыт йӧтоз. Республикаысьтымы кивалтӥсьёс федерал центре вазиськизы. Но коньдон шаерамы ӝегаса вуоз, вылды — нырысь ик юрттэт кошкоз Хабаровск палъёсын шуге-леке вуэм калыклы.
Сӥль-йӧл поттон удыс сярысь ке верано, гуртоосты шумпоттэ йӧлэз басьтон дун — литрезлы 15 манет 20 копейка котыр сёто. Нялтас вераса, йӧл поттонэз утёнлы федерал центрысь висъяськиз 1 миллиард манет пала юрттэт, тамындалэсь ятыргес — республикамылэн кисыысьтыз. Со вие ик сюлмаськытэ парсь сӥль поттон удыс: килограмм парсь сӥлез басьтон дун 70 манетозь усиз ни. Африкан чума кунамы эшшо но паськыт вӧлмиз ке, сӥлез басьтон дунъёс кризис вакытэ кадь луозы — 50 манетозь кулэсмозы. Таин сэрен кивалтӥсьёс гуртоослы котыр ласянь юрттон, пудолэсь йырзэ утён пумысен сюлмасько.

Елена Никитина

Удмурт Дунне
By Удмурт Дунне 23 августа, 2013 13:02
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<