Яратон уг пересьмы

Удмурт Дунне
By Удмурт Дунне 2 августа, 2013 14:15
Warning: A non-numeric value encountered in /home/users/u/udmdunne/domains/udmdunne.ru/wp-content/themes/allegro-theme/functions/other.php on line 93

Яратон уг пересьмы

З. Романова

З. Романова

Владимир Романовлы 1-тӥ августэ тырмысал 70 арес. Таин валче тодматскем потӥз солэн кыкетӥ кышноеныз Зинаида Романоваен. Газетмылэн матысь эшез Людмила Старшева куке поттылӥз вал, одӥг коркан, пе, улӥськомы.

Пумиськон сярысь телефон пыр вераськыкумы, Зинаида Владимировнаез туспуктэмъёссэ дасяны кури. Мон, пе, фотографиосы уг пуксьылӥськы. Малпай, тусызлэсь-а мар-а кепыра, Но монэ пумитаз пичигес гинэ мугоро туж синмаськымон нылкышно. Йырсиез тӧдьы буямын. Аслаз арлыдызлэсь трослы пинал адӟиське.

Шӧдӥське, Владимир Васильевич та коркан дуно адями. Солэн рукописьёсыныз, печатланы дасям ужъёсыныз папкаос ӝажыын утисько. Печатлан машинкаез, инты ӟоскытэн, выж вылэ интыямын. Вузаны куро вылэм, но Зинаида Романова нокинлы ӧвӧл сётэм. Нылкышно 24 ар ӵоже утьыса возе Романовлэсь сӥзьыл-тулыс нуллоно пальтозэ но огшоры, синпельлы шуыса.

Кема пукимы вераськыса. Кытӥ-кытӥ Зинаида Романовалэн синвуосыз но пызьыразы. Паймымон но кужмо нылкышнолэн тодэ ваёнъёсыныз лыдӟисьёсты но тодматэм потӥз.

* * *
— Володяез мон нырысьсэ адӟи Удмурт театрлэн сцена вылысьтыз. Азьло аръёсы спектакль кутскон азьын писательёс вераськылӥзы. Мар со отын мадиськиз, уг тодӥськы ни. Театре мынӥ вал Володялэн вордскем палысьтыз пияшен. Со ик Романовен тодматӥз, лэся. Со ӝытэ Володя монэ общежитиозь келяз. Тодӥсько на Советской ураметӥ пыдын ортчеммес. Со вал 1971-тӥ арын тулыс.

Берло Володя монэ театре, киное нуллӥз. Куинь арлы гинэ бадӟым бере, малпай, семьяез ӧвӧл. Собере сое тросэз тодо, нокинлэсь ватӥськыны ӧз туртты. Йырам нокыӵе малпан ӧз кылдылы, кузпалъяськемын шуыса, пиез но будэ вылэм. Кыӵе ке ӝытысь шӧдтэк шорысь кышноеныз ӵошен адӟи. Керетытэк люкиським. Шуи, дорам эн ветлы ни.

Выльысь пумиськыкумы, со кышноеныз люкиськем, юыны но кутскем. Мон нимаз квартираын улӥсько вал соку. Улон инты висъязы автозаводысь, химической цехын ужакум. Можгаысь вуз каронъя техникумез йылпумъяй ке но, кема ӧй вузаськы — квартира понна заводэ мынӥ ужаны.

Володя монэ шедьтэм адресной бюро пыр. Ӵош улыны кутскеммы бере юай: малы ӧд вера кышноед вань шуыса? Ма, ачид, пе, ӧд юа но, мар вералом. Зол юэ ни вал соку, нокинлы кулэ ӧвӧл. Шонерзэ вераса, мыным Володя жаль потӥз. Та дыр куспын пӧртэм шуг-секытъёсты адӟыса вуттӥз бере, тупатсконэзлы но оски.

* * *
Дорам улыкуз, сокем зол ӧз юы, кутыны но турттӥ. Кыӵе ке ӝытъёсы, пумиськонъёсы яке командировкае ветлэ, шӧмаськыса бертэ. Мултэссэ медаз юы шуыса, ураме ӵошен потӥськомы вал юмшаны. Кисыяз одӥг копейка коньдонэз ке но уг луы, утялтӥсьёс шедьылӥзы. Куддыр лыдъяса коньдон сётэмысьтым серекъялляз гинэ. Кытӥ ке кудӟыса ветлэмысь дорын мед юоз, малпалляй. Вина басьтыса бертэ но айда Зинчик юом, шуэ. Мыным но рюмкае лэзе. Адӟымтэ дыръяз мукет азе кисьтылӥ, бутылкаысь но пичиен мукет посудае лэзьылӥ. Курадӟыкуз аслыз ик сётылӥ.

