Кин вотэсын — со син азьын!

Удмурт Дунне
By Удмурт Дунне Август 27, 2013 12:12
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Кин вотэсын — со син азьын!

087Тодӥсь-валась муртъёс верало: тросэз сайтъёсты нырысь вылтуссыя учко, собере ни пуштроссэ дунъяло. Тодматски куд-ог удмурт но фин-угор газет-журналъёслэн сайтъёсынызы. Маин соос бордазы кыско но палэнто лыдӟисьёссэс?

«Удмурт дунне» газет (udmdunne.ru)
«Удмурт дунне» газетлэн сайтаз пырыса, соку ик валано: та ивор вӧлмытӥсь сэрег. Отын шаерысьтымы но быдэс дуннеысь иворъёсын тодматскыны луэ. Нуналысь нуналэ со выльдӥське, шумпоттэ статьяосын, интервьюосын. Сайтын ортчытӥсько пӧртэм юалляськонъёс, жаляса верано, соос ӵем уг вошъясько, куара сётонэ пыриське туж ӧжыт адями. Сайтысь шедьтыны луэ котькуд номерысь тужгес тунсыко статьяосты. Шумпотыса усьтӥ «Дарт» сэрегез, поттэмын ӧвӧл берпуметӥ номеръёсысь одӥг но материал. Сайтэ ӧз сюре бере, оло, сокем тунсыкоесь но ӧй вал? «Туспуктэмъёс» рубрикаысь пӧртэм интыосысь, кытчы вуылӥллям редакциын ужасьёс, туспуктэмъёсты возьмано кадь. Кыӵе мылкыды куашказ: отчы пырыса, кык чӧлскон сяна ӧй адӟы. Сайтэз учкемъя, синйылтӥ кӧня ке янгышъёсты но: кытӥяз рубрикаослэн нимъёссы пичи букваысен гожтэмын, кытӥяз кылъёс вискын вис сярысь вунэтӥллям.

Озьыен, та сайтысь ӝог шедьтыны луэ пӧртэм информациез но тодматскыны берло иворъёсын. Дунъясько «4»-лы.

«Инвожо» журнал (www.invozho.ru)
Ваньмызлы тодмо, дыр: «Инвожо» котьку паймытэ лыдӟисьсэ яркыт буёло суредъёсын, туспуктэмъёсын. Жаляса верано, сайтсы сярысь таӵезэ уд вера, журналэн ӵошатыса, со туж бездыт. Кутскон бамаз поттэмын куинь толэзь талэсь азьвыл статьяос. Выльёсыныз тодматскыны уз ни кылды кожаса, номеръёсын архивез бугыръяны кутски. Ӵапак отын вылӥллям вань номеръёссы. Паймытӥз но шумпоттӥз «Видео» сэрег. Туннэ нуналлы, «Инвожо» сяна, видео сэреген нокин ушъяськыны уг быгаты. Зэм, со вань ке но, туж шер выльдӥське. Озьы ик сайтсы герӟаськемын быдэс дуннеысь социальной сайтъёсын: «Твиттер», «ВКонтакте», «Фейсбук». Соин отысь но журналэз лыдӟыны луэ. Сайтазы, журналазы сямен, ӟуч но удмурт кылын уж нуиське. Кӧня утчай, ӧй шедьты редакциысь ужасьёсын тодматскон сэрегез. Мыным, лыдӟисьлы сямен, тунсыко, кин лыдӟись понна гожъяське но сюлмысь тырше журнал поттон бордын.

Сайт, журнал сямен, уг ке но пишты яркытэныз, отысь шедьтыны луэ вань номеръёссэ. Шумпотыса пуктӥсько «4».

«Кизили» журнал
«Кизили» журналлэн аслаз вотэс бамыз ӧвӧл, соин иворъёссэ, гожъямъёссэ лыдӟыны луоз, кема утчаса гинэ. Вотэсысь сое шедьтыны луэ Национальной библиотекалэн сайтысьтыз гинэ.

Жаль.

«Ӟечбур!» газет (zechbur.com)
«Ӟечбур!» газетлэн сайтаз пырыса, соку ик валалод: со нылпиослы чакламын. Кутскон бамысен ик пумитало яркыт суредъёс. Малпасько, 14-15 аресъем егит адямилэн бадӟым мылкыдыз уз кылды сое учкылыны. Кутскон бамазы поттэмын газетын печатласькем кӧня ке статьяос. Толэзь понна куиньлэсь трос ӧвӧл. Та туж ӧжыт. Номеръёсын архивын шедьыло 2012-тӥ ар понна газетъёс гинэ. Мылкыд карид ке но, татын газетлэсь выль номеръёссэ лыдӟыны уз пӧрмы.

