Мендельсон интые — ялыке!

Удмурт Дунне
By Удмурт Дунне 2 августа, 2013 15:31

Мендельсон интые — ялыке!

Наталия но Роман Романовъёс гожтӥськизы удмурт кылын

Наталия но Роман Романовъёс гожтӥськизы удмурт кылын

Тодӥськоды-а тӥ, загсын гожтӥськонэз удмурт кылын ортчытыны луэ шуыса?

Удмурт Элькунын кузпалъяськыны мылкыд карисьёслэсь куриськонзэс куто ӟуч кылын, нош семья кылдытэмзы сярысь свидетельство сёто 2 кун кылын: огпалаз ваньмыз ӟучен гожтэмын, мукет палаз — удмуртэн.

Удмурт кылын регистрация азьвыл ортчытъязы 4 районын гинэ: Алнашын, Пичи Пургаын, Можгаын но Уваын. Али сыӵе луонлык Ижкарын но вань.

— Кузпалъяськисьёслэн куремзыя ми быгатӥсько-мы гожтӥськонэз удмурт кылын ортчытыны — сое радъяны секыт ӧвӧл. Кулэ луиз ке, удмуртсэ но, бигерзэ но специалистэз шедьтом. Со понна нимысьтыз уксё ум басьтэ. Но татчыозь вазиськисьёс ӧй вал на, соин вань гожтӥськонъёс ӟуч кылын ортчо, — вераз Ижкарысь загсъя комитетысь кузпалъяськон ёзэн кивалтӥсь Елена Дёмина.

Статистикаез учконо ке, 2013-тӥ арлэн нырысетӥ кварталаз Ижын 6 сюрс 635 пар кылдӥз. Шат ӧй вал соос пӧлын удмуртъёс, яке ӧз тодэ, анай кылынызы регистрация ортчытыны луэ шуыса?

Наталия но Роман Романовъёс куинь ар талэсь азьло гожтӥськизы Алнашын.

— Мынам но, кузпалылэн но семьяосмы удмурт, соин ӟуч кылын регистрациез ортчытон сярысь малпанмы ик ӧй вал. Удмурт сюанлы шумпотыса, чабкиськизы Башкириысь куноос — соос палан удмурт кылын регистрация уг лэсьто, пе. Загсын нокыӵе шуг-секытъёс ӧз кылдэ: милемыз валазы но ваньзэ куреммыя ортчытӥзы. Нуисьлэн кылъёсыз сюлэмез позыртӥзы: синкылиостэк ӧз ортчы, — вераз Роман Романов.

— Регистрациез быдэссэ удмурт кылын ортчытӥсьёс трос уг луо — 1-2 пар арлы быдэ, — вераз Алнашысь загсын ужась Татьяна Семёнова. — Ӵемысь куро 2 кылын: валтӥсьсэ вераськомы ӟуч сямен, нош ӟечкыласькомы но йылпумъяськомы удмурт сямен.

Интернетын ӵем гинэ ӝожтӥсько: удмурт кыл кун кыл лыдъяське ке но, сое нокин кылэм-адӟем уг кары. Но шонер меда та веран? Вазиськем потэ егит семья кылдытӥсьёслы: анай кылын гожтӥськемды потэ ке, вералэ мылкыддэс загсын. Оло, шаерысьтымы мукет ёросъёсын но пумит уз луэ регистрациез анай кылынымы радъяны? Ваньмыз асьмеос бордысь потыны кулэ.

Елена Рябина

Удмурт Дунне
By Удмурт Дунне 2 августа, 2013 15:31
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<