Москваез воштӥз удмурт гуртэн

Удмурт Дунне
By Удмурт Дунне 16 августа, 2013 10:31

Москваез воштӥз удмурт гуртэн

З. Калашникова

З. Калашникова

Дэбес черкогуртын кема аръёс ӵоже ини Зинаида Калашникова улэ. Шутэтскыны потытозяз, со райцентрысь шор ёзо школаын географилы дышетӥз.

Покчи Зина ноку но ӧз малпа, улон сое Удмурт шаере вуттоз шуыса. Нылаш вордскиз но быдэ вуиз бадӟым городын — Москваын. Пироговка академилэсь Ленин нимо пединститутсэ йылпумъям егит географлы вордскем городаз улыны но ужаны кылдымтэ.

1953-тӥ арын распределение дыръя институтысьтызы пӧртэм группаосысь дас нылъёслы ивортӥзы, Урал палась Удмурт шаере мыноды шуыса, отын географиен дышетӥсьёссы ӧвӧл.

Ужаны кытчы ыстэмзэс тодыса, Зина сюлмаськыны кутскиз: кызьы со мамазэ огназэ кельтоз? Уго бубиз лек ожын быриз. Мон но тон гинэ тазьы ум улӥське, война дыръя тросэз-а эшъёсыд тыро-пыдо семьяын будӥзы? Косо бере, мын, шуиз мамаез.

— Соку одно ик 3 арзэ келям интыын ужаны кулэ вал, — тодаз вае Зинаида Петровна. — Эшъёсыным ӵош Иже мынӥсь поездэ пуксим: уй но нунал чидаса, мырдэм но кызьы вуим ини. Калыкез дышетонъя министерствоын милемыз пус куштытӥзы: мыным шедиз Дэбес черкогурт.

* * *
Мар со Дэбес? Француз крезьгурчи Клод Дебюсси вань вал, малпаз егит дышетӥсь. Министерствоын соку Дэбес роноен кивалтӥсь Геннадий Ложкин вылэм. Автобусэ пуктыса, келяз дышетӥсез. Райцентре вуыса, Зинаида мукет дуннее шедем кадь потӥз. Малпаз: татысь адямиос бадӟым городъёсы улыны кошко, дыр, нош мон…

— Нырысь ик патере Коробов дышетӥсьёс доры пыртӥзы. Бӧрысь Быковъёс доры интыяськи. Сояз но, таяз но туж умой улӥ, асьсэлэн кадь шуныт пумитазы.

Зинаида Петровна трос гинэ шуг-секытъёсын пумиськоно луиз. Паймылӥз: нылпиос керосин лампаосын дышетско, гожъяськыны чернила но, бумага но ӧвӧл, школаын вераны луонтэм кезьыт. Нош коркаед шуныт мед луоз шуыса, гур эстоно. Со понна нырысь ик тэльысь пу ворттоно, сое вандоно, пильылоно, лапасэ пыртано, артана люкано. Ву но Москваын сямен гумыетӥ уг бызьы вылэм, сое колодчаысь, аслыд ӝутыса, пельпум вылад карнанэн ваёно. Толалтэзэ сюресъёс лымыен согисько, тулысэн сӥзьылзэ — нӧдэн вамыштыны уг луы. Кызьы дышод кадь та улонлы? Ярам, гужемзэ выжыкылын кадь шулдыр но чебер луэ ини. Нюлэскын узы, эмезь кисьма, бамалъёсын боры вуэ. Зина эшъёсыныз ӵош соосты бичаны ветлылӥз. Нош кӧня пумо губи будэ! Егит муртлэн соосты базарысь сяна адӟылэмез ик ӧй вал.

Урокъёсын нылпиос Москваысь вуэм дышетӥсьсылэсь мадемъёссэ, ымзэс усьтыса ик, кылзылӥзы, угось Зинаида Петровна ӟуч кылын сыӵе чебер но вольыт вераськиз. Ма, али но со сыӵе ик чебер вераське, шуо дэбесъёс. Аслыз но Зинаида Петровналы котьмар тунсыко вал: нылпиосын ӵош гучыкен-гучыкен удмурт кыллы дышетскиз.