Володя тодэ вал: юон — солэн висёнэз. Шуылӥз оло водка юисько, оло ву. Али дыре эмъяськысал но, дыр. Миша Федотов шуэ вал, огдыре нокытын но печатланы ӧвӧл лэзиллям ужъёссэ. Юэ ке, со адями ӧвӧл шат? Юрттэм интые, мылкыдзэ эшшо но золгес зӥбизы. Куд-огез Романовез ӵошатъязы Высоцкиен. Марина Владилэсь Высоцкиен улэмзы сярысь книгазэ лыдӟи. Улонамы одӥг кадез вань. Мон но нюръяськыны выри висёнэныз.

Ӵош кариськемысьтымы мамаез шумпотӥз, огназ улыса, со бырысал ни, пе. Володя ачиз но шуылӥз, Зина гинэ монэ адями кариз на. Мамаез но пайме вал, кызьы, пе, сыӵе юись луид, армие мыныкуд, курытсэ ымад но ӧд поны ук! Пиеным ик ветлӥм Татарстанысь Бавлы ёросысь Удмурт Ташлы гуртаз — Володя кулэм бере но кык пол ветлыса вуттӥ на.

Даллашыса ӧм улэ. Ма, сазь дыръяз номыр понна соин керетыны вал. Но юэмысьтыз куаретылӥ ик. Володя быгатэ вал буйгатыны, мар ке серемессэ вералоз но мылкыд капчия. Со котькинэн огкыл шедьтылӥӟ огшоры ужасен но, министрен но. Малпанзэ шонерак вераны дӥсьтылӥз.

Алнаш ёросысь Чумолё гуртам туж возьмаллязы бертэммес, Володя но яратэ вал отчы ветлыны. Кенакмы шуылӥз, Зинаен Володя берто ке, серекъяса анлыосы ик висьыны кутско. Ӵужмуртэлэн, мамаелэн братэзлэн, куать нылпиосыз. Володя кызьы ке солэсь юаӟ Тихоныч, тӥляд электричестводы но, лампочкаосты но ӧй вал-а, мар-а? Вал, пе. Серекъямысьтымы валатскиз ини, мар сярысь вераськон мынэ.

Мамаелы туэ 89 арес тырмиз. Шутэтскон нуналъёсы ӵемысь эскерыны вуылӥсько. Сюрес вылэ потыкум, шуисько Володя, мон гуртэ бертӥсько, ойдо сьӧрам.

** *
Тодмо пиосы мынам трос вал: журналистъёс, дышетӥсьёс… Шуылӥ, мон сыӵеослы уг бызьы, колхозын ужасьлы мыно. Эшъёсы пумитам вераллязы, ма, соос но, пе, колхозын будэмын ук. Одӥгез пияш монэ юаны гуртамы но ветлэм, но мамае верам: Зина, пе, трактористлы бызё, шуиз. Адӟонэ сыӵе вылэм, лэся, 1983-тӥ арын выльысь Володяен пумиським.

Денис пие куиняз мынэ вал. Атаезлы ӧй бызьы, сямыз укыр сук. Пие папаен лыдъяз Володяез. Ас вылаз гожтыны турттэ вал, ӧз вутты. 1988-тӥ арын Бакуысь творчествоя юртэ куиньнамы ветлӥмы: Денислы вань улытозяз, пе, тодаз кылёз. Озьы ик луиз, нокытчы берло ӧм ветлэ ни. Аслаз но пиез дораз вуылӥз, мон пумиськонъёссылы ӧй люкетылы. Пиналъёсты со туж яратэ вал.

Дорам лыктэмез бере ик гожтӥськыны ӧтиз. Пумит кариськи, адямиос озьы но уло, шуисько. Писательёслэн союззы ласянь квартира сётонзэс тодыса, загсэ мынӥмы. Гожтӥськимы 1989-тӥ арын март толэзе — кулон араз. Ӵошен гинэ ветлӥмы, эшъёсызлы но ӧз вера кадь.

Холмогоров ураме ньыль комнатаен квартира сётыны туртто вал. Луонлыкмы вал Володялэн кык кузёен квартираяз выжыны, бускелез мынамаз лыктысал. Солань-талань ум ветлэ, шуиз. Телефонмы но ӧй вал, малпамы, выляз пуктомы. Ӵыжы-выжыоссэ, ужысь эшъёссэ но отчы ик ӧтёмы, малпамы. Дорамы Миша Федотов, Слава Сергеев, Виктор Шибанов но Петя Захаров гинэ вуылӥзы.

