Кияз сяська возись урод ужъёс уг лэсьты

Удмурт Дунне
By Удмурт Дунне 23 августа, 2013 12:12

Кияз сяська возись урод  ужъёс уг лэсьты

В. Дерюшева

В. Дерюшева

Удмуртиын туннэ ужало 56 искусствоосъя нылпи школаос, отын чеберлыкез валаны дышетско 15 сюрс 241 пиналъёс. Россиысь куд-ог улосъёсын сямен ик, шаерамы нылпиослы ватсаса тодон-валан сётон удыс азинске. Пинал усточиосты будэтон, искусствоосъя школаын ужасьёслы но творчествоен вырисьёслы юрттон сярысь вера культурая, печатья но иворъёсъя министрлэн нырысетӥ воштӥсез Валентина Дерюшева.

Устоосыз пӧлысь устоосыз
— Конкурсъёс, премиос, грантъёс, усточи нылпиослы лагерь сменаос, культура удысын тыршисьёслэсь тодон-валанзэс будэтонъя центрлэн ужамез — ваньмыз со радъяське республикалэн «Удмуртиысь культура (2010-тӥ-2014-тӥ аръёслы)» программаез чотын.
Туэ апрель толэзе шаерамы ортчиз «Устоез адӟем карымон коллектив» конкурс. Отчы пыриськизы 12 искусствоосъя школаосысь но ёросъёсысь культурая учреждениосысь ансамбльёс. Та ӵошатсконын 8 вормисьёс вал. Соосты сћё-дано ӟечкылалозы туэ октябрь толэзе Удмурт театрын. Усто коллективъёсты быдэн 75 сюрс манетэн пусъёзы. Та конкурс возьматӥз: нылпи ансамбльёсы пиналъёс мыло-кыдо ветло, творчествоен вырыны соослы кельше. Та ужрадын ик данъямын луозы Ижысь но шаерысьтымы устоосыз искуствоосъя нылпи школаос.

Кырӟаса шутэтскон
— 1994-тӥ арысен шаерысьтымы Культурая, печатья но иворъёсъя министерство искусствоосъя нылпи школаын дышетскисьёс понна радъя лагерь сменаос. Нылъёс-пиос гужем усто шутэтскем сяна, кырӟаны-вераны быгатонлыкъёссэс ӝуто. Туэ усточи пиналъёс (230 кузя) шутэтскизы «Дружба» лагерьын. Нылпиослэсь ял каронзэс радъянлы Удмуртилэн бюджетысьтызы висъямын вал 2 миллион 800 сюрс манет. Таиз сменазы ортчиз, нырысетӥез Брангурт калыккуспо фестивальлы дасяськыса.

Ижын кылдоз институт
— Удмуртиын вань культура удысын ужасьёслэсь тодон-валанзэс будэтонъя центр. Кылем арын кутэмын вал солэсь ужзэ азинтонъя концепция. Соя 5-7 ар ортчыса, та центр квалификациез будэтонъя институтлы пӧрмыны быгатоз. Та малпанэз улонэ пыӵатон понна республикалэн кисыысьтыз нырысетӥ паларе висъямын вал 520 сюрс манет.
Туннэ нуналлы сюрслэсь уно адямиос, хореографъёс, балетмейстеръёс, хормейстеръёс, музейёсын но библиотекаосын тыршисьёс татын тодон-валанзэс будэто. Со вань культура удысын ужасьёслэсь 13 процентэз луэ.

Стипендиос
— 2001-тӥ арысен Удмурт Республикалэн Президентэзлэн Указэзъя культура но искусство удысын тодон-валан басьтӥсь студентъёслы но искусствоосъя школаысь усто дышетскисьёслы сётӥське Геннадий Корепанов-Камский нимо стипендия.
Нялтас вераса, министерство та премилэсь быдӟалазэ будэтыны малпа. Али культурая но искусствоя дышетон заведениысь студент араз огпол 15 сюрс манет стипендия басьтэ, нош искусствоосъя нылпи школаысь усточилы араз огпол та стипендилэн быдӟалаез 12 сюрс 500 манет тупатэмын.

Кивоштӥсьёс
— Усточи нылпиосты шараян, соослы юрттон, творчествозэс азинтыны луонлыкъёс кылдытон вылысь Удмурт Республикалэн Правительствоез «Кивоштӥсьёс» («Наследники») премия кылдытӥз.
Котькуд ар октябрь толэзе шаерысьтымы искусствоосъя нылпи школаосысь тужгес устооссэ дышетскисьёсты пусъё та премиен. Вормисьёсты «утчало» дас номинацияя. Огез усто луэ калык инструментъёсын шудонъя, мукетыз чебер кырӟа яке эктэ, куинетӥез фольклорез тодэменыз паймытэ, кин ке киужен выре но мукет. Нялтас вераса, устооссэ пиналъёсты бырйыны капчи ӧвӧл. Арлы быдэ та премиез басьтон понна вожвылъясько 50-лэсь уно нылпиос.
2009-тӥ-2013-тӥ аръёсы «Кивоштӥсьёс» премиен пусъемын Шаерысьтымы городъёсысь но ёросъёсысь 40 нылъёс-пиос. Туэысен премилэн быдӟалаез 15 сюрс манетозь будэтэмын. Та ужъёслы 150 сюрс манет висъя Культурая, печатья но иворъёсъя министерство.
Балетын экто гуртысь пиос
Удмуртилэн Президентэзлэн Указэзъя кылем арын шаерысьтымы Крезьгуръя колледжлы 1 но ӝыны миллион манет кун юрттэт сётэмын. Та коньдонэн выльдэмын вал медкабинет но басьтэмын выль крезьгуро инструментъёс. Туэ уксё висъяськиз Удмуртиысь Культурая колледжлы. Со озьы ик мыноз ужан тӥрлык басьтыны но компьютер классэз выльдыны.
Бадӟым саклык висъяське шаерысьтымы усточи нылпиослэн школазылы. Республикаысьтымы пиналъёс татын ик дышетско но, уло но. Туннэ нуналлы школа уг ёрмы нокыӵе крезьгуро инструментъёслы.
Кылем арын татын ужзэ мытӥз чылкак выль ӧр. 25 ар куспын нырысьсэ шаерысьтымы быръемын вал дас аресъем пиос классика эктонъёслы дышетскон вылысь. Ар ӵоже тодон-валан люкаса, туннэ нуналлы пиос экто ини «Спящая красавица» но «Щелкунчик» балетъёсын, соос Ижысь Операя но балетъя театрлэн репертуараз пыртэмын.
Ми будэтӥськом вуоно интеллигенциез. Пинал ӧз ке но луы артист, искусствоосъя школаын басьтэм тодон-валанэз, чеберез но культураез шӧдонэз солы юрттоз улонын. Тыршемез юнме уз луы, малы ке шуоно кияз сяська возись адями урод ужъёс уг лэсьты.

Печатлаське «Удмурт Республикалэн 2011-тӥ-2013-тӥ аръёслы чаклам бюджетысьтыз расходъёсты ӟечомытон» программаез но «Шара бюджет» проектэз быдэстон улсын.

Кристина Романова

Удмурт Дунне
By Удмурт Дунне 23 августа, 2013 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<