* * *
Зинаида Петровналы, музон дышетӥсьёслы сямен ик, трос ветлоно луиз гуртъёстӥ, лекциос лыдӟылыса. Анай-атайёсын собраниос ортчытъялляз.

— Али кадь ик тодӥсько на Бадӟым Ӟӧтым гуртэ потамме, — тодаз вае арлыдо дышетӥсь. — Гуртъёсы урокъёс бере потамы, толалтэзэ вазь пеймыт луэ ук, соин ик сьӧрам фонарь кутӥ. Кузь сюресэз умой ортчи. Клубе пыри но — одӥг лул но ӧвӧл. Кык час пала пуки, калыкез возьмаса, таки нокин но ӧз вуы. Кытчы пырод, берен Дэбесэ мыноно кариськи. Колхозысь комсомол секретарь валэн келяло, пе. Мар, пӧй, мон понна уйлы пумит курадӟыса отӥ ветлоды, пумитъяськисько. Но берло со кылъёсы пумысен туж жаляй. Пеймыт сик пыр потыкум, син азям тылъёс кылдӥзы. Мынам соку шуак тодам лыктӥз: кионъёс! Чупчи шур дурозь пыр бызьыса мынӥ. Жади, лулы пыдтышкам вуиське вал, шоканэ пытсаськиз. Зар-зар бӧрдӥсько. Азьвыл мон таӵе улонэз киноосысь гинэ адӟылӥ вал, жаляй асме.

Одӥг сӥзьылэ дышетӥсез нылпиосын ӵош колхоз лудэ картошка октыны келязы. Улыны кунокуае интыязы. Бригадир мешок пызь но одӥг така вайыса кельтӥз: тани, пе, тӥледлы сиён. Зинаида Петровна уг вала, кызьы улэп такалэсь но мешок пызьлэсь сиён лэсьтоно? Нылпиос валэктӥзы: животэз, пе, нырысь ик вандоно, пушсэ поттоно, собере гинэ со сӥль луоз. Ярам коть, нылъёс пӧлын пӧраськыны быгатӥсьёс вылӥллям. Соос ик нянь но пыжылӥзы, шыд но пӧзьтылӥзы.

* * *
Куинь ар куспын Зинаида Петровна нылпиос борды дышиз ке но, сюлэмыз анаез доры ялан куриськылӥз. Ӵош будэм но дышетскем эшъёсызлэсь но мӧзмылӥз, вылды. Вылаз ик Москвае солэн гажанэз кылиз. Серёжа военной вал. Каникулъёс дыръя Зина яратонэныз Москваын пумиськылӥз ик. Но сӥялскем мылкыдзэ шӧдӥз. Соиз ӧз танӥськы: алигес, пе, нылашен тодматски. Егитъёслэн та берпуметӥ пумиськонзы луиз. Нош Дэбесын егит географлы синмаськисьёс ичи ӧй вал.

Егит дышетӥсьлы лыктэмез дырысен ини кырмышъяз шӧртчи но шаян пияш, машина руль сьӧрын тӧлпери кадь ворттылӥсь Володя Калашников. Нырысь-валысь Зина солэн озьы выремезлы нокыӵе ик ӧз кариськылы. Москваысь эшеныз кусыпсы сӧриськем бере гинэ со Володяез умой-умой синйылтӥз. Кема ик дыр ӧз ортчы, егитъёс сюанзэс шудӥзы. Отӥяз соос Москвае улыны кошкизы. Зинаида Петровналы жаль потӥз ке но гуртысь дышетэм нылпиоссэ кельтыны, мӧзмонлэсь кытчы пырыны ӧз валалля. Нош Володяез гогыеныз бурмемын вал гурт улонлы, бадӟым город солэн сюлэмаз нокызьы ӧз лякиськы. Ойдо Дэбесэ бертомы шуыса, кузпалзэ сюлворыны ӧдъям. Нош Зинаез Москваысь озьы гинэ уд ни кыскы. Кузпалъёс та муген керетӥзы. Одӥг нуналэ Володя, чемоданзэ кутыса, дор палъёсаз кӧчиз.