Одӥг пол вераськеммес Денис кылӥз, дышем интыысь кошкемез потытэк, лэся, шуиз: мама, нокытчы мукет азе ум мынэ. Володя шуак луиз, собере вазиз татын интыез пичи, ми тыныд аквариум басьтом, нимаз комнатаед луоз, мынам но. Огнад, пе, мын. Мынам соку мукет тётенькае луоз, пумитаз люкетӥз Володя. Ну и мар, пе, ми шуомы папа доры куное лыктӥмы.

Озьы ик луиз, дораз куное ветлӥськомы. Квартираысьтымы но ӧм кошке. Володя сентябре кулӥз ке, та толэзе ик солы ӵектэм квартирае мукетъёсыз пыризы.

* * *
6-тӥ сентябре мукет писательёсын ӵош Володя Глазове командировкае кошкыны кулэ вал, но солы секыт луиз. Мон ӵапак отпускын вал. «Скороез» ӧти. Укол пуктыса, больницае нуыны кариськизы. Володяе, ӧс доры вуыса, берытскиз. Больницае мыныны пумит луиз.

Кӧня ке улыса, мон телевизор учкыны пукси. Ӵапак кино кутскиз — «Моя судьба». Мар сярысь вал, кинъёс шудӥзы, номырзэ уг тодӥськы. Володялы нош ик урод луиз. Выльысь «скороез» ӧти. Шокатыны но выризы, номыр ӧз юртты — сюлмыз кутӥз. Кин тодэ, соку ик нуысалзы ке, утьысалзы но, дыр. Келязы сое Удмурт драмтеатрлэн юртысьтыз.

Миша Федотов кулэм бере ватӥськонэ мыныны ӧй быгаты, нош ньыльдон уяз Яре ветлӥ — кышноеныз Аняен ми али но эшъяськиськом. Тӥни соку дорам лыктӥз Алла Кузнецова. Шуиз, ми, пе, Володяез Глазовысен ыштӥмы. Кулэмез сярысь иворез радио пыр кылыса, пумиськонъёс ортчытытэк, бертӥмы. Вераз на: ватонысен сыӵе шуш потӥд, нош Василичлэн кышноез сыӵе чебер кышномурт вылэм, пе.

Володя кулэм бере толэзь пала синучкон шоры ӧй учкылы, йырсие быдэсак пурысьтаз, дыр. Со нуналэз али ке но вунэтэме уг луы, квартирае пырон ӧс но со сярысь тодэ вайытэ. Мыным куддыр потэ, дермантинэн шуккем ӧсмы мар ке каремын, дыр: кыӵе ке но кужым Володяез больницае мынэмлэсь возиз. Ӧйтӧд, оло, со ӧвӧлтэмзэ вань карон (внушение), но та учыр вӧзы мукетыз ватсаськиз на.

Август толэзе подъездысь площадкаямы чиль-чиль сьӧд писэй пиям, кин ке картон коробка но поттэм солы. Пиоссэ весь квартираямы пыртыны турттӥз. Володялы шуисько, та мар ке умойтэмлы, дыр. Малпаськонэ усиз, коробкаен валче писэез мукет подъездэ нуиз. Кӧня ке дыр ортчыса, коӵыш пиоссэ выльысь подъездамы вайиз. Весь ӧсамы ӵабъяське вал. Володя кулэм бере но ӧз буйгатскы. Кӧшкемаса мамаме дорам улыны ӧти. Со ӧсэз усьтэм но писэй пырем. Мон соку ас вылам сьӧлык басьтӥ: писэйлы укол пуктӥ.

Котькуд ар ӵабъям ӧсэз вошто шуисько. Коньдон ӧвӧл-а, мар-а? Кыкетӥзэ кортлэсьсэ пуктӥмы ик. Туэ сӥзьыл быдэсаксэ воштыны малпасько.

* * *
Кулыкуз Володялы 46 арес вал. Ачим тани пересьми ни, нош со тодэ ваёнъёсам сыӵе ик пинал кылиз. Мӧзмыт луэ ке, «Яратон уг пересьмы» кырӟанэз кылзӥсько — Володялэн кылъёсызъя крезьгурзэ гожтӥз Геннадий Бекманов.

Лия Малых

Удмурт Дунне
By Удмурт Дунне 2 августа, 2013 14:15