Нырысь сӥзьыл нуналэ мынӥськом ми… почтае

Удмурт Дунне
By Удмурт Дунне 30 августа, 2013 11:17

Нырысь сӥзьыл нуналэ мынӥськом ми… почтае

14 аресъем Лена Баранова - зэмос почтальонка

14 аресъем Лена Баранова — зэмос почтальонка

Куарусён толэзьысен кутске ни вуоно арын лыдӟисьёсмы понна «ожмаськон». Та кылэз берло дыре кавычкаостэк но гожтыны луоно ни, угось арысь аре котькуд подписчик понна ми нюръяськоно луиськом.

Калыкысь ум пыраське бере, тодӥськом: тиражмылэн синэмезлэн мугъёсыз пӧртэм. Кин ке воксё лыдӟиськыны уг яраты, кин ке анай кылзэ уг вала, кин ке уксёзэ жаля, кулэлыксэ уг адӟы… Но берло дыре лулэз тужгес вандыса лэзизы почта нуллӥсьёс. Ӵап со пумысен редакцие ӵемгес ӝожтӥськонъёс вуо. Почта кивалтӥсьёс валэкто: ваньмыз умой! Газет дыраз вуэ! Но бӧрсяз ик лыдӟисьёсмы нош жингырто… Ма, сое лыдпусъёс но возьмато ук: берло кык ар ӵоже гинэ Алнаш ёросъя ми ыштӥм 250 пала гожтӥськисьмес! Югдур тужгес уродмиз Варзи-Ятчи люкетъя. Лялиысь но Шадрасак-Кибъялась лыдӟисьёсмылэн верамзыя, отчы газетъёсты туж ӝегатыса гурт администрацие яке лавкае вуттылӥзы яке воксё ыштылӥзы. Нош почтаен кутэм огкылъя газет вуыны кулэ гожтӥськисьлэн капка дорозяз!

Югдурез ас синмынымы адӟон вылысь таяз арня вискын потам Ляли гуртэ. Ульчаысен нырысетӥ ортчись адямиез ик дугдытӥм. Фотокамерамылэсь куалектыса, нимтулзэ нокызьы но уг вера. Магазинэ мынӥсь кенаклэсь меӵак юамы ни: газет кияды кутылӥськоды-а? Ма, туж лыдӟиськиськом вал ай, но кыкетӥ паларлы ӧм гожтӥське ни, почта уг нуллы бере, мар уксё куянэз, чутрак кариз Анисимова Анна кенак (бӧрысь нимзэ шараяз ик).

Гуртын калык люкаськон инты — магазин, соин ми но выль тодмомы сьӧры калъяським. Отчы люкаськем кышномуртъёс пӧлысь данакез милям вуж лыдӟисьёсмы вылэм. Малы вуж? Малы ке шуоно табере соос газетлэсь куштӥськизы ни. Сыӵе ик муген.

— Ой, одӥг газетэз но лыдӟытэк-тодытэк уг кылиськы вал азьло, али син лябӟе ни, — вера 88 аресъем Анисия Александровна Калинина, дано трактористка. — Ай верано кенлы, гожтӥськиз ни-а, ӧз-а.

— Туж тросэз ӝожтӥсько, газетэз урод нуллэмысь, — вера егитъёс радысь Людмила Иванова, татысь вуз карись. — «Удмурт дунне» гинэ ӧвӧл, мукетъёсыз но уг вуо, Варзи-Ятчи почтаысь юало ке, ӧз вуы, пе, шуо. Но гужем тани пинал нылашез уже кутэменызы, югдур тупатскизгес ни ай.

Ми шумпотыса вамыштӥм пинал почтальонкаенымы тодматскыны. Лена Барановалы 14 арес, кык нунал ортчыса, со 8-тӥ классэ школае вамыштоз.

— Азьвыл нокытын ӧй ужалля на вал, почта нуллыны кельше, — востэмак вера нылаш.

Леналы ужаны быдэс семьяез юрттэ, атаез, Игорь Алексеевич, туж сюлмаське нылыз сярысь, почтазэ вӧзысь гуртэ вуттыны куддыр ачиз тырше.
— Пыдын ветлонэз люкаське ик — арняяз куинь пол быдэн дасо иськем ортче, — жаля со дыдызэ. — Ай нылмылы луыса гужем куазен лыдӟиськыны кутским ни. — Почта вае ке, газетъёссэ учкиськом, алигес «Удмурт дуннеысь» трос нылпиен семья сярысь материал сюлэмме туж бугыртӥз… Кайта, оло, асьмеос но гожтӥськом ни.

Арлыдоос почтаын уксёез ичиысь уг ужало — 2 сюрс манетлэсь ӧжыт гинэ ортче, но пиналъёслы кытын тросгес сётозы… Зэм, вазен дыръя сямен Лена почта сумкаен уг ветлы — ӧз, пе, сётэ. Соин огшоры пакетъёсын газет-гожтэт нуллэ. Нуллонэз но бен табере одӥг сузьет сяна ӧвӧл. Милям «Удмурт дуннемы» солэн участоказ кыкетӥ паларе 6 корка сяна уг мыны ни… Соиз понна но тау тыныд, Лена. Газетъёсын эшъяськонэд пыраклы мед луоз.

Варзи-Ятчи почта ёзлэн кивалтӥсез Надежда Конникова буйгатӥз:

— Лена школае кошкиз ке, интыяз арлыдо кышномуртъёсты кутомы, со пумысен кенешемын ни. Газетты уз ӝега ни, гожтӥськон ужен но пыр-почгес выром. Сыӵе югдур кылдӥз… монэн йырин, — пальпотыса вера нылкышно. — Нылпи вордыса, кема дорын пуки, татысь ужасьёс ялан вошъяськизы, нош огдырлы кутэмъёс кызьы ужало, асьтэос тодӥськоды.

Ми малы ке та мыло-кыдо кышномуртлы туж оскыса кошким.

Нош кытын ке туннэ но ӝегато ке газетэз, ивортэ редакцие. Телефонъёсмы — газет мышкын. Ми одно вазиськом бадӟым кивалтӥсьёслы, югдурез, гуртады потаса, эскером. Нош 1-тӥ сентябрьысен тӥ быгатоды ни газетлы 2014-тӥ арлы гожтӥськыны.

Почтальон, удмурт лыдӟись вӧзтӥ эн ортчы, ӵекты солы «Удмурт дуннеез»!

Зинаида Рябинина,
валтӥсь редактор

Удмурт Дунне
By Удмурт Дунне 30 августа, 2013 11:17
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<