— Кузпалы кошкемысь, туж куректӥ, — тодаз вае нылкышно. — Одӥг пол, кайгырыса пукыкум, Инмарлы оскись песянае вӧзам пуксиз но шуэ: асьме выжыын нокин но картэзлэсь люкиськыса улӥсь ӧй вал на, эн сапта, нылы, выжыдэ, мын берен Володяед доры. Со шумпотоз гинэ.

Озьы, поездэ пуксьыса, Зинаида берен Дэбес пала шонтӥз. Володяез олокытысь тодэм бертонзэ, вокзалэ пумитаны лыктэм. Вагонысь потэмзэ адӟыса, азяз бызьыса лыктӥз, ки йылаз ӝутыса, жур гинэ бергатӥз. Кузпалызлэсь лыктэмзэ чидатэк вите ни вылэм, шӧдске.

***
Дэбесэ вуыса, Зинаида уже куриськыны школа директор доры вамыштӥз. Но тупаны но кулэ: ӵапак со вакытэ коридорын линейкаын маке мында нылпиос сыло вылэм.

— Монэ адӟыса, ваньзы сямен гурак кеськизы: «Ура, Зинаида Петровна берытскем!» Мон понна соку солэсь но бадӟым шумпотон ӧй вал ни, дыр. Пальпотонме ӧй быгаты ватыны, ас поннам малпай: иське, дышетон удысын тыршеме юнме луымтэ.

Егит семьялы роно соку ик пу квартира сётӥз. Али но Зинаида Петровна отын ик улэ. Кузпалъёслэн Сергей пизы вордӥськиз. Но, жаляса верано, ветлыны но, вераськыны но со ӧз быгаты. Егит анай сӧсыр пиез понна кӧня синвузэ кисьтӥз! Москваысь профессоръёс дортӥ пумтэм нуллӥз — нокин юрттыны ӧз быгаты. Собере Калашниковъёслэн Игорь пизы вордӥськиз. Таиз таза, визьмо будӥз. Со — программист. Улэ но ужа Краснодар улосын. Зинаида Петровнаез шумпотто Мария но Ольга внучкаосыз, соослэн Снежана но Виктория нылъёссы — правнучкаосыз.

Вань тодон-валанзэ сётыса, Зинаида Петровна нылпиосты 36 ар ӵоже дышетӥз. Со — ужысь ветеран. Удыссэ ӟеч нуэмез понна уно таукаронъёсын но грамотаосын пусъемын. Со вакытэ дано нимъёс ӧз сётъялэ, шуэ дышетӥсь, нылпиосты калыке поттон понна тыршизы визьнодасьёс.

Табере 60 ар ӵоже Зинаида Петровна Дэбесын улэ. Тани 26-тӥ августэ 83 арессэ пусъёз. Кемалась кузпалыз вӧзаз ӧвӧл ни. Сергей пиез но улонысь кошкиз. Табере арлыдо кышномурт огназ улэ. Арлы быдэ эскерыны Игорь пиез семьяеныз бертылэ.

— Дэбесын улӥ шуыса, чик уг жаляськы, — маде Зинаида Петровна. — Телевизор пыр адӟисько, макем зол воштӥськемын Москва, мыным со табере мукет город кадь потэ ини. Ӝожтӥськыны номырлы, ужаны ӟеч коллективе шеди, нылпиосты визьнодай. Табере соос монэ уг вунэто, дорам эскерыны пырало. 1-тӥ сентябре но вордӥськем нуналам сяська керттэтъёсын вуо, тазалыке сярысь юаллясько. Солэсь но бадӟым шуд вань на меда дунне вылын?

Любовь Тихонова

Удмурт Дунне
By Удмурт Дунне 16 августа, 2013 10:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<