Мӧзмонэз буйгато нылпиос

Удмурт Дунне
By Удмурт Дунне 30 августа, 2013 12:44

Мӧзмонэз буйгато нылпиос

А. Смородин

А. Смородин

Кизнер черкогуртысь Аркадий Смородинлы 90 арес тырмиз ни ке но, со али но туж чырткем на. Быдӟым ожын ожмаськемез понна Аркадий Дмитриевич «За отвагу», «За оборону Кавказа» но трос мукет медальёсын, Быдӟым Отечественной войнаысь орденэн пусъемын.

Школаез йылпумъям Аркадиез 1942-тӥ арын армие басьтӥзы. 12 пиосын ӵош Сарапулэ нуизы. Отчы Смоленскысь военной училище эвакуировать каремын вылэм. Кизнер пиос миномётчикъёслэн ротаязы шедизы. 9-10 классэз йылпумъямъёс но институтъёсты но техникумъёсты быдтымтэ пиосты огинэ люкаса, офицере дышетӥзы. Но Аркадийлэн тодон-валан басьтыса дырзэ быдтэмез ӧз поты, кӧня ке толэзь дышетскыса, фронтэ куриськиз. Малпаз: ожын мынэсьтым трослы арлыдоесь воргоронъёс ожмаськозы, нош мон, улон-вылонэз валасьтэм 19 аресъем маке, офицер шуыса соосын кивалтом-а? Рапорт гожтыса, фронтэ кошкиз. Озьы Аркадий Подмосковьеысь 119 номеро бригадае шедиз. Ӝоген соослэсь быдэс бригадазэс Кавказысь фронтэ келязы. 1943-тӥ арын Аркадий Дмитриевич ожмаськыса ортчиз Грозныез, Бакуэз, Сухумиез. Тушмон пуля нокинэ но уг жаля, егит-а, мӧйы-а, пырак шоре лобӟе. Сухумиын Аркадий Дмитриевич сӧсырмиз. Собере толэзь пала госпитальын кыллиз. Отӥяз Ереванысь госпитальын суйзэ эмъяны выризы. 4 толэзь пала нюръясько, но суйзэ утьыны уг быгато. Куректӥз но, бӧрдӥз но егит пияш паллян суйзэ ыштэмысь. Но кытчы пырод? Улон азинтӥське. Адӟонэз сыӵе вал, дыр, шуыса, буйгатскиз. Тӥни ук со сямен ик вагон тыр пыдтэм-китэм солдатъёс доразы берто.

Дораз бертыса, Аркадий Дмитриевичлы ужлэсь мозмытыны группа сётӥзы.

— Инвалид кыли шуыса, дорын паймыса уд пукы ук, уж утчаны Кизнер черкогуртэ вамыштӥ, — вера воргорон. — Йырыд умой ужа шуыса, ужаны кутӥзы ёросысь «Новая жизнь» газетлэн редакцияз. Гожтэтъёсъя отделэн кивалтӥсе пуктӥзы. Ялан командировкаосы потамы, быдэс районэз ортчи, тодӥсько кызьы гурт калык улэ, маин шока. Собере кема аръёс ӵоже Кизнерысь роноын валтӥсь экономист луыса тырши. Дышетскыны пыри вал Москваысь Вуз каронъя институтэ, но секыт аръёс тупамен, мыным сое йылпумъяны ӧз кылды.

Вордӥськем палъёсаз ик Смородин шудзэ шедьтӥз. Война вакытэ Кизнер каргуртысь госпитале Иваново улосысь Фаина Дмитриевнаез ужаны келяллям. Бӧрысь нылкышно Кизнерысь аптекаен кивалтӥз. Со медицина службаысь лейтенант. Егитъёс ог-огзылы синмаськизы, кузпалъяськизы. Кык ныл вордӥзы. Бадӟымез Нина нылзы лэсьтӥськись вал, кема висьыса улэменыз сэрен, улонысь кошкиз. Нош Татьяназы улэ но ужа Йошкар-Олаын. Аркадий Дмитриевичлэн Фаина кузпалыз ньыль арзэ вӧзаз ӧвӧл ни. Секыт сотэк, туж мӧзмыт, шуэ. Песятайзэ шумпоттэ Максим нуныкаез. Арлы быдэ сое со эскерыны бертылэ.

Туэ Аркадий Дмитриевичлы 90 арес тырмиз. Со ассэ пересьёс радэ уг пырты на. Пал суйыз шоры учкытэк, гурт котырысьтыз вань ужзэ ачиз быдэсъя: пу но пильылэ, вандэ но, юрт котырзэ но чылкыт возе, сад-бакчазэ но утялтэ. Йырсазьыз но Аркадий Дмитриевичлэн пинал муртлэн кадь сазь на. Бур тыаз лек ож дырысен ини осколок ветлэ. Врачъёс операция лэсьтыны џекто, нош воргорон соглаш уг кариськы, тамында чидай бере, со чик но уг люкеты, озьы ик уло ини, шуэ.

— Туала улон мыным кельше, пенсия тыро. Арысь аре тани 9-тӥ Мае монэ Ижевске парадэ нулло. Ай тани таиз но шумпоттэ: оже ветлэмъёслы квартира сётъяны кутскизы, — мылкыдзэ вера ветеран.

Аркадий Дмитривичлэн улон юртэз школа вӧзын ик сылэ. Сое нылпиос ӵемысь урокъёсазы ӧтчалляло, ожын нюръяськемез сярысь юаллясько. Нош Аркадий Дмитриевич, огназ улэмысьтыз, дыр, шумпотыса соос доры мынэ, лулысь-сюлмысь кенеше.

Любовь Тихонова

Удмурт Дунне
By Удмурт Дунне 30 августа, 2013 12:44
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<