Кышъет пуктоно дыраз!

Удмурт Дунне
By Удмурт Дунне 30 августа, 2013 10:16

Кышъет пуктоно дыраз!

+-IMG_4081Салазкиез тулыс ик дасяно, шуо. Та веранэз пелязы мед понозы вылэм сюрес лэсьтӥсьёс.

Балезиноын улӥсьёс огпол гинэ ӧз адӟе ни, кызьы вуж асфальтэз выленыз кышъян сӥзьыллы кыле. Кылем арын Белезино-Карсовай сюресэз выльдыны коньдон висъязы сӥзьыл. Кӧс нуналъёс ортчем бере сюрес лэсьтӥсьёс зор-кот улын ужазы. Нош кот азе асфальт ку умой лякиськиз ни? Пильылӥськиз, ломдылӥз. Валамон ни: кыӵе но тышкаськон кылъёсын уг дунъяло туннэ шофёръёс балезино сюресъёсмес! Мукет ёросъёсы потатэк улысалзы ке, оло, сокем ӧй но каргаськысалзы. Но артысь Иж-Глазов сюрес, миляменыз ӵошатыса, воксё вольыт ук! Кышъетъёсыз но уг адӟисько. Водительлы пӧртэмез ӧвӧл, кыӵе сюрес вылтӥ со ворттылэ: Россилэн, элькунлэн яке гурт поселенилэн. Со йырзэ уг висьыты, кин но ку сюресэз тупатыны коньдон висъя. Шофёрлэн одӥг сюлмаськонэз: питранъёс капчиен мед бергалозы.

— Коньдон сӥзьыл гинэ вуэ ке, уг луы-а сое вуоно арлы кельтыны? Малы одно зор ултӥ «гырод»? — юасько Балезино ёросысь сюрес лэсьтонъя управленилэн кивалтӥсезлэсь Хусейн Мегишовлэсь.

— Висъям коньдонэз нокызьы но вуоно арлы кельтыны уг луы. Кулэ ӧвӧл кариськоды, шуозы но талалозы. Ма, вуоно арлы быдӟалазэ но кулэстозы, — нокыӵе кариськытэк, вазиз со. — Районамы сюресъёс туннэ чидамонэсь луысалзы, вылды. Но берло 8 ар ӵоже соосты рос-прос лэсьтымон коньдон ӧз висъяськылы. Капитальной ремонт ӧвӧл ке, со ӝог куашка. Зэм, милям но янгышмы вань: лымы шунан вакытэ сюресэз сузяны но, техника тырмымтэен, беромылӥмы. Пукись ву асфальтэз эшшо но золгес пыргытӥз. Соку гинэ пилиськыны кутскем асфальтэз но дыраз кышъясалмы ке, гуос сомурдаесь ӧй луысалзы.

Туннэ Богдангурт-Кез, Богдангурт-Балезино, Эгра-Глазов сюресъёсты выльдон ужъёс кытӥ-отӥ мытэмын ни. Но нош ик сӥзьыл. Выль асфальт тулысозь ке но чидалоз меда?

Аэлита Князева

Удмурт Дунне
By Удмурт Дунне 30 августа, 2013 10:16
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<