Котькыӵе вань малпанъёс

Удмурт Дунне
By Удмурт Дунне 20 августа, 2013 10:58

Котькыӵе вань малпанъёс

970Виталий Елькин вордӥськемын Алнаш ёросысь Кузьымгуртын. Туэ гужем пусйиз 50 арессэ.

Виталий Васильевич йылпумъяз Асан совхоз-техникумез, ужа колхозын. Ваньмон дыръяз гожъя кылбуръёс. Но татчыозь чуръёссэ кыре поттыны дӥсьтылымтэ, востэм сямыз люкетэм.

— Виталий Елькин — мыло-кыдо адями, — вера Тыло школаысь дышетӥсь Елена Смирнова. — Кылбуръёс сяна, кырӟанъёс но гожъя, ачиз ик кырӟа. Виталий Васильевич зол суредаське но. Ёросамы ортчылӥсь конкурсъёсын та усточилэсь суредъёссэ синйылто.

Елькин кузпалъёс куинь нылпи будэтӥзы. Атайзы выжые мынӥллям кыктооссы Лена но Костя. Костя Ижысь медициная академиын тодон-валан люка, артист кадь, КВН-ёсы пыриське. Елена УдГУ-ын дышетске, туж чебер суредаське, кылбуръёс но веросъёс гожъя.

Шудме шедьто
Котькыӵе вань
малпанъёс,
Котькыӵе вань
сюресъёс.
Кудзэ меда мон
быръём,
Кудаз меда
вамыштом.
Кин ке но мед
верасал,
Мед кин ке
валэктысал,
Кытчы та
сюрес нуэ
Мынэсьтым пинал
йырме.

Вань пичи-бадӟым
шуръёс,
Кезьыт, чылкыт
ошмесъёс
Нюлэсъёс но возьёс пыр
Утчало асьсэлы ӧр.
Тодысал ке мон, кытӥ,
Шӧдысал ке, мар
пыртӥ
Ӧръяно та улонме,
Шедьтоно ас шудбурме.

Малы меда
Ортчиз, ортчиз шулдыр
гужем.
Вуиз, вуиз мӧзмыт
сӥзьыл.
Малы-о, мусо мемие,
Лулӟылӥськод меда
лушкем?
Усё, усё музъем вылэ
Кезьыт, кезьыт зор
шапыкъёс.
Соин но, дыр, тынад
туннэ
Синвуосыд котто бамдэ.
Лобо, лобо туж кыдёке
Ӝожмыт гурен
лудӟазегъёс.
Бурд вылазы нуо соос
Шулдыр гужем кадь
мылкыддэ.

Малы меда уг лу меда
Берыктыны пинал
дырдэ.
Малы, малы уг лу меда
Вӧзад возьыны
нылпидэ.

Нылы
Алвылам пуксиз нылы,
Юн-юн ӟыгыртӥз.
Муспотон куараеныз
Лушкем сипыртӥз:
Мар меда, атай,
тыныд
Туннэ кузьмалом?
Вордӥськем нуналэныд
Маин шумпоттом?

Возь вылысь чебер
сяська,
Атай, бичало.
Мунёме чын мусозэ
Тыныд кузьмало.
Вешаса пичи нылме,
Солы шуисько:
Будӥд ке чебер, визьмо,
Мон луо шудо.

Но нылы уг вала на.
Пичигес на со.
Юаса кадь мон шоры
Синъёсыз учко:
Сяськалэсь шат мон
чебер,
Мунёлэсь мусо?
Котькыӵе но
кузьымлэсь
Атайлы дуно?

Бадьпуос
Будӥзы ярдурын кык
пинал бадьпуос,
Огзылэсь но огзы
чебересь вал соос.
Гужемен но толэн
шыпырто, верасько.
Ог-огзэс исало,
мылкыдзэс верало.

Асьмеос кыкнамы
пыраклы люконтэм.
Котьку ӵош мед будом,
ог-огмес яратом.
Лек сильтӧл ке луиз,
кыкнамы пырпотом,
Пӧсь шунды ке потӥз,
салкыммес кузьмалом.

Но аръёс ортчизы,
бадьпуос будӥзы,
Котькыӵе лек зорез,
сильтӧлэз адӟизы.
Но али но соос ог-огзэс
исало,
Кырӟало, верало,
каньылля сипырто.

Соослэн вӧзазы табере ни
будо
Кык пинал бадьпуос,
сюлэмзэс шумпотто.
Шоразы учкыса,
кыкназы пальпото,
Ог-огзэс исало, соослы
шуд сӥзё.

Удмурт Дунне
By Удмурт Дунне 20 августа, 2013 10:58