Озьы ик сайтын нылпиослэн пӧртэм пумо ужъёсынызы тодматскыны луэ: йыртӥянъёсын, суредъёсын но мукет. Жаляса верано, сайтлэн таяз сэрегаз но ӧжыт материалъёс поттэмын. Егитъёслэн но пиналъёслэн газетсы сайт пыр герӟаськемын «ВКонтакте» соцсетен гинэ, озьыен, лыдӟыны но сое отысь гинэ луэ.

Газетлэн сайтэз кельшоз, дыр, покчи лыдӟисьёслы. Нош мон пуктӥсько «3» гинэ.

«Кенеш» журнал
Интернетэз кема бугыръяса, Национальной библиотекалэн сайтысьтыз сяна, «Кенеш» журналлэсь сэрегзэ ӧй шедьты. Паймоно кадь, шаерысьтымы ӧдигез гинэ юромо литератураен вырись журналэз утчаса но уд шедьты. Кытын, татын ке ӧвӧл, егит но арлыдо авторъёслэн кусып возён интызы луоз? Кытын со сяна тодматскыны выль литератураен? Валантэм.

Писателъёслэн союззылэсь сайтсэ утчаны кутски. Сое но ӧй шедьты. Озьыен, Интернетын, «ВКонтакте»-ын пӧртэм группаос сяна, ӧвӧл удмурт литератураен тодматскон инты.

Туж урод!

«Коми му» газет (komimu.com) — Коми шаер
«Коми му» газетлэн нимаз сайтэз ӧвӧл, сое учкыны луэ, огазеям издательстволэн сайтаз пырыса. Ӵӧлсконэз усьтыса, валаны луэ: трос лыдӟисез ас бордаз уз кыскы. Толэзьлы быдэ со выльдӥське ке но, вуж дизайнэз, зэмзэ вераса, кышкатэ. Сайтысьтызы тодматскыны луэ газетысь кӧня ке иворъёсын, редакциын ужасьёсын, туспуктэмъёс пыр адӟыны луэ газетлэсь историзэ.

Иворъёссылы луыса гинэ пуктӥсько «3». Адӟеме потэ выль но учкымон сайтэз.

«Эрзянь мастор» газет (erzia.saransk.ru) — Мордовия
Сайтлэн тусыз шуш. Газетысь иворъёсыз сайтазы ӧй синйылты, ваньмыз гожтэмын ӟуч кылын. Номеръёсын архиве пырыса но, одӥг но статьяез ӧй адӟы.

Дунъямея, сайт ужа «2»-лы гинэ. Сӥзисько азинсконъёс!

«Чолман» газет (www.cholman.ru) — Башкириысь Нефтекамск городын потӥсь пор газет
Вань мукет фин-угор изданиосын ӵошатыса, та газетлэн сайтэз шумпоттэ. Адӟиське, со бордын ужало, выльдо шуыса. Татысь адӟыны луэ выль статьяосты, пӧртэм ужрадъёсысь фотоосты но редакциын ужасьёслэсь туспуктэмъёссэс. Озьы ик сайтлэсь адӟеме потэ мукет, выльдытэм пор дизайнзэ.

Шумпоттэмзы понна пуктӥсько «4».

* * *
Фин-угор дуннеысь газетъёслы но журналъёслы вунэтоно ӧвӧл кыӵе даурын улэмзэс. Тыршоно сайтъёссэс тунсыкогес но лыдӟымон карыны. Кин тодэ, оло, зэм но, матысь дыре киямы ум кутэ ни кагаз вылын поттэм журналъёсты но газетъёсты.

Тужгес но бадӟым сюлмаськон — удмурт журнал-газетъёс пӧлысь одӥгез но «5»-лы уг ужа. Мар луоз соосын аръёс ортчыса — али валантэм.

Дарья Шиляева

Удмурт Дунне
By Удмурт Дунне Август 27, 2013 12:12
Write a comment

No Comments

No Comments Yet!

Let me tell You a sad story ! There are no comments yet, but You can be first one to comment this article.

Write a comment
View comments

Write a comment


Warning: Illegal string offset 'rules' in /home/users/u/udmdunne/domains/udmdunne.ru/wp-content/themes/allegro-theme/functions/filters.php on line 